Vikupistill skólameistara (2010/10)
Ræðukeppnir
Í febrúar var haldin ræðukeppni ungmenna á aldrinum 16-20 ára sem fram fór á enskri tungu. Í framhaldi af keppninni var Snæfríði Grímsdóttir nemanda í FÁ boðið á sumarnámskeið í Bandaríkjunum. Við óskum henni til hamingju.
Sendiráð Japans, í samvinnu við Menntaskólann við Hamrahlíð og Fjölbrautaskólann við Ármúla, stendur fyrir ræðukeppni á japönsku fyrir framhaldsskólanema. Keppnin hefst 13. apríl kl. 08:10 í Miklagarði, Menntaskólanum við Hamrahlíð. Við óskum nemendum okkar sem taka þátt í keppninni góðs gengis.
Ungir frumkvöðlar í FÁ
Nemendur í markaðsfræði í FÁ taka þátt í fyrirtækjasmiðjunni „Ungir frumkvöðlar“. Markmið þessa verkefnis er að læra gerð viðskiptaáætlana, markaðssetningu og kynnast því hvernig hægt er að taka þátt í atvinnulífinu. FÁ-ingar kynntu verkefni sín í Smáralind um helgina. Sóttvarnarvökvinn seldist vel og fékk það verkefni verðlaun fyrir kynningarbás. Úrslit keppninnar munu liggja fyrir í lok apríl.
Dagskrá umhverfisviku FÁ
Mánudagurinn 12. apríl
· Umhverfisfulltrúi kynnir umhverfisviku á sal í kl.10
· Kaffihlé > Hafragrautur
· Fatamarkaður – ágóði rennur til Mæðrastyrksnefndar
· Enjo kynnir vörur sínar (vistvænar hreinlætisvörur – m.a. örtrefjaklútar)
· Yggdrasill kynnir vörur sínar
Þriðjudagurinn 13. apríl
· Enjo kynnir vörur sínar
· Framhald á fatamarkaði
· UMH103, með kynningarbás um endurvinnslu
· Kaffihlé > Hafragrautur
· Hádegi > Stomp, Trommarinn úr hljómsveitinni Hraun mun halda uppi léttum leik þar sem útbúin eru hljóðfæri úr allskyns sorpi.
· Niðurskornir ávextir, grænmeti, döðlur, rúsínur og fleira í boði hússins
Miðvikudagurinn 14. apríl
· Enjo kynnir vörur sínar
· Kaffihlé > Hafragrautur
· Hádegi > Bingó í betri stofunni
· Boozt drykkir í boði umhverfisráðs – (lífræn jógúrt og ávextir blandað saman í drykk).
Jafnréttisdagur
Föstudaginn 16. apríl er jafnréttisdagur í FÁ með tilheyrandi bleiku þema í klæðnaði og áherslu á jafnréttisumræðu í kennslustundum þar sem því verður komið við. Dagskrá verður auglýst nánar síðar.
Úttekt á fjarkennslu
Mennta- og menníngarmálaráðuneytið hefur ráðið sérfræðinga til að gera úttekt á fjarkennslu á framhaldsskólastigi. Úttektin mun m.a. byggja á fyrirliggjandi gögnum, viðtölum við stjórnendur, ásamt stuttum könnunum meðal nemenda og kennara. Einnig munu
rannsakendur óska eftir að fá að skoða ákveðinn fjölda námskeiða í WebCT/Blackboard.
Eftirfarandi samantekt er byggð á drögum að sögu skólans eftir Eirík Brynjólfsson frá vorönn 1984.
Fyrstu ár Ármúlaskóla - fjölbrautaskólans við Ármúla
Upphafið
Haustið 1979 tók til starfa nýr framhaldsskóli við Ármúla í Reykjavík. Segja má að þetta hafi verið bein afleiðing af fjölgun nemenda á framhaldsskólastigi.
Með þessu var ein stofnun mynduð úr mörgum. Framhaldsdeildir Lindargötuskóla runnu skeið sitt á enda og sömuleiðis framhaldsdeildir Laugalækjarskóla. Þessar tvær stofnanir voru sameinaðar í hinum nýja skóla. Í Ármúlaskóla hafði áður verið til húsa 9. bekkur grunnskóla. Nokkrir kennarar þess skóla urðu kennarar við hinn nýja skóla.
Þannig má með nokkrum sanni segja að Fjölbrautaskólinn við Ármúla (FÁ) sé stofnaður með sameiningu þriggja skóla.
