Erlent samstarf - fréttir

Alice enskukennari fór með 5 nemendur í skólaheimsókn til Ítalíu 2. - 8. mars. Þetta voru þau Ásthildur, Chandy Rós, Roksana Julia, Snorri Karl og Vladyslav. Þar heimsóttu þau skólann Liceo delle Scienze Umane „Vittorino da Feltre“ í Bari. Ferðalagið var sannkallað ævintýri. Nemendurnir dvöldu hjá ítölskum fjölskyldum, sem gaf þeim einstakt tækifæri til að kynnast daglegu lífi og menningu á staðnum. Í skólanum tóku þau þátt í fjölbreyttum verkefnum í ensku, sögu og ítölsku, þar sem samvinna og samskipti við ítalska nemendur voru í fyrirrúmi. Auk skólastarfsins fengu nemendurnir að kanna Taranto og nágrenni með leiðsögn heimamanna. Þar fræddust þau um sögu svæðisins og menningu á lifandi og skemmtilegan hátt. Ferðin var ekki aðeins lærdómsrík heldur líka ævintýri sem gaf nemendunum dýrmæta innsýn í nýtt skólaumhverfi og allt aðra menningu, upplifun sem þau munu án efa muna lengi.

Dagana 9.-11.mars heimsóttu ÍSAN kennararnir Hanna, Sigrún E og Sigrún G verkmenntaskólann KBS í Nordhorn í norðurhluta Þýskalands. Þetta var svokölluð starfskynning eða jobshadowing í gegnum Erasmus+. Markmiðið var að kynna sér móttöku og kennslu innflytjenda við skólann. Farið var í margar ólíkar kennslustundir og fengu þær að taka þátt í tungumáladegi sem haldinn er annað hvert ár við skólann þar sem nemendur kenna sín tungumál og kynna með öðrum hætti lönd sín. Mjög áhugavert og vonandi eitthvað sem FÁ tekur upp. Í heildina var heimsóknina sérlega vel skipulögð og lærdómsrík.

Tveir kennarar og þrír nemendur Fjölbrautaskólans við Ármúla fóru til Serres í Grikklandi í síðustu viku í tengslum við Erasmus+ verkefnið We Shape the Future. Í ferðinni fengu þátttakendur frá Íslandi, Grikklandi, Tyrklandi og Ítalíu fræðslu um gagnaukinn veruleika og með hvaða hætti er hægt að nýta tæknina í námi og kennslu. Hópurinn ferðaðist einnig um landið og skoðaði meðal annars Alistrati-hellirinn og borgina Þessalóniku. Frá Fjölbrautaskólanum við Ármúla fóru þau Andri Ingvason raungreinakennari, Bjarki Þór Jónsson tölvukennari ásamt nemendunum Ester Sól, Söru Jóhönnu og Oliwiu.

Sex nemendur úr Fjölbrautarskólanum á Ármúla tóku þátt í Erasmus+ verkefni í Brussel í Belgíu dagana 4.-10. febrúar ásamt kennurunum Ásdísi Magneu og Eddu Láru. Heimsóknin var hluti af stóru Erasmus+ verkefninu “Democracy and Freedom” sem unnið er í samstarfi við skóla frá Lannion, Frakklandi, Emden Þýskalandi og Santo Tirso Portúgal. Nemendurnir sem tóku þátt í verkefninu voru þau Ragnheiður Sóley, Jenný, Vilberg Samuel, Hekla Sóley, Nadia Ursula og Eva. Nemendur höfðu samið stefnuyfirlýsingu um framtíð ungs fólks í Evrópu sem þau kynntu fyrir nokkrum af ráðherrum Evrópusambandsins og að auki fengum við tvo fulltrúa frá Sendiráði Íslands sem hlýddu á kynningarnar.

Við fengum góða heimsókn í FÁ í gær þegar þær Cecilia Nord kennari og Maria Pettersson rektor í Falu Frigymnasium í Svíþjóð komu í heimsókn. Markmiðið með heimsóknni var að að kynna sér starfsemi heilbrigðisskólans, styrkja tengsl skólanna og kanna möguleika á samstarfi á sviði heilbrigðismenntunar. Gestirnir vonast til að unnt verði að sækja um Nordplus-verkefni á næstu mánuðum og leggja þannig grunn að áframhaldandi alþjóðlegu samstