Fyrirkomulag náms og kennslu

Kennslufyrirkomulag í Moodle (kennsla fer ekki fram í INNU).

• Á upphafsdegi annar, 9. júní, fá nemendur send SMS með notendaupplýsingum að námsumhverfi Moodle frá þjónustuveri skólans.
• Vinsamlega athugið: netfang sem nemandi fær frá skólanum er vinnunetfang nemenda á önninni. Allar uppýsingar tengt náminu eru sendar á það netfang.
• Fjarnám FÁ er sjálfsnám á netinu, í námsumhverfinu Moodle, við notum ekki INNU. Það eru ekki kennslustundir í rauntíma en nemandi hefur aðgang að kennara áfangans í Moodle. Það er mikilvægt fyrir nemanda að fylgja yfirferð námsefnis, lesa og skrá hjá sér allar upplýsingar sem kennari setur fram, fylgja tímaramma kennslunnar, leysa/skila inn verkefnum og þreyta hlutapróf á önninni. Hvert einkunnarstig skiptir máli í lokaeinkunn.
• Ef nemandi þarf að fá svör við spurningum er hægt að senda fyrirspurn til kennara inn í Moodle og ber kennara að svara innan tveggja sólarhringa. Moodle er lokað námsumhverfi og eiga samskipti á milli nemenda og kennara fjarnámsins að fara fram innan þess. 
• Inn í hverjum áfanga eru upplýsingar um markmið áfanga og áætlaða yfirferð í kennsluáætlun. Einnig eru upplýsingar um námsefni, ítarefni og námsmat.
• Námsmat í áfanga er fjölbreytt og er mismunandi eftir áföngum sem og vægi þess. Í lok annar eru skrifleg lokapróf, í húsnæði FÁ. Nemendur geta óskað eftir að taka próf utan FÁ en verða að hafa samband við skrifstofuna í tíma (fjarnam@fa.is).  Nemandi þarf að ná lágmarkseinkunn 4,5 í lokaprófi til að standast áfanga. Ef nemandi fellur á lokaprófi eru próf og verkefni annarinnar ekki reiknuð til lokaeinkunnar.
• Sjálfsagi er mikilvægur í fjarnámi enda er fjarnám FÁ sjálfsnám. Skipulag og virkni skiptir miklu máli. Hér eru góðir punktar frá námsráðgjöfum skólans til að styðjast almennt við í námi. Námsráðgjafi fjarnámsins heitir Hrönn Baldursdóttir, sjá upplýsingar hér.
• Sveigjanleiki er einkunnarorð fjarnáms FÁ. Námið er að öllu jöfnu sett upp með föstum skiladagsetningum verkefna og prófa. Þar af leiðandi er sveigjanleikinn ekki sjálfgefinn og nemanda ber að óska fyrirfram eftir sveigjanleika ef hann getur ekki staðið við tímasetningar sem kennari setur fram.
• Í lok annar er einkunn í lokaprófi birt í Moodle sem og lokaeinkunn í áfanga. Lokaeinkunn í áfanga er síðan uppfærð í INNU. Inna geymir alla námsferla nemenda á framhaldsskólastigi. 

Námsefni

• Bókalista má nálgast á heimasíðunni t.d. með því að skoða áfangalýsingar fjarnámsins. Í sumum tilvikum er námsefni inn í Moodle sem og ítarefni.
• Helstu bókaverslanir í Reykjavík selja þær bækur sem notaðar eru í kennslunni og er hægt að panta þær hjá þeim ef nemendur búa úti á landi. Reynt er að tryggja nægilegt magn bóka. Hafðu samband við kennara ef þú lendir í vandæðum með að útvega námsgögn.

Námsmat í áfanga

• Eins og áður segir þarf nemandi að ná lágmarkseinkunn 4,5 á lokaprófi, áður en einkunnir fyrir próf og/eða verkefni sem unnin eru á önninni eru reiknaðar inn í lokaeinkunn. Þetta þýðir að einkunnir í prófum og verkefnum sem unnin eru á önninni geta hækkað lokaeinkunn upp í lágmark í áfanganum hafi nemandi náð 4,5 á lokaprófi. Þetta getur einnig þýtt að ef einkunnir fyrir próf og verkefni sem unnin eru á önninni eru slakar getur það orðið til þess að nemandi stenst ekki áfanga, jafnvel þó hann hafi náð lokaprófi með 4,5. Hér þarf að huga að vægi námsþátta í áfanga, þ.e.a.s. vægi lokaprófs annars vegar og vægi prófa/verkefna sem unnin eru á önninni hins vegar.

Lokapróf og sjúkrapróf

• Nemendur eiga rétt á einu prófi; lokaprófi eða sjúkraprófi. Nemandi sem tekur lokapróf á ekki rétt á sjúkraprófi þó hann falli á lokaprófi. Sjúkrapróf eru eingöngu fyrir þá sem forfallast á lokaprófsdegi, fyrir þá sem eru með árekstur í próftöflu eða þá sem þurfa að færa til próf vegna aðstæðna. 
• Nemandi á rétt á að endurtaka eitt próf sem hann fellur í ef viðkomandi er skráður útskriftarnemandi í FÁ eða í öðrum framhaldsskólum landsins á önninni.