Nýi skólinn, Ármúlaskóli, starfaði fyrstu árin í nánum tengslum við Fjölbrautaskólann í Breiðholti (FB) og var jafnvel haft að orði að um útibú frá FB væri að ræða. Stúdentar voru til að mynda fyrstu árin útskrifaðir með stimpli FB og deildarstjórar FB áttu ð stjórna kennurum Ármúlaskóla.
Fljótlega tók að brydda á því að slíkt samstarf væri með öllu óviðunandi og raunar óframkvæmanlegt. Eftir skólastjóra Ármúlaskóla er haft í fundargerðarbók haustið 1979: „Við semjum okkar áætlanir og veljum okkur kennsluefni án samráðs við Fjölbrautaskólann í Breiðholti.“ Þannig má segja að samráðið hafi verið meira í orði en á borði.
Eina hindrunin í vegi þess að um stofnun sjálfstæðs fjölbrautaskóla gæti orðið að ræða í Ármúla var kostnaðarskipting milli ríkis og Reykjavíkurborgar. Einnig þurfti lagaheimild frá Alþingi.
Haustönn 1979
Haustið 1979 voru kennarar við hinn nýja skóla 39. Stærstur hluti þeirra hafði áður kennt við Lindargötuskóla og Laugalækjaskóla. Að auki störfuðu þar nokkrir kennarar sem áður höfðu kennt við grunnskólann í Ármúla. Fjórir nýir kennarar voru ráðnir við skólann.
Skráðir nemendur voru 600 en nokkru færri luku prófum. Nemendur skiptust í deildir sem hér segir:
Heilsugæslusvið 1. önn 73
Uppeldissvið 1. önn 31
Viðskiptasvið 1. önn 116
Á öðru ári 141
Í þriðja bekk 136
Í fjórða bekk 40
Fornám og hægferðir 103
Eins og sjá má af þessari upptalningu eru bæði bekkjarkerfi og áfangakerfi í gangi í einu. Aðeins þrír fyrstu hóparnir eru í raunverulegu fjölbrautanámi. Þrír næstu hópar eru efstu bekkir úr Lindargötuskóla og Laugalækjarskóla. Sjöunda hópinn fylltu þeir sem ekki höfðu fullnægjandi undirbúning að baki til að mega hefja reglulegt nám í framhaldsskóla.
Kennsla á þessari fyrst önn hófst mánudaginn 10. september. Önninni lauk með prófum sem stóðu frá 3. til 14. desember. Um 80 próf voru lögð fyrir í ýmsum námsgreinum.
Þegar ný stofnun tekur til starfa í húsnæði sem byggt er undir aðra starfsemi, þótt skyld sé, fer ekki hjá því að ýmsu þurfi að breyta. Húsið hafði upphaflega verið byggt fyrir Gagnfræðaskóla verknáms og bar þess merki. Í húsinu voru til að mynda vel útbúnar stofur til verknámskennslu, fyrir trésmíðar, járnsmíðar og sauma. Ekki var þörf fyrir allar þessar sérstofur í fjölbrautaskólanum þar ekki var gert ráð fyrir mikilli verklegri kennslu. Það má því teljast táknrænt að ein fyrsta breytingin sem ráðist var í á húsinu var að breyta einni smíðastofu í bókasafn.
Vorönn 1980
Nýir nemendur á vorönn 1980 voru 50 talsins og skiptust þeir jafnt á viðskipta- og uppeldissvið. Að auki hófu nokkrir nemendur frá öðrum framhaldsskólum nám við skólann. Nokkrir nemendur luku námi frá skólanum. Voru það aðallega nemendur sem luku almennu verslunarprófi eftir tveggja ára nám og einnig 64 stúdentar.
Á vorönn 1980 var saminn og gefinn út námsvísir fyrir skólann. Önnina á undan var starfað eftir námsvísi FB. Í þessum fyrst námsvísi FÁ var að finna allar upplýsingar um skólann, s.s. lýsingar á brautum og áföngum sem skólinn bauð upp á og þær reglur sem skólinn setur nemendum sínum.
Áður höfðu tveir slíkir námsvísar verið til í landinu. Annars vegar frá FB, sem áður var nefnt, hins vegar frá þrístirninu svokallaða, þ.e. fjölbrautaskólunum á Suðurnesjum, Akranesi og í Flensborg. Námsvísir FÁ var saminn með hliðsjón af hinum tveimur en var í veigamiklum atriðum frábrugðinn. Kennarar skólans unnu við að semja námsvísinn og var hann prentaður og afhentur nemendum í apríl 1980.
Með þessu var skólinn orðinn að sjálfstæðri stofnun í reynd þótt enn um sinn starfaði hann undir handarjaðri FB. Meðal annars voru nemendur FÁ enn þá útskrifaðir frá FB. Þann 16. maí 1980 dró síðan til tíðinda því alþingi samþykkti lög sem heimiluðu ríkisstjórninni að reka tvo fjölbrautaskóla í Reykjavík. Annar þeirra var að sjálfsögðu FB, hinn yrði líklega FÁ.
En ekki er sopið kálið þótt í ausuna sé komið og skólanum lauk um vorið án þess að frekari tíðindi bærust af réttindamálum hans.
Haustönn 1980
Skólinn hófst að nýju um haustið á þess að nokkuð gerðist í réttindamálum hans. Lögin frá vorinu áður voru enn þá bókstafur án nokkurs lífs. Skólinn var því eftir sem áður að nafninu til í tengslum við FB þótt hann starfaði í reynd sem sjálfstæður skóli.
Sjö nýir kennarar réðust til skólans og tveir komu úr leyfi.
Nemendum fjölgaði töluvert frá vorönn og voru skráðir nemendur við skólann 687. Af um 80 nýnemum var um helmingur á viðskiptasviði. Nemendur skiptumst svo eftir sviðum:
Heilbrigðissvið 176
Uppeldissvið 144
Viðskiptasvið 301
Fjórði bekkur 66
Á þessari önn hófst útgáfa Leiðarans en það var fréttablað skólastjórnar. Þar birtust ýmsar tilkynningar, s.s. próftöflur o.fl..
Vorönn 1981
Kennsla hófst miðvikudaginn 14. janúar að lokinni venjulegri undirbúningsvinnu kennara. Sú vinna fólst meðal annars í því að semja bókalista og námsáætlanir auk ýmiss konar skýrslugerðar sem er hvorttveggja í senn tafsöm og nauðsynleg.
Á þessum tíma fór þó að rofa til fyrir nýjum tímum því skólinn tók tölvu í þjónustu sína. Stundaskrár voru til að mynda í fyrsta sinn unnar í tölvu enda annað varla vinnandi vegur því hver nemandi fékk sína eigin stundaskrá og engar tvær eru eins. Alls þurfti því að búa til milli 600 og 800 stundatöflur.
Um 100 nýnemar bættust við skólann að þessu sinni og voru 660 nemendur á vorönn 1981.
Á kennarafundi þann 21. janúar var samþykkt tillaga nokkurra kennara þess efnis að gera tilraun með frjálsa mætingu nemenda. Tilraunin var gerð á þann veg að í nokkrum áföngum var mæting gefin frjáls. Kennarar í þessum áföngum buðust sjálfir til starfans. Reynt var að hafa hópana ólíka innbyrðis og nemendum var í sjálfsvald sett hvort þeir mættu. Þó var fylgst með mætingu í þessum hópum til að unnt væri að fá samanburð við aðra hópa.
Tilgangurinn var sá að fá úr því skorið hvort nemendur mættu verr ef þeir væru frjálsir um mætingu. En eins og allir vita þá er mæting nemenda oft til umræðu og hinar ólíkustu mætingarreglur hafa verið reyndar en fæstar dugað til lengdar. Tilraun þessi gaf engar óyggjandi niðurstöður og ekkert framhald var á slíku.
Hvorki gekk né rak með stofnun sjálfstæðs skóla og 4. febrúar 2081 samþykkti kennarafundur eftirfarandi tillögu: „Kennarafundur haldinn í Ármúlaskóla 4. febrúar 1981 skorar á fræðsluráð Reykjavíkur að ganga sem fyrst endanlega frá stofnun Fjölbrautaskólans við Ármúla og gera hann að sjálfstæðum skóla.“ Undir þessa áskorun skrifuðu 35 starfsmenn skólans og eru fimm þeirra enn starfandi við skólann á vorönn 2010, Ásdís Ásmundsdóttir, Bogi Ingimarson, Elín Vilhelmsdóttir, Helmut Hinrichsen og Kristján Thorlacius. Hvort sem þessari ályktun er fyrir að þakka eða ekki þá samþykkti borgarstjórn Reykjavíkur í byrjun apríl að Ármúlaskóli yrði gerður að sjálfstæðum fjölbrautaskóla frá og með hausti 1981.
Var þar með náð þeim áfanga sem alltaf hafði verið stefnt að. Enda var það nú varla orðið annað en formsatriði þar eð þá þegar voru studentar útskrifaðir frá skólanum en ekki FB eins og var í fyrstu og skólinn starfaði að öllu leyti sem um sjálfstæða stofnun væri að ræða.
