Skóli á grænni grein

Umhverfismál við FÁ

Umhverfissáttmáli FÁ

Skólar eru hornsteinar hvers samfélags. Ungir hugir eru þar mótaðir til framtíðar og kapp lagt á að miðla til nemenda þeim gildum sem samfélagið vill að séu ríkjandi á hverjum tíma. Því er mikilvægt að skólar landsins sinni umhverfismálum af alúð og einlægni. Fjölbrautaskólinn við Ármúla tekur það hlutverk sitt alvarlega og vill sýna nemendum og öðrum sem að skólastarfinu koma, gott fordæmi við rekstur og stjórnun skólans. Skólinn mun hafa umhverfissjónarmið og verndun náttúrunnar að leiðarljósi jafnt í daglegum athöfnum og í stefnumótun til framtíðar. Vinna innan skólans mun taka tillit til sjálfbærrar þróunar þegar því verður við komið.

Samgöngustefna FÁ

Í umhverfisstefnu skólans er annars vegar lögð áhersla á vistvæna starfshætti og hins vegar þróun gildismats og viðhorfs nemenda og starfsmanna í átt að aukinni náttúruvernd. Til að stuðla að lífsstíl í samræmi við hið síðarnefnda hefur skólinn sett sér samgöngustefnu. Markmið skólans er að auka vitund nemenda og starfsmanna um þau áhrif sem samgöngumáti þeirra hefur á umhverfið og heilsuna í samræmi við markmið heilsueflandi framhaldsskóla. Skólinn mun standa að fræðslu og kynningum á ýmsum heppilegum valkostum sem lúta að umhverfisvænum samgöngumáta.

Grænfáninn

Frá árinu 2005 hefur skólinn verið skráður í Grænfánaverkefnið sem Landvernd sér um á Íslandi. Í september 2006 tók Fjölbrautaskólinn við Ármúla við Grænfánanum, fyrstur íslenskra framhaldsskóla. Hér má lesa um Grænfánaverkefnið.

Skrefin sjö sem skólar þurfa að taka til að hljóta Grænfána eru:

• Umhverfisnefnd starfar innan skólans
• Staða umhverfismála í skólanum metin
• Áætlun gerð um aðgerðir og markmið til umhverfisbóta í skólanum
• Sinn er stöðugu eftirliti og endurmati á umhverfismálum í skólanum
• Nemendur fræddir um umhverfismál
• Skólinn kynnir stefnu sína út á við og fær aðra með
• Skólinn setur sér formlega umhverfisstefnu

Helstu umhverfisaðgerðir sem skólinn hefur framkvæmt

Frá því skólinn var skráður í Grænfánaverkefnið hefur mörgum þeirra markmiða sem hann setti sér verið náð.

• Nú þegar hefur verið hafist handa við flokkun sorps. Gámur frá Gámakó fyrir gæðapappír og pappa hefur verið staðsettur við vestanvert húsið og endurvinnslukössum fyrir gæðapappír hefur verið dreift á vinnuherbergi kennara, kennslustofur, skrifstofur og í ljósritunarherbergi.
• Flöskum og dósum er komið til endurvinnslu en það eru útskriftarnemendur sem hljóta ágóðann af skilagjaldinu og sjá um söfnun.

