Sjálfsmatsskýrsla
Fyrsta sjálfsmatsskýrsla var gerð fyrir skólaárið 2001/2002 og önnur skýrsla árið 2004. Frá árinu 2008 hafa sjálfsmatsskýrslur verið gerðar á hverju skólaári og eru þær aðgengilegar á sjálfsmatssíðunni (hér til hliðar).
Kennslumat hefur verið framkvæmt frá 1999 og eru niðurstöður síðustu kannana aðgengilegar nemendum skólans og öðrum á heimasíðu skólans.
Við kennslumatið er hugbúnaðurinn SPlist notaður. Hýsing er utan skólans og uppfyllir hugbúnaðurinn allar kröfur um nafnaleynd. Vefþjónustur tengja hugbúnaðinn við staðarnet skólans (dagskólann) og kennsluumhverfið WebCT (fjarnám).
Kennarar fá ítarlegar niðurstöður kennslumats í greinum sínum. Kennslustjórar fá niðurstöður kennslumats í þeim greinum sem tilheyra braut þeirra og yfirstjórn skólans fær yfirlit yfir niðurstöður í öllum greinum. Skýrsla með samantekt á niðurstöðum kennslumats er svo birt á heimasíðu skólans.
Starfsánægjumat hefur tvisvar verið framkvæmt, á haustönn 2006 og svo aftur á haustönn 2008. Utanaðkomandi aðili, HRM - Rannsóknir og ráðgjöf, var fenginn til að framkvæma matið. HRM - Rannsóknir og ráðgjöf hefur framkvæmt fjölda vinnustaðagreininga frá árinu 2004 með mælitæki evrópsku starfsánægjuvísitölunnar.
Niðurstöður starfsánægjumats eru aðgengilegar á heimasíðu skólans.
Á haustönn 2006 var einnig framkvæmd viðamikil könnun fjármálaráðuneytisins, Stofnunar stjórnsýslufræða og stjórnmála við Háskóla Íslands og ParX – viðskiptaráðgjafar IBM á starfsumhverfi ríkisstarfsmanna. Þátttakan var frekar dræm enda starfsmenn nýbúnir að svara annarri könnun svipaðs efnis. Heildarniðurstöður eru á heimasíðu menntamálaráðuneytis. Skólinn fékk samantekt á niðurstöðum könnunarinnar og voru þær í takt við niðurstöður starfsánægjumatsins.
Stýrihópur tók til starfa á vorönn 2008 með því markmiði að búa til könnun á þjónustu skólans, sem sameinaði mat á aðstöðu bókasafns, námsráðgjöf, tölvuaðstöðu, könnun á samskiptum nemenda við stjórnendur, námsráðgjafa, skrifstofu, fjármáladeild og þjónustu matsölunnar. Könnunin var lögð fyrir nemendur á haustönn 2008 og eru niðurstöður hennar aðgengilegar á heimasíðu skólans.