Fjölbrautaskólinn við Ármúla - Fréttir

Á morgun 24. maí, kl. tvö rennur STÓRA stundin upp!

Thu, 23 May 2013 00:00:00 +0000

Útskriftarnemendur komi kl. 13:30

Dagskrá útskriftardagsins:

1. Athöfn sett: Steinn Jóhannsson skólameistari

2. Kórsöngur: Félagar úr sönghóp FÁ.

3. Skýrsla um skólastarfið: Ólafur H. Sigurjónsson aðstoðarskólameistari.

4. Ávarp: Viðar Helgason, fulltrúi 25 ára afmælisstúdenta.

5. Afhending einkunna: Skólameistari, aðstoðarskólameistari og kennslustjórar.

6. Ávarp: Fulltrúi útskriftarnema Heilbrigðisskólans - Þórey Einarsdóttir

7. Jóhann Arnar Þorkelsson, útskriftarnemandi af náttúrufræðibraut og einsöngvari flytur lagið „Í fjarlægð“.

8. Afhending einkunna, framhald

9. Ávarp: Fulltrúi nýstúdenta – Erla Maren Hrafnsdóttir

10. Söngur: Tónlist flutt úr söngleiknum Grease

11. Ávarp og skólaslit: Skólameistari.

12. Myndataka: Íris Mjöll Ólafsdóttir

13. Kveðjuhóf kl. 16:30 fyrir starfsmenn og afmælisstúdenta á kennarastofu.

Sumar minningar fölna aldrei - endurfundir stúdenta og eldri starfsmanna FÁ

Tue, 21 May 2013 00:00:00 +0000

Föstudaginn 24. maí er öllum 10 ára, 20 ára, 25 ára og 30 ára júbilöntum boðið til endurfunda við skólann sinn og þó sérstaklega til að sýna sig og sjá aðra - Það er spennandi að sjá hvort/hvernig gömlu skólafélagarnir hafa breyst - er einhver kominn með skalla, er annar með bumbu og er skvísan ennþá sama skvísan?

Tekið verður á móti gestum í anddyri skólans að útskriftarathöfn lokinni kl. 16.30. Gengið verður um ganga og sali og andað að sér gömlum minningum, einnig verður nýbygging skólans skoðuð. Á eftir kynnisferðinni um skólann er júbílöntum og eldri starfsmönnum boðið á kennarastofuna að þiggja hressingu.

Ljúfar myndir frá fyrri árum eru á: http://www.fa.is/fjolbrautaskolinn/afmaelisstudentar/.

Prófasýning þriðjudaginn 21. maí kl. 11:00 - 13:00

Sat, 18 May 2013 00:00:00 +0000

Prófasýning og frágangur á vali fyrir haustönn verður þriðjudaginn 21. maí kl. 11:00 - 13:00

Nú þegar prófunum er lokið geta menn varpað öndinni léttar og fagnað sumarkomunni. Hér kemur samt ein síðbúin prófspurning ef vera skyldi að einhverja þyrsti eftir fleiri prófum: Hver orti þessa vísu hér að neðan?

Sumarkoma

Úti blæs golan svo himnesk og hlý,

Horfinn er veturinn, trúa má því;

Þrestina heyri ég syngja mót sól:

Sumar er komið um dal og hól.

Gleðilega hvítasunnu!

Blessuð nýræktin fyrir utan glugga matsalarins.

Tue, 14 May 2013 00:00:00 +0000

Nýja grasbrekkan er svo ljúf á að líta að nú fýsir sjálfsagt marga að gerast grænmetisætur. Gras hefur löngum verið mönnum hugleikið, samanber þessa hugleiðingu Jóhannesar úr Kötlum:

Óskiljanlegt er grasið:
maður treður það undir fótum sér
en það reisir sig jafnharðan við aftur.

Óskiljanlegt er grasið:
skepnurnar bíta það og renna því niður
og skila aftur hinu ómeltanlega
– en viti menn:
á því nærist svo nýtt gras.

Já óskiljanlegt er það
hið græna gras jarðarinnar:
auðmýktin og uppreisnin í senn.