Lengd kennslustunda var mikið til umræðu á þessari önn. Hver kennslustund var 40 mínútur en vegna töflugerðar urðu tímar ávallt samliggjandi þannig að í raun varð hver kennslustund 80 mínútur. Þessi lengd kennslustundar þótti óhentug og tímar ekki nýtast sem skyldi.
Lögð var fram tillaga um nýtt tímakerfi. Það fólst í því að hver kennslustund yrði 60 mínútur alla daga nema miðvikudaga en þá skyldu kennslustundir vera 40 mínútur. Tillagan gerði ráð fyrri því að mínútufjöldi í hverjum áfanga yrði jafn og áður. Sex tíma áfangi (þ.e. 6x40 mínútur) yrði samkvæmt þessu kenndur 4 klukkustundir á viku en fjögurra stunda áfangar (4x40 mínútur) yrðu kenndir í tveimur 60 mínútna kennslustundum og einni 40 mínútna kennslustund. Vegna þessa síðarnefnda var nauðsynlegt að hafa 40 mínútna kennslustundir einn dag í viku, miðvikudag.
Eftir nokkrar umræður var ákveðið að gera tilraun með þetta næsta vetur. Þess má síðan geta að svo líkaði nemendum og kennurum þetta fyrirkomulag að það festist í sessi í mörg ár.
Haustönn 1981
Þann 7. september árið 1981 gerðu Reykjavíkurborg og Menntamálaráðuneytið gerðu með sér svohljóðandi samning um stofnun nýs fjölbrautaskóla í Reykjavík:
Samningur um stofnun fjölbrautaskóla við Ármúla
Reykjavíkurborg og Menntamálaráðuneytið gera með sér svohljóðandi samning um stofnun nýs fjölbrautaskóla í Reykjavík.
1. gr.
Með vísan til ákvæða laga nr. 14/1973 um heimild til að stofna fjölbrautaskóla sbr. lög nr. 21/1977 og lög nr. 40/1980 um breytingar á þeim lögum, samþykkja báðir aðilar að settur skuli á fót nýr sjálfstæður fjölbrautaskóli í Reykjavík.
2. gr.
Nafn skólans er Ármúlaskóli og hefur hann aðsetur í skólahúsi við Ármúla, þar sem rekinn hefur verið framhaldsskóli, nú síðast deildir frá Fjölbrautaskólanum í Breiðholti.
3. gr.
Ármúlaskóli skal leitast við að gefa nemendum kost á fjölbreyttu samvali námsgreina, er myndi námsbrautir á eftirfarandi námssviðum:
· Almennt bóknámssvið.
· Heilbrigðissvið.
· Uppeldissvið.
· Viðskiptasvið.
Skal fjöldi námsbrauta nánar ákveðinn með árlegri starfsáætlun samþykktri af rekstraraðilum og breytt með tilliti til nemendafjölda og annarra aðstæðna svo og með hliðsjón af eðlilegri verkaskiptingu milli framhaldsskóla í Reykjavík.
4. gr.
Skólinn skal vera hluti af skólakerfi Reykjavíkurborgar, undir stjórn fræðsluráðs og yfirstjórn menntamálaráðuneytisins á sama hátt og Fjölbrautaskólinn í Breiðholti og skulu ákvæði samnings milli borgar og ríkis frá 27. febrúar 1976, um fjármála- og framkvæmdastjórn Fjölbrautaskólans í Breiðholti, gilda um stjórnun Ármúlaskóla. Skólastjóri, kennarar og aðrir uppeldislegir starfsmenn hans skulu skipaðir eða settir af menntamálaráðuneytinu að fengnum tillögum fræðsluráðs. Annað starfsfólk skal ráðið með sama hætti og tíðkast við aðra skóla á vegum Reykjavíkurborgar.
5. gr.
1. Stofnkostnaður
Aðilar eru sammála um að uppgjör stofnkostnaðar núverandi húsnæðis skólans fari eftir reglum væntanlegra laga um framhaldsskóla varðandi nýbyggingar slíkra skóla.
Sú innstæða sem borgarsjóður þannig kann að eignast við mismun á upphaflegri kostnaðarskiptingu við byggingu Ármúlaskólans annars vegar og miðað við kostnaðarskiptingarreglur nýrra laga hins vegar greiðist með þeim hætti, að ríkissjóður skuldbindur sig til þess að kosta einn, utan við kostnaðarskiptingarreglur samsvarandi fermetrafjölda í næstu byggingarframkvæmdum við Ármúlaskóla eða Fjölbrautaskólans í Breiðholti, skv. nánara samkomulagi aðila.
