Haustið 2006 hófu þrjár stúlkur, Sara, Karlotta og Harpa,að safna peningum með það að markmiði að byggja skóla fyrir 200 börn í Pakistan. Stofnuð var hjálparstarfsnefnd sem byrjaði á að selja kaffi og kleinur í skólanum. Starfið vatt upp á sig, fleiri bættust í hópinn og krónunum fjölgaði í sjóðnum með tímanum. Ýmsum þótti markmiðið fjarlægt í byrjun. Hvernig átti að vera hægt að safna næstum þrem milljónum króna með kaffisölu, tónleikum, ljóðabókum og sölu á notuðum fatnaði? Var ekki nóg að kaupa eina geit?

Núna fjórum árum síðar er draumurinn orðinn að veruleika. Skólinn er risinn í Gujranwala í Pakistan. Hann var byggður í samstarfi við ABC hjálparstarf og var vígður við hátíðlega athöfn fyrir stuttu síðan.

Guðrún Margrét framkvæmdastjóri ABC sagði í bréfi til skólans að börnin hefðu beðið eftir þjóðhetju sinni, Söru, til að vígja skólann en notað tækifærið þegar Guðrún kom. Vonandi hefur Sara tækifæri síðar til að fara og sjá þetta allt með eigin augum. Framkvæmdastjóri ABC þakkaði stjórnendum skólans stuðninginn við söfnunina.

Allir í hjálparstarfsnefndinni mega vera stoltir með árangurinn og eins allir þeir sem lögðu peninga til málefnisins. Fjölbrautskólinn við Ármúla er stoltur af sínu fólki.

Guðrún Margrét hjá ABC tók myndirnar hér fyrir neðan. Hægt er að sjá fleiri myndir á slóðinni:
http://www.dropbox.com/gallery/11079247/2/Pakistan/Gujranwala?h=3d99a3