Um gagnsemi þess sem ekki er

Sat, 11 May 2013 00:00:00 +0000

Á föstudaginn var lét Tölvu-Árni hendur standa fram úr ermum, leit upp frá tölvuskjánum og tók að sér að yfirfara reiðhjól starfsmanna í FÁ. Ekki veitir af að reiðskjótarnir séu vakrir þegar riðið er inn í sumarið. Í vetur hefur mikið verið rætt um að hjólin verði að snúast enda augljóst að hjól sem ekki snýst er gagnslaust. En hjól getur ekki snúist nema vegna gatsins, nafarinnar eða hjólmóðurinnar, sem sameinar teinana fyrir miðju og gerir því kleift að snúast um öxulinn. Ef tómið, miðjan væri ekki til staðar myndi hjólið ekki hreyfast. Það er semsagt tómið, ekkertið sem gerir hlutunum kleift að vera til og sinna hlutverki sínu.

Svo mælir Taó en Árni lét verkin tala og smurði og barði og pússaði og herti og skrúfaði svo svitinn bogaði af enninu svo myndaðist regnbogi um höfuð hans.

Og hjólið snýst.

Hljóðir eru gangar þínir, skólinn minn í Múlanum

Wed, 8 May 2013 00:00:00 +0000

Það er kyrrð og ró yfir skólanum, engir nemendur að pikka á snjallsímana í leit að svörum tilverunnar, engar turtildúfur á bekkjum, engin strákagengi að býtta á bröndurum. Hvar er skólans nemendafjöld sem fyllti gangana gleði og gassagangi? Nú, þeir eru allir inni í stofum, grúfandi sig yfir prófblöð og nú er ekki hægt að ráðfæra sig við neina snjallsíma heldur verður að stóla á eigin snilligáfu og heilasellur.

Hafið hljótt á göngunum - mikil heilabrot í gangi.

Niðurskurður eða uppskurður? Nei, bara skurður.

Sat, 4 May 2013 00:00:00 +0000

Nú standa yfir framkvæmdir á lóðinni. Fylgir því nokkurt rask en vonandi kemur það lítt að sök þótt bílastæðum fækki tímabundið. Þegar hringt verður inn til kennslu að hausti komanda verður lóðin orðin flott og fín og nemendur geta rennt fákum sínum í falleg bílastæði - þótt auðvitað sé best að koma með strætó, hjóla eða ganga

Nýtt nemendaráð velkomið til starfa

Tue, 30 Apr 2013 00:00:00 +0000

Kosningar til embætta hjá nemendaráði fóru fram 30. apríl. Úrslit urðu þessi:

Formaður var kjörin María Christina Thorarensen
Formaður skemmtinefndar: Viðar Pétur Styrkársson
Ritari: Daði Laxdal Gautason
Gjaldkeri: Úrsúla Ýr Jóhannsdóttir

Þetta er allt saman valinkunnugt sómafólk og er mikils að vænta af því.
FÁ óskar nýju nemendaráði til hamingju.

Í nefndir og ráð verður kosið í haust

Tvær einingar í boði fyrir sæluviku í Skaftafelli.

Tue, 30 Apr 2013 00:00:00 +0000

Hugsa sér að liggja úti í móa, skoða skýfar og tyggja strá á meðan sólin baðar kroppinn og mófuglarnir syngja dírrindí, og ljúfur sunnanblærinn gælir við nefbroddinn - og vinna sér inn einingar í leiðinni.

Í sumar er í boði að fara í sjálfboðavinnuferð í Skaftafell 2.-9. júní. Ferðin er skipulögð í samvinnu við Umhverfisstofnun og mun hópurinn vinna í 5 daga við að laga göngustíga og sinna annarri viðhaldsvinnu. Svo er gert ráð fyrir tveimur dögum í gönguferðir um þjóðgarðinn. Hópurinn mun tjalda á svæði landvarða, þar sem hann verður með eldhúsaðstöðu. Ferðin er metin til tveggja eininga sem íþróttagrein. Farið verður á eigin bílum og deila þátttakendur ferðakostnaðinum. Nemendur geta skráð sig á skrifstofu skólans og er skráningin ekki bindandi.

Svo uppsker hver sem sáir - prófin á næsta leiti

Sun, 28 Apr 2013 00:00:00 +0000

Það ber ekki á öðru. Það eru öll merki uppi um það að senn sé þessi önn á enda. Einn fyrirboði þess að nú taki við próflestur og próf er sá að heyra lóuna kvaka úti í móa. Hér í FÁ er það öruggt merki um annarlok þegar listnemendur stilla upp verkum sínum, afrakstri annarinnar. Já, önnin er senn á enda og hún leið alltof fljótt. Nú eru aðeins tveir kennsludagar eftir og svo taka við prófin. Eru ekki allir búnir að kynna sér próftöfluna sína?

Gleðilegt sumar

Thu, 25 Apr 2013 00:00:00 +0000

Svona orti Páll Ólafsson um sumardaginn fyrsta:

Nóttin er liðin. Þú lokkana greiðir,
   ljóshærða sól,
fjöllum og dölum, og blómstrum þú breiðir
   bala og hól.
Fuglarnir syngja´ um þig sólbjartan daginn.
   Suðvestan blæinn
vetrinum léstu nú varpa í sæinn.
   Lof sé þér. sumardags-sól!
   Ó, lof sé þér, sumardags-sól!

Dimission

Wed, 24 Apr 2013 00:00:00 +0000

Náttúran reiðir fram hvítan veisludúk vegna þess að í dag ætla burtfararefni FÁ að gera sér glaðan dag í tilefni þess að brátt sér fyrir endann á ljúfri tilveru þeirra í skólanum.
Vonandi að hvítt klæði almættisins, eins og fermingarkyrtill og þó meir eins og brúðarkjóll, sé vegvísir til framtíðar stúdentsefnanna.
FÁ óskar burtfararnemendum, dimittendum, til hamingju og við gleðjumst yfir bjartri framtíð þeirra.
Í dag fellur niður kennsla í þriðju kennslustund og eru allir hvattir til þess að mæta á sal og samfagna með dimittiendum. https://www.facebook.com/media/set/?set=a.402852339812986.1073741839.381906895240864&type=1

Dagur bókarinnar er í dag

Tue, 23 Apr 2013 00:00:00 +0000

23. apríl er dagur bókarinnar. Þá er tilvalið að leggja frá sér farsímana og taka sér bók í hönd. Guð er víðar en í Görðum.
23. apríl er fæðingardagur Halldórs Laxness og William Shakespeare.

おめでとう = Til hamingju!

Mon, 22 Apr 2013 00:00:00 +0000

Japanska sendiráðið á Íslandi stóð fyrir sinni árlegu ræðukeppni fyrir framhaldsskólanema þann 19. apríl. Keppnin snýst um hver talar bestu japönskuna og sendiherrann sjálfur velur þann keppanda sem honum hugnast best og var það nemi úr MH sem varð þess heiðurs aðnjótandi. En svo er það óháð dómnefnd sem velur þá sem hún telur standa sig best. Nemendur FÁ stóðu sig með sóma eins og sannkallaðir samuræjar og komu sigri hrósandi með verðlaun úr keppninni.

Matthías Enok Þórarinsson fékk fyrstu verðlaun, Fríða Theodórsdóttir fékk önnur og Elvar Freyr Elvarsson vann vinsældaverðlaunin.

Það þarf ekki að nefna það hve svona ræðukeppni er hvetjandi fyrir nemendur.
FÁ óskar verðlaunahöfum til hamingju með glæsilegan árangur.

