Senn líður að lokum skólaársins og þessa daga eru nemendur uppteknir við próflestur og kennarar við yfirferð prófa. Ég vil minna á að þann 21. maí er prófasýning fyrir nemendur en einnig er hægt að breyta og ganga frá vali hafi nemendur ekki gert það nú þegar. Sama dag eru endurtektarpróf frá 9:00-11:00 og vona ég að sem fæstir útskriftarnemenda þurfi á því að halda.

Þessa dagana standa yfir heilmiklar framkvæmdir á lóð skólans og á þeim að vera lokið fyrir byrjun ágúst. Bílastæði við suðurálmu eru lokuð á meðan þessi vinna stendur yfir. Vinnu við glæsilega aðstöðu fyrir utan matsalinn er nær lokið og má heita öruggt að á góðviðrisdögum verði aðstaðan vel nýtt. Hjólaskýli verða sett upp og er það svo sannarlega til bóta endar fjöldi starfsmanna og nemenda sem notar vistvænar samgöngur. Þess má geta að rafmagn verður lagt í nokkur stæði þar sem gera má ráð fyrir að á næstu árum muni rafbílum og rafhjólum fjölga.

Þann 8. maí byrjar átakið Hjólað í vinnuna og hvet ég starfsfólk til að skrá sig. Fjöldi starfsmanna hefur undanfarin ár tekið þátt í átakinu og vona ég að svo verði einnig í ár. Átakið mun standa yfir til 28. maí og er skráning opin á www.hjoladivinnuna.is.

Lokaprófin fóru vel af stað en því miður er nokkuð um forföll. Að sama skapi minni ég á að allar upplýsingar um dagsetningar prófa er að finna á heimasíðu skólans. Það kemur því miður fyrir að nemendur ruglist á prófdögum og missi af prófum og því vissar að hafa dagsetningarnar á hreinu. Í fjarnámi þreyta nemendur próf um allt land. Einnig þreyta nokkrir nemendur próf erlendis og er það gleðiefni hversu fjölbreyttur hópur stundar fjarnám við skólann, þ.e. af öllum aldursstigum, með búsetu víða um land og frá ýmsum öðrum skólum.

Nú er síðasti kennsludagur vormisseris senn að baki og prófin framundan. Ég vil hvetja nemendur til dáða í prófunum og vonandi uppskera allir eins og þeir sáðu.

Dimmisjón nemenda í liðinni viku heppnaðist mjög vel og brugðu útskriftarefnin sér í gervi Stjána bláa af tilefni dagsins. Er óhætt að fullyrða að athöfn nemenda niður á sal hafi farið vel fram og var m.a. góðlátlegt grín gert að undirrituðum við mikla kátínu viðstaddra. Fjölmargir kennarar voru verðlaunaðir, m.a. nýliði ársins, besti kennarinn, flottasti kennarinn, o.fl. Undanfarin ár hafa dimmisjónir nemenda oft orðið fréttamatur vegna ýmissa óvæntra uppákoma en nemendur FÁ voru til fyrirmyndar í alla staði hvar sem þeir fóru um bæinn.

Mennta- og menningarmálaráðuneytið hefur nýlega staðfest að skólinn fái leyfi til að tilraunakenna nýja námsbraut í nýsköpun og listum á næsta skólaári. Námsbrautin felur í sér tveggja ára nám þar sem nemendur fá m.a. að fara í starfsnám í atvinnugreinum tengdum kvikmynda- og listgreinum. Þau Gréta Mjöll og Þór Elís listgreinakennarar eiga heiðurinn af hönnun og uppsetningu brautarinnar og er unnið að uppsetningu brautarinnar í námskrárgrunn ráðuneytisins. Það er von mín að námsbrautin laði að nýjan hóp nemenda sem eykur enn á fjölbreytnina í skólastarfinu.