Hvað eru áhugasviðskannanir?
Áhugasviðskannanir segja til um hvernig áhugasvið fólks liggur en það gefur vísbendingar um á hvaða starfssviði og í hvaða starfi þér mun líka vel að vinna.
Áhugasviðskannanir eru verkfæri sem auðvelda val á námi, námsbraut, starfi og áhugamálum en þær gefa ekki endanlegt svar. Þegar niðurstöðurnar koma, tekur við töluverð vinna við að kanna störf og nám sem kemur til greina fyrir þig. Einnig þarf oft að fara í sjálfskönnun eins og að skoða eigið gildismat, styrkleika, reynslu o.fl.
Áhugasviðskannanir gefa upplýsingar um áhuga en ekki hæfileika eða getu.
Nemendum dagsskólans gefst kostur á að taka áhugasviðskannanir hjá náms- og starfsráðgjöfum.
Nokkrar gerðir áhugasviðskannanna eru til á íslensku. Nemendur greiða útlagðan kostnað vegna þeirra. Þeir geta óskað eftir ákveðinni könnun en náms- og starfsráðgjafi metur þó endanlega hvaða könnun er heppilegust og hver ekki.
Áhugasviðskannanir:
Í LEIT AÐ STARFI: Þetta er áhugasviðskönnun sem er um leið vinnubók og leiðir þig áfram með aðstoð náms- og starfsráðgjafa, í þeirri vinnu sem þarf við náms- og starfsval.
BENDILL: Þetta er ný íslensk áhugasviðskönnun sem svarað er rafrænt hjá náms- og starfsráðgjafa. Niðurstöður koma strax fram og á rafrænu formi.
ÁHUGASVIÐSKÖNNUN STRONG: Þetta er stærsta og ýtarlegast áhugasviðskönnunin sem völ er á í heiminum. Niðurstöður eru mjög ýtarlegar og þú færð heilmiklar upplýsingar til að moða úr. Það tekur 30 – 45 mín að svara og niðurstöður koma eftir 3 – 5 daga.