Vinnustofa um fjármálalæsi með ungu fólki

Mon, 22 Apr 2013 00:00:00 +0000

Stýrihópur mennta- og menningarmálaráðuneytisins og Samtök fjármálafyrirtækja stóðu fyrir vinnustofu í liðinni viku um eflingu fjármálafræðslu barna og ungmenna með nemendum úr Fjölbrautaskólanum við Ármúla, Menntaskólanum við Sund og Hagaskóla en þessir nemendur taka allir þátt í tilraunakennslu í fjármálalæsi . Nemendurnir svöruðu m.a. spurningum um álit sitt á fjármálalæsi jafnaldra sinna. Athygli vakti að niðurstöðurnar voru nokkuð afgerandi því flestir töldu að almennt þekkingarleysi væri á fjármálum meðal yngri kynslóða og það megi m.a. rekja til lítillar fræðslu. Þá töldu grunnskólanemendurnir sem tóku þátt í vinnustofunni ofneyslu vera helstu rót peningavandamála jafnaldra þeirra en framhaldsskólanemarnir töldu hins vegar tekju- og atvinnuleysi ásamt of mikilli neyslu á kostnað sparnaðar vera helsta vandann

Go Go Góða ferð norður, Lukas!

Thu, 18 Apr 2013 00:00:00 +0000

Undankeppni Söngvakeppni framhaldsskólanna verður haldin í Íþróttahöllinni á Akureyri í kvöld, föstudaginn 19, og ef hann Lukas okkar nær að trylla lýðinn mun hann komast í tólf manna úrtak og þá verður hægt að sjá hann í beinni á RÚV á laugardagskvöld.
Við óskum Lukasi góðrar ferðar og hvort sem hann vinnur eða vinnur ekki þessa keppni þá hefur hann að minnsta kosti unnið hjörtu okkar allra í FÁ. Sjá hér um söngvakeppni:
http://https:/www.facebook.com/pages/S%C3%B6ngkeppni-framhaldssk%C3%B3lanna-2013/153678374798260

Lukas, may the Force be with you! Gangi þér allt í haginn, sonny!

Í DAG er JAFNRÉTTISDAGUR FÁ

Tue, 16 Apr 2013 00:00:00 +0000

Af því tilefni er boðað til dagskrár sem lítur svona út:

Kl. 11:10-12:00. Klámbann á Netinu!

Kappræður Pírata og Vinstri grænna um upplýsingaaðgengi á Netinu, jafnrétti kynjanna, kynferðisofbeldi og afstöðu flokkanna til annarra mála. Haldið í fyrirlestrarsalnum

Kl. 12:20-12:50. Á mannamáli.

Þórdís Elva Þorvaldsdóttir ræðir um kynferðisofbeldi í íslensku samfélagi. Hverjir verða fyrir slíku ofbeldi? Hversu algengt er það? Af hverju eru dómarnir ekki þyngri en raun ber vitni? Umræður og fyrirlestur í stofu A101/102.

Sjónvarpsþáttur verður til. Í hádeginu miðvikudag og fimmtudag

Mon, 15 Apr 2013 00:00:00 +0000

Nemendur Bíó213- áfangans bjóða skólafélögum sínum að koma og sjá hvernig alvöru sjónvarpsþáttur verður til. Þetta er gamansamur þáttur, svona "sit-com" eins og fagmennirnir segja og fjallar um misheppnaða smákrimma einhvers staðar í Reykjavík. Þættirnir eru alfarið hugarsmíð nemenda í Bíó213, þeir hafa skrifað handritið að þessum tveimur þáttum, þeir leika í þeim, setja upp leikmyndina og enn aðrir taka upp, framleiða og klippa til útsendingar í Sjónvarpi FÁ og á Youtube.
Bíó213-nemendur vilja endilega sjá sem flesta í fyrirlestrarsalnum, bæði nemendur og starfsfólk. Það er bæði skemmtileg og fróðlegt að vera viðstaddur upptökur á þáttunum og fylgjast með því hvernig sjónvarpsupptökur fara fram. Og það má bóka að ekki þarf að notast við neinn dósahlátur ef nógu margir mæta til að horfa á herlegheitin.

Þessi skemmtun verður í hádeginu núna á miðviku- og fimmtudag og fer fram í fyrirlestrarsalnum. Þetta verður upplifelsi! Vel á minnst, þetta er þáttur um misheppnaða smákrimma, eru til einhverjir heppnaðir krimmar? Að minnsta kosti ekki delinn sem gerði sér lítið fyrir í gær og stal skjávarpa úr einni skólastofunni!