• Rafhlöðum er nú fargað á viðurkenndan hátt með aðstoð Efnamóttökunnar.
• Notkun hreinsiefna hefur verið minnkuð við ræstingar með því að nota örtrefjaklúta og fara sparlega með. Einnig eru eingöngu notuð umhverfisvottaðir hreingerningalegir.
• Endurvinnsla á tímaritum og dagblöðum er hafin. Tunnu hefur verið komið fyrir í matsal nemenda sem tæmd er eftir þörfum.
• Vatnshönum hefur verið komið fyrir í sal hjá nemendum og báðum kennsluálmum, til að stuðla að aukinni vatnsdrykkju og um leið minni neyslu gosdrykkja/ávaxtasafa/kaffis. Betri heilsa og minna sorp vegna drykkjaríláta.
• Þegar perur eru endurnýjaðar eru keyptar sparperur.
• Umhverfisfræðslutafla hefur verið hengd upp í stigagangi í miðálmu. Þar er margvíslegum upplýsingum um umhverfismál komið á framfæri til nemenda.
• Umhverfisfræðslutöflu hefur einnig verið komið fyrir á kennastofu.
• Boðið er uppá umhverfisfræðsluáfanga UMH103 á vor og haustmisseri og er hann vel sóttur.
• Starfrækt er umhverfisnefnd nemenda sem og umhverfisnefnd alls skólans þar sem nemendur eiga fulltrúa.
• Sorptunnum hefur verið komið fyrir við aðstöðu nemenda við austanvert húsið.
• Áróðursskilti hafa verið hengd upp þar sem nemendur eru hvattir til að nota stubbahús undir sígarettustubba og þar sem bent er á að bíll í lausagangi mengar.
• Þegar ljósritunarvél var endurnýjuð á árinu var umhverfisvottuð vél keypt, en hún notar minni orku, er hljóðlátari og minna af mengandi gufum berast frá henni í andrúmsloftið.
• Haldið er uppá umhverfisdaginn. Árið 2007 var "uppistandari", fenginn til að skemmta nemendum og kennurum, auk þess sem lífrænt ræktaðar vörur voru kynntar og heilsudrykkir seldir á vægu verði.
• Nemendur í umhverfisnefnd sjá reglulega um sölu á heilsudrykkjum (boost drykkir) í matarhléi.
• Boðið er uppá íþróttaáfangann Hjólað í skólann sem gefur eina einingu og þannig stuðlað að góðri heilsu nemenda um leið og mengun af völdum samgangna er minnkuð. Þörf á bílastæðum minnkar um leið og fleiri koma hjólandi og gangandi.
• Hollustusjálfssala sem selur eingöngu vörur framleiddar með aðferðum lífrænnar ræktunar hefur verið komið fyrir í matsal nemenda.
• Samgöngustefna hefur verið tekin upp til að hvetja nemendur og starfsfólk til að skilja einkabílinn eftir heima og koma gangandi, á hjóli, samferða öðrum eða með strætó í skólann.
• Endurvinnsla á plasti og málmi hófst haustið 2010.
• Nemendum býðst að fá sér hafragraut í boði skólans alla morgna frá 8 - 10.

Umhverfisnefnd

Umhverfisnefnd FÁ hefur verið starfrækt frá vordögum 2005 ásamt sérstöku Umhverfisráði nemenda sem tók til starfa í september 2005.

 

Í Umhverfisnefnd FÁ eiga sæti:

• Skólameistari
• Umhverfisfulltrúi skólans sem jafnframt er formaður nefndarinnar
• Matráðskona
• Ræstingastjóri
• Umsjónarmaður
• Fjórir kennarar af bóknámsbrautum
• Kennari frá starfsdeild
• Kennari frá heilbrigðisskóla
• Fulltrúi nemanda

 

Umhverfisráð nemenda - UMR114

Veturinn 20010 - 20011 eru það eftirfarandi nemendur

Jóhann Hirst formaður, Katrín, Eva Björg, Anna María, Tinna, Ólöf, Marteinn og Andri.   Nemendur í umhverfisráði nemenda fara í eitt ferðalag á vetri og gista jafnvel eina nótt auk þess sem haldinn er matarfundur á "grænu veitingahúsi".  Ferðin er hugsuð sem vinnuferð. Fundir eru haldnir vikulega.  

Starfssvið umhverfisráðs nemenda

Umhverfisráð nemenda skal hittast vikulega utan stundatöflu. Markmið funda: Ræða mögulegar úrbætur í umhverfismálum skólans m.t.t. markmiða sem skólinn hefur sett sér í samræmi við vinnuaðferðir Grænfánans.

Nemendur sjálfir vita best hvernig hægt er að ná til annarra nemenda og hvetja þá til bættrar umgengni við náttúruna. Þannig mun umhverfisráð nemenda leggja höfuðið í bleyti og leitast við að að finna færar leiðir til að fræða samnemendur sína um hin ýmsu svið umhverfismála. Hægt er að gera það á marga vegu t.d.

• Tala reglulega við nemendur í sal
• Ganga í stofur
• Útbúa veggspjöld
• Skrifa fréttir á vef FÁ
• Sjá um umhverfisfræðslutöflu í sal nemenda.
• Allt sem ráðinu dettur í hug sem miðlar að fræðslu umhverfismála
• Sjá um hollustusjálfsalann sem selur vörur frá Yggdrasil og Manni lifandi
• Sjá um merkingar á endurvinnslutunnum
• Sjá um  umhverfisviku í apríl og aðra viðburði sem tengjast umhverfismálum
• Vera með framlag á Árdögum

Hugmyndir sem koma fram hjá umhverfisráði nemenda vera kynntar á Umhverfisnefnd FÁ . Formaður umhverfisnefndar situr fundi umhverfisnefndar FÁ.

Umhverfisráð nemenda starfar sjálfstætt þó umhverfisfulltrúi FÁ hafi yfirumsjón með ráðinu og mæti á einstaka fundi.

 

Tenglar

Umhverfisstofnun.

Landvernd

Vistvernd í verki.

Staðardagskrá 21 á Íslandi

Náttúran. Öflugur fræðsluvefur um umhverfismál.

Umhverfis- og samgöngusvið Reykjavíkurborgar

 

 

• Tweet