Vikupistill

30. janúar 2012

Fjarnám

Rúmlega 1400 nemendur hafa greitt námsgjöld í fjarnámi á vorönn 2012. Fjarnámsstjóri gerir ráð fyrir að fjarnámsnemar verði um 1460 þegar öll kurl eru komin til grafar.

Haustið 2009 fyrirskipaði menntamálaráðuneytið okkur að fækka fjarnámsnemum. Í bréfi ráðuneytisins var tekið sérstaklega fram að frá 1. janúar 2010 yrði ekki lengur greitt fyrir grunnskólanema. Við urðum að hlýða þessum skipunum og fækkaði fjarnemum mikið á árunum 2010 og 2011. Grunnskólanemar fengu ekki lengur ókeypis fjarnám, við drógum úr auglýsingum og hækkuðum námsgjöld.

Nú er tímabært að undirbúa sóknaráætlun fyrir fjarnám skólans. Alþingi ályktaði síðastliðið vor um að grunnskólanemar skuli eiga kost á að stunda framhaldsskólanám frá og með hausti 2012. Ef ráðuneytið ákveður í ljósi þessarar ályktunar að hefja aftur greiðslu fyrir grunnskólanema í fjarnámi munum við endurnýja samstarf okkar við fjölda grunnskólana.

Hagstofutölur

Hagstofa Ísland birti sl. föstudag nýjar tölur um nemendur í framhaldsskólum landsins. Tölurnar miða við 15. október ár hvert. FÁ er með næstflesta nemendur íslenskra framhaldsskóla þar sem Tækniskólinn fer fram úr okkur í fyrsta sinn í 7 ár. Tafla hér að neðan sýnir fjölda nemenda í nokkrum framhaldsskólum síðustu 10 árin. Í töflunni eru aðeins sýndir stærstu skólarnir.

Tölur Hagstofunnar um fjölda nemenda í nokkrum framhaldsskólum 15. október ár hvert

	2002	2003	2004	2005	2006	2007	2008	2009	2010	2011
Framhaldsskólastig: Samtals	21764	23120	24220	25093	26958	28340	29271	29698	27351	29.389
Fjölbrautaskólinn við Ármúla	1679	1771	2114	2261	2488	2643	2914	3077	2624	2.585
Tækniskólinn	1975	2232	2074	2113	2209	2349	2651	3015	2506	2.647
Verkmenntaskólinn á Akureyri	1667	1762	1812	1864	1973	2055	2066	1806	1695	1.756
Verslunarskóli Íslands	1051	1072	1126	1392	1874	1997	2048	2111	1523	1.758
Fjölbrautaskólinn í Breiðholti	2028	2063	1975	2059	2071	1980	2122	2155	1885	2.189
Borgarholtsskóli	1040	1185	1232	1351	1421	1511	1511	1431	1435	1.522
Menntaskólinn í Kópavogi	1128	1244	1324	1352	1486	1436	1563	1491	1286	1.323
Menntaskólinn við Hamrahlíð	1428	1428	1526	1452	1438	1406	1397	1502	1514	1.414
Fjölbrautaskóli Suðurnesja	962	1092	1010	1199	1240	1298	1330	1309	1183	1.257
Fjölbrautaskóli Suðurlands	816	858	940	948	988	1044	1042	1040	988	1.010

Fundir í vikunni

Fundur umhverfisnefndar verður haldinn þriðjudaginn 31. janúar kl. 15.30-16.30. Þrjár vikur eru síðan nýja úrgangsflokkunarkerfið var tekið í gagnið og umhverfisnefndin mun ræða hvernig til hefur tekist. Bryndís Valsdóttir umhverfisfulltrúi biður þá sem hafa tillögur varðandi flokkunar- og umgengnismálin að koma þeim til sín fyrir kl. 15 á morgun.

Skólaráðsfundur verður haldinn miðvikudaginn 1. febrúar kl. 14.35.

Kennarafundur verður haldinn föstudaginn 3. febrúar kl. 13.15. Á fundinum verður fjallað um fjarkennslukerfið „Moodle“ sem mun leysa Blackboard/WebCT af hólmi. Við stefnum að því að nota Moodle á næstu sumarönn.

Gísli