Sumaráfangi – útivist og umhverfismál

Tue, 9 Apr 2013 10:00:00 +0000

Fjölbrautaskólinn við Ármúla í samvinnu við Umhverfisstofnun skipuleggur tveggja eininga áfanga í Skaftafell 2.-9. júní í sumar. Fimm daga verður unnið við göngustígagerð og síðan verður tveggja daga gönguferð í í stórbrotinni náttúru Skaftafells. Ferðin er metin til eininga á íþróttalínu (ÍÞG142).

Þetta er áhugaverður áfangi fyrir þá sem hafa gaman af útiveru og eru tilbúnir til að leggja á sig fimm daga vinnu til verndar gróðri og náttúru. Enginn kostnaður er fyrir þátttakendur annar en að þurfa að koma sér sjálfir á staðinn.
Kynningarfundur verður miðvikudag 10. apríl kl. 12.35 í fyrirlestrasal. René Biasone, sérfræðingur hjá Umhverfisstofnun flytur erindi og svarar spurningum.
Fyrispurnir má einnig senda til helmut@fa.is og ulfar@fa.is .

Dagskrá umhverfisviku 8.-11. apríl 2013

Fri, 5 Apr 2013 14:37:00 +0000

Næsta vika verður undirlögð umhverfismálum, að ógleymdu nýja drykkjarmálinu. Þeir nemendur sem sækja viðburði kl. 11.10 á mán., þri. og fim. í næstu viku fá leyfi í kennslustundum.

Þegar nemendur hafa keypt umhverfismálin (1700 sem er kostnaðarverð) kostar kaffið í þau 100 kr. Þeir sem neyðast til þess að kaupa einnota mál í mötuneyti þurfa að borga 200 kr fyrir þau, auk þeirra 100 kr sem kaffið kostar. Munið að koma með alvörupeninga til að nota á ávaxtamarkaðnum á þriðjudag og á miðvikudag til að kaupa margnota kaffimálin.

Svona lítur dagskráin út:

Mánudagur kl. 9.05    Hver er afstaða flokkanna til umhverfismála? Framsókn og Sjálfstæðisflokkur í fyrirlestrarsal
Mánudagur kl. 10   Setning umhverfisviku á steypunni
Mánudagur kl. 11.10   Páll Jakob Líndal, doktorsnemi í umhverfissálfræði – Ég verð að hlaða batteríin. Myndband og umræður um hvaða áhrif umhverfið hefur á líðan okkar - Fyrirlestrarsalur

Þriðjudagur kl. 10   Ávaxtamarkaður í Hnetulundi – koma með reiðufé
Þriðjudagur kl. 10.15   Hver er afstaða flokkanna til umhverfismála? – Samfylking og flokkur heimilanna í fyrirlestrarsal
Þriðjudagur kl. 11.10   Tínum rusl með Jóni Gnarr – Hittast á steypu, tína á skólalóðinni

Miðvikudagur kl. 10   Umhverfismál – okkar mál. Sala margnota drykkjarmála hefst í Hnetulundi (reiðufé) og á skrifstofu (greiðslukort)
Miðvikudagur kl. 11.10   Hver er afstaða flokkanna til umhverfismála? – Björt framtíð og listi regnbogans í fyrirlestrarsal

Fimmtudagur kl. 10   Fatamarkaður – komið með föt að heiman – notaðar og nýjar flíkur til sölu. Ágóði rennur í gerð vatnsbrunna í Malaví eða Mósambik.
Fimmtudagur kl. 11.10   To the Arctic – Myndband um hlýnun norðurpólsins - Fyrirlestrarsalur
Fimmtudagur kl. 12.35   Hver er afstaða flokkanna til umhverfismála? Lýðræðisvaktin og Dögun í fyrirlestrarsal

