Góðir gestir, samstarfsmenn, ágætu útskriftarnemendur.

Kennsla nú á vorönn hófst 7. janúar. Nemendur dagskólans sem skráðir eru til prófs nú í maí eru 983.

Nemendur skráðir í fjarnám eru 2060 fyrir utan nemendur sem eru jafnframt í dagskóla.

Starfsmenn nú á vorönn eru 118, þar af eru kennarar 84, aðrir starfsmenn 34.

Skólastarf vorannar hefur að mestu verið með hefðbundnu sniði. Ekki fer þó hjá því að umrót í samfélaginu hafi töluverð áhrif. Gríðarleg aðsókn að skólanum einkum fjarnámi veldur vaxandi vinnuálagi á starfsmenn skólans og vil ég þakka þeim öllum fyrir elju og dugnað. Árdagar og umhverfisvika settu mark sitt á skólann. Samstarfið við forystu nemendaráðs mjög ánægjulegt og fá þau bestu þakkir skólans. Erlent samstarf hefur verið með mesta móti það sem af er á þessu ári og vil ég greina nokkuð ítarlega frá því.

Heilbrigðisskólinn á aðild að Leonardo-mannaskiptaverkefni, tveir danskir sjúkraliðanemar komu í heimsókn. og tveir nemendur frá skólanum fara á þessu ári í 4 til 5 vikna starfsþjálfun til Danmerkur á vegum verkefnisins.

Einn kennari og 9 nemendur fóru á ráðstefnu „til Berlínar í byrjun ársins. 7 starfsmenn fara í næstu viku til Finnlands til að kynna sér stjórnsýslu við fjarnám.

Skólinn hefur tekið þátt í þrem Comenius-verkefnum á þessu ári. Verkefni er á vegum starfsbrautar skólans, Verkefni sem enskukennarar stýra. Samstarfslönd eru Austurríki, Frakkland, Pólland og Þýskaland.

Fjarnámsverkefni sem sex lönd taka þátt í, Grikkland, Pólland, Portúgal, Ungverjaland, Þýskaland og Ísland, og stýrir skólinn verkefninu.

Skólinn á aðild að þremur verkefnum sem eru styrkt úr þróunarsjóði EFTA. Er hér að ræða um mannaskiptaverkefni við tvo skóla í Slóvakíu svo og samstarf við skóla í Póllandi. Þróunarsjóður EFTA var stofnaður þegar EES samningurinn var endurnýjaður árið 2004, í framhaldi af því að 10 ný aðildarlönd gengu í Evrópusambandið. Þessi 10 lönd eru: Eistland, Lettland, Litháen, Pólland, Tékkland, Slóvakía, Ungverjaland, Slóvenía, Kýpur og Malta. Þróunarsjóðurinn veitir styrki til þessa landa auk Spánar, Portúgals og Grikklands. Frá 29. mars 2007 geta Búlgaría og Rúmenía einnig sótt um í sjóðinn. Skólinn fær engan styrk úr sjóðnum, en nýtur góðs af styrknum þessara landa í ferðir kennara og nemenda skólans til samstarfslandanna. Verkefni sem nefnist orka, efnafræði og samfélag með skóla í Slóvakíu. Kennarar og nemendur koma til Íslands í janúar – mars 2010, kennarar og nemendur skólans heimsækja Slóvakíu í apríl – júní 2010.

Annað verkefni í samstarfi við skóla í Slóvakíu, 2 kennarar og 4 nemendur frá Slóvakíu heimsóttu skólann nú í apríl. 2 kennarar og 4 nemendur frá Íslandi fara til Slóvakíu í janúar – mars 2010.

Samstarfsverkefni við skóla í Póllandi.er í burðarliðnum.

Á haustönn 2008 hófst Nordplus-verkefnið „Learning by sharing“, samstarfsverkefni við skóla í Finnlandi, Eistlandi, Lettlandi og Litháen. Fyrsti fundur var haldinn hér á landi í apríl 2009. Skólinn hefur einnig sótt um þátttöku í Nordplus verkefninu Mononet. Verkefnið er hluti af fullorðinsfræðslu Nordplus.

Aðrar heimsóknir: Frá Frakklandi komu 2 kennarar og 7 nemendur. Frá Noregi komu 7 íþróttakennarar, annar hópur frá Noregi 11 kennarar.

