Tanntæknabraut

Um nám á tanntæknabraut

Tilgangur náms á tanntæknabraut er að búa nemendur undir fjölbreytt, fagleg störf í tannheilbrigðisgeiranum. Meðal annars aðstoða á tannlæknastofu af fagmennsku með velferð þjónustuþega og starfsfólks að leiðarljósi. Tanntækni er 204 eininga nám með námslok á 3. hæfniþrepi og skiptist í almennar greinar, heilbrigðisgreinar og verklegar sérgreinar.

Nemendur þurfa að geta nýtt sér þekkingu sína til að skipuleggja móttöku, símsvörun og skráningu á sjúkraskrám. Undirbúa tannlæknastofu fyrir aðgerðir, vinna fjórhent, sótthreinsa, dauðhreinsa og ganga frá. Þekkja áhöld og efni sem notuð eru á tannlæknastofum, taka röntgenmyndir, taka alginat mát og fræða um munn- og tannhirðu ásamt því að tileinka sér góða samskiptafærni og siðferðisvitund. Nemendur þurfa að geta unnið sjálfstætt og kunna að forgangsraða

Inntökuskilyrði

Til að geta stundað nám á brautinni þarf að hafa lokið grunnskóla með tilskildum lágmarksárangri. Nemendur þurfa að hafa náð 18 ára aldri þegar þeir hefja verknám tanntækna.  Tólf nemendur eru teknir inn á hverju hausti og ljúka þeir námi með útskrift á vorönn.

Verknám

Verklegt nám er unnið í samstarfi við Tannlæknadeild Háskóla Íslands og tekur tvær annir, ætlast er til að nemendur hafi lokið bóklegum greinum áður en verknám hefst.  Verknám stendur yfir virka daga frá 8:00 - 16:10.  Allraf tekið inn að hausti.

Hæfnikröfur tanntækna:

Sér um smitvarnir á tannlæknastofum

Sér um sótthreinsun/dauðhreinsun á áhöldum og búnaði á tannlæknastofum

Býr yfir góðri samskiptafærni, sýnir siðferðisvitund og gætir þagmælsku í störfum sínum

Undirbýr tannlæknastofur, aðstoðar tannlækna m.a. með „fjögurra handa tannlækningum“ og gengur frá að loknum vinnudegi

Sér um að taka til áhöld og efni sem nota þarf

Undirbýr, tekur röntgenmyndir og skannar

Pússar og lakkar tennur með flúor og tekur þátt í að veita fræðslu/leiðbeiningar um rétta tannhirðu

Sér um móttöku, símsvörun og tímapantanir

Heldur utan um sjúkrasögu skjólstæðinga og býr þá undir meðhöndlun

Hefur góða almenna tölvukunnáttu sem nýtist í starfi ásamt því að þekkja greiðslureglur SÍ

Er fær um að vinna sjálfstætt, sýna frumkvæði og geta forgangsraðað verkefnum eftir því sem við á

Þekkir lög og reglugerðir sem starf hans heyrir undir og fylgir þeim í daglegu starfi

Vinnur eftir gæðaviðmiðum/gæðahandbók, þekkir vinnuvernd og öryggisferla á vinnustað og er fær um að veita skyndihjálp ef slys eða óhöpp ber að höndum

Er fær um að tileinka sér nýjungar í starfi og er meðvitaður um mikilvægi þess

Prentvæn útgáfa

Tanntæknabraut (pdf)

Tanntæknabraut (excel)