Vorið er komið - Lokaspretturinn eftir

Mon, 1 Apr 2013 00:00:00 +0000

Það verður gaman að mæta aftur í skólann á miðvikudaginn og nú ríður á að hnýta alla lausa enda, klára öll verkefnin sem setið hafa á hakanum, stoppa í göt þekkingarinnar og undirbúa sig undir prófin sem eru svo óskaplega skammt undan. Nú ættu líka flestir nemendur að vera búnir að velja fyrir haustönnina og sumir eru það vel settir að þeir geta alveg leyft sér að mæta á kynningarfund Ungra umhverfissinna sem haldinn verður í Hinu húsinu nú á fimmtudaginn klukkan 20:00. Þar geta áhugasamir umhverfissinnar á aldrinum 15-30 stillt saman strengi sína í hinni eilífu baráttu fyrir betri og vistvænni veröld. Eins og Sveinbjörn Egilsson yrkir árið 1851:

Skörugleg er skepnan öll
af skaparanum gjörð.
Eða veiztu nokkurt vænna tröll,
en vora móður, Jörð?

Dagur íhugunar - Föstudagurinn langi

Fri, 29 Mar 2013 00:00:00 +0000

Föstudagurinn langi er mesti sorgardagur ársins. Föstudagurinn langi er dagur íhugunar, þá er vert að dvelja við það sem vel er gert og það sem betur má fara. Umhverfismál eru brýnustu mál samtímans. Við lifum á óvissutímum því brugðið getur til beggja vona. Ef allir leggja sitt af mörkum við að bæta umgengnina við náttúruna, leggja sitt litla pund á vogarskálina, verður framtíðin björt og blóm í haga og kýrnar leika við kvurn sinn fingur.
Það er ekki að ósekju að einkunnarorð Fjölbrautaskólans skulu vera þessi: Umhverfismál - okkar mál.

Gleðilega páska

Sun, 24 Mar 2013 00:00:00 +0000

Nú ríkir kyrrð í kennslustofum og á göngum skólans. Það er komið páskafrí. Kennsla hefst ekki aftur fyrr en miðvikudaginn 3. apríl. Njótum því kyrrðar og friðar þessa góðu daga og komum endurnærð til starfa eftir gott og langt frí.

H2O - Vatnsdagurinn er í dag

Fri, 22 Mar 2013 00:00:00 +0000

Sameinuðu þjóðirnar hafa ákveðið að nota alþjóðlegan dag vatnsins, 22. mars, til að vekja athygli á skorti á vatni í heiminum.
Hvað er hollara en vatn? Næst loftinu er það okkur lífsnauðsynlegast og víst er að enginn lifir lengi án þess. Munið að drekka nóg af þessu - og farið vel með vatnið.
Kannski finnst okkur sem búum hér á landinu blauta að ekki þurfi að umgangast vatnið af virðingu - en munum að ekki eru allar þjóðir eins lánssamar og við.
Fáum okkur glas og gleðjumst yfir góða vatninu okkar - sem ekki skortir!

Einhver með áhuga á fjölmiðlum eða tölvuleikjum?

Wed, 20 Mar 2013 00:00:00 +0000

Það verður kynning á steypunni í hádeginu í dag, 21. mars, á háskóla í Norður – Þrændalögum þar sem meðal annars er hægt að velja BA-nám í bæði fjölmiðlabraut og tölvuleikjahönnunarbraut, en hvorugt er í boði á háskólastigi á Íslandi. Þeir sem reka háskólann eru að leita að áhugasömum nemendum frá Íslandi til að stunda þar nám næsta haust (eða næstu ár) og af þeim sökum er ætlunin að kynna möguleikana sem nemendum standa í boði í þessum háskóla.

Þeir sem vilja kynna sér þessa kosti ættu að skoða auglýsinguna frá skólanum sem finna má á upplýsingatöflunni á Steypunni og svo auðvitað mæta á kynninguna í hádeginu.

Vorjafndægur

Tue, 19 Mar 2013 00:00:00 +0000

Í dag eru vorjafndægur. Það þýðir að nótt er jöfn degi. En á morgun fagnar ljósið sigri yfir myrkrinu. Lux in tenebris lucet.
Í dag, 20. mars rís sólin klukkan 07:28 og sest klukkan 19:44

Sjörnufræðiútskýring hér.
Þess má geta að í dag er í fyrsta sinn haldinn Alþjóðlegi hamingjudagurinn að frumkvæði Sameinuðu þjóðanna og er mælst til þess að þá hugsi allir menn um hamingju sína og annarra.