Hvernig er þetta allt svo fjármagnað er eðlileg spurning. Það er einfalt þetta er gjaldeyrisskapandi starfssemi, við erum að koma með mjög mikið erlent fjármagn til landsins. Þetta eru allt styrkir frá stofnunum Evrópusambandsins

Í dag útskrifast frá skólanum 144 nemendur þar af 6 af tveim brautum og einn af þrem brautum. Af heilbrigðissviði útskrifast 46 nemendur þeir skiptast svo eftir brautum. Heilbrigðisritarar eru 3, tanntæknar eru 6, heilsunuddarar eru 19, læknaritarar eru 4, lyfjatæknar einn nemandi, sjúkraliðar eru 13, og úr framhaldsnámi sjúkraliða 1. Frá starfsbraut útskrifast fimm nemendur, Frá viðskiptabraut útskrifast 1 nemandi. Stúdentar eru 93, þeir skiptast svo eftir brautum: af félagsfræðibraut 42, af málabraut 11, af náttúrufræðibraut 19, viðskipta og hagfræðibraut 10 og viðbótarnám til stúdentsprófs eru 13.

Í Bókinni um veginn eftir Lao-Tse segir svo: „Höllin ljómar af skrauti, en akrarnir eru vanhirtir og hlöðurnar tómar“. Tilvitnun líkur.

Við stöndum nú frammi fyrir því, að sumar af meginstoðum okkar samfélags hafa brugðist trausti og það kallar á endurskoðun á þeim aðferðum, sem við beitum við uppbyggingu og rekstur samfélagsins, greiningu okkar á staðreyndum, kenningum og áætlunum fyrir það þjóðfélag, sem börn og barnabörn okkar munu byggja.

Ég tel að við eigum að styrkja menntakerfið, þar er framtíðin. Styrkja skólanna, vinnustaði yngstu kynslóðanna. Styrkja vísindin, sem er aðferð til að leita sannleikans.

Aðferðir vísindanna gera okkur kleift að greina á milli þeirra kenninga sem standast próf reynslunnar og hinna sem gera það ekki. Hin vísindalega aðferð leyfir okkur að greina á milli staðreynda, sem ekki þarf að deila um og ályktana sem geta verið álitamál. Gagnrýnin hugsun vísindanna krefst þess að málefni séu skoðuð á gagnrýnan hátt, en ekki að þeir einstaklingar séu gagnrýndir, sem standa öðru hvoru megin málsins.

Vísindin hika ekki við að skoða og gagnrýna hvað sem er og í slíkri endurskoðun felst ekki vantraust á þá, sem hafa sett fram kenningar og fullyrðingar.

Oft er það svo talsmenn einstakra sjónarmiða verða aðalatriðið og skotspónn andstæðinga og umræðan snýst um menn en ekki málefni.

Gildi vísinda fyrir íslenskt samfélag getur verið margvíslegt. Þau dýpka þekkingargrunn okkar, skilning á okkur sjálfum, náttúru landsins og menningu þjóðarinnar og þau geta líka verið grundvöllur framfara í efnahagsmálum.

Fyrir nokkrum dögum las ég smásögu eftir Fyodor Dostoyevsky sem heitir Kókódíllinn einstakur atburður, kom fyrst út árið1865. Sagan lýsir því vel hvernig hægt er að verða samdauna umhverfinu.

Ivan Matveitch fór dag einn ásamt vinum sínum að skoða krókódíll sem var nýlega til sýnis í borginni. Ivan var góður og gegn embættismaður og mátti ekki vamm sitt vita. Þegar á staðinn var komið vildi svo til að krókódíllinn gleypti Ivan. Strax voru uppi ráðagerðir um að skera gat á belg skrímslisins og freista þess að bjarga lífi Ivans. Heyrist þá rödd Ivans innan úr krókódílnum. „nei, nei alls ekki gera það, mér líður ekkert illa og eigandi dýrsins gæti heimtað skaðabætur“. „Ivan ertu ekki svangur og þyrstur þarna svona innilokaður“, spurðu nærstaddir. „Alls ekki ég er umlukinn mjúkum vafningum en þaðan fæ ég allt sem ég þarf“, sagði Ivan. Nokkru síðar eru uppi bollaleggingar þeirra sem gættu kókódillsins að hann væri svangur og það yrði að gefa honum að borða, annars færi hann bara að melta vesalings Ivan. Heyrist þá Ivan segja innan úr krókódílnum. „Nei það er alveg óþarfi, hann er ekki svangur, hann hefur jú mig“.

Kæru útskriftarnemar, Reynsla okkar af ykkur er að þið séuð ólíkleg til að sætta ykkur við vondar kringumstæður þið eruð einstaklingar sem umbreytið og skapið betri kringumstæður.

Ykkar bíða nýir tímar og margvísleg ögrandi verkefni.

Við erum viss um að þau verða skemmtileg, krefjandi verkefni eru það yfirleitt.

Bestu óskir um farsæld á nýjum brautum.

Til hamingju með áfangann.