Um tækjakaup og nýframkvæmdir sem fram kynnu að fara fyrir setningu nýrra laga, fer eftir sömu reglum og gilda um stofnkostnað Fjölbrautaskólans í Breiðholti.
2. Kennsluskostnaður
Laun skólastjóra og kennslulaun öll greiðir ríkissjóður, enda hafi menntamálaráðuneytið árlega samþykkt kennslu- og starfsáætlun skólans.
3. Annar kostnaður
Allan annan rekstrarkostnað greiðir ríkissjóður að hálfu og rekstraraðili að hálfu í samræmi við fjárhagsáætlun sem fræðsluráð og menntamálaráðuneytið samþykkja, þ.á.m. kostnað við náms- og starfsráðgjöf, sálfræðiþjónustu, bóka- og tækjavörslu, stjórnun og skrifstofustörf, heilbrigðisþjónustu, ljós, hita, ræstingu og viðhald húsa og tækja, undirbúning starfseminnar og þjálfun starfsliðs.
6. gr.
Menntamálaráðuneytið setur skólanum námskrá að fengnum tillögum fræðsluráðs. Heimilt er í reglugerð að kveða á um kennslu- og námsskipan skólans, kennslmagn, námsmat, námsstig nemenda og réttindi til frekara náms. Leita skal tillagna fræðsluráðs áður en slík reglugerð er gefuin út.
7. gr
Samkomulag þetta skal endurskoðað, þegar breytingar verða á skólaskipan eða reglum um skiptingu skólakostnaðar milli ríkis og sveitarfélaga á þeim skólastigum sem skólinn tekur til.
Reykjavík, 7. september 1981
F.h. Menntamálaráðuneytisins F.h borgarsjóðs Reykjavíkur
Ingvar Gíslason/Birgir Thorlacius Egill Skúli Ingibergsson
Frá og með hausti 1981 var Ármúlaskóli orðinn sjálfstæður fjölbrautaskóli. Nemendur voru um 700 og 51 kennari starfaði við skólann.
Ýmsar lagfæringar höfðu verið gerðar á húsnæði skólans, m.a. bætt vinnuaðstaða kennara. Undirbúningur hófst einnig fyrir tölvukennslu.
Námsframboð hafði einnig aukist talsvert með nýjum brautum og námsgreinum. Haustið 1981 var boðið upp á nám á þessum brautum:
Bóknámssvið
Málabraut
Náttúrufræðibraut
Samfélagsbraut
Viðskiptasvið
Tveggja ára braut, almennt verslunarpróf
Fjögurra ára braut, stúdentspróf
Heilsugæslusvið
Tveggja ára braut, bóklegt nám sjúkraliða
Fjögurra ára braut, stúdentspróf
Uppeldissvið
Tveggja ára nám
Fjögurra ára braut, stúdentspróf
Íþróttabraut
Tveggja ára nám
Fjögura ára braut, stúdentspróf
Vorönn 1982
Á vorönn 1982 voru 770 nemendur skráðir við skólann og höfðu aldrei áður verið jafnmargir.
Það var helst til tíðinda að stofnunin fékk loks yfirráð yfir öllu húsinu. Iðnskólinn hafði fram að þessu haft fimm kennslustofur á leigu fyrir framhaldsdeildir járnsmíða. Ú hvarf þessi deild annað og bættust þessa fimm stofur því við Ármúlaskóla og veitti svo sannarlega ekki af. Með þessu urðu kennslustofur alls 27.
Við þetta vannst tvennt. Í fyrsta lagi var hægt að haga tímum þannig að kennslu lyki fyrr á daginn. Í öðru lagi var loks hægt að innrétta sérstakar kennslustofur fyrir kennslu í íffræði, efnafræði og eðlisfræði en þessar greinar krefjast sérútbúinna kennslustofa.
Próf fóru að venju fram fyrri hluta desember. Til gamans má geta þess að um 5000 eintök prófa voru framleidd í ýmsum greinum. Ef reiknað er með að próf séu að meðaltali 3 blaðsíður þá hafa blaðsíðurnar samtals verið 15.000.
Vorönn 1983
Árdagar voru haldnir í fyrsta sinn á þessari önn og hófust þeir 24. febrúar.
Haustönn 1983
Skráðir nemendur haustannar 1983 voru um 820. Lagfæringar voru gerðar á lóð skólans um sumarið, m.a. á baklóðinni. Innandyra var afram unnið við að innrétta stofur fyrir raungreinakennslu.
Vorönn 1984
Skráðir nemendur voru 710, þar af 240 búsettir utan Reykjavíkur.
Hér lýkur þessari frásögn Eiríks Brynjólfssonar.
Gísli