Vonandi eru flestir í FÁ hamingjusamir, við skulum óska þess að svo sé.
"Lífshamingjan felst í göfgi hugsana þinna," sagði rómverski keisarinn og heimspekingurinn Markús Árelíus (AD121-180). Hann bauð okkur ennfremur að vera ekki að dreyma um það að eignast allt sem maður á ekki, heldur njóta þess sem maður hefur og minnast þess hve mjög mann lengdi eftir öllu því sem maður á ef maður ætti það ekki.

Sá á kvölina sem á völina

Tue, 19 Mar 2013 00:00:00 +0000

Munið miðvikudagsnámskeiðið kl. 12.15 - 12.45 í stofu N101
Hvaða áfanga ætlarðu að velja? En kjörsvið eða námsbraut? Hafðu framtíðina í huga -ekki velja bara eitthvað, veldu rétt -

Og nú eiga allir að velja - það er opið fyrir valið í INNU -

Bráðum kemur betri tíð fyrir kaffifíkla

Mon, 18 Mar 2013 00:00:00 +0000

Eftir páska býðst öllum kaffisvelgjum að kaupa svona kaffimál eins og á myndinni, á krónur 1700, falleg handhæg mál sem fara vel í vasa eða tösku, og engin hætta á að spilla niður kaffinu því málið er með loki.

Takið vel eftir: Kaffið á að kosta 100 kr í margnota málin sem er sýnu ódýrara en að kaupa kaffið í þessum óvistvænu plastbikurum sem nú eru notaðir.

Það á eftir að margborga sig að nota margnota mál, það verður aldrei margoft sagt því fyrstu vikuna eftir að góðu málin verða tekin í notkun mun kaffi í einnota mál kosta 150 krónur. Næstu viku þar á eftir heilar 200 krónur og þriðju og síðustu viku kennslu verður það á 250 krónur og málin væntanlega þar með úr sögunni…? Og mál til komið!

Veraldarvinir

Thu, 14 Mar 2013 00:00:00 +0000

Í dag 14. mars komu nokkrir erlendir sjálfboðaliðar á vegum samtakanna Veraldarvina (Worldwide friends) í heimsókn í skólann. Fjölluðu þeir um umhverfismál í UMH103 og LKN103 og kynntu verkefnið „Eco-messenger“. Fóru þeir með nemendur í umhverfisleiki með boðskapinn kaupum minna, mengum minna, spörum vatn og orku og síðast en ekki síst hugum að flokkun úrgangs, að leiðarljósi. Sjálfboðaliðarnir eru ungt fólk m.a. frá S-Kóreu, Japan, Þýskalandi, Grikklandi, Ítalíu, Frakklandi og Bandaríkjunum. Árlega koma um 1500 sjálfboðaliðar á vegum samtakanna hingað til lands. Nánar á http://www.wf.is/

Frískir kennaranemar

Tue, 12 Mar 2013 00:00:00 +0000

Frá september hafa kennaranemar úr HÍ verið í skólanum. Þeir eru búnir að fylgjast með kennslu, aðstoða við kennslu og æfa sig að kenna undir leiðsögn leiðsagnakennara. Á þessari önn voru sjö kennarar með nema í leiðsögn:
Bryndís Valsdóttir, Hólmfríður Bára Bjarnadóttir, Inga Lúthersdóttir , Þórður Sigurðsson, Hannes Ísberg Ólafsson, Petra Bragadóttir og Kristen Mary Swenson sem er einnig verkefnisstjóri.

Á myndinni má sjá hinn föngulega hóp kennaranema sem vonandi eiga eftir að lækka meðalaldur framhaldsskólakennara.

Talið frá vinstri eru þau Guðríður, Þórunn Rakel, Cornelius, Agnes, Lilja, Pétur, Anna Rún, Linda Björk og Kristen verkefnastjóri. Á myndina vantar þá Egil og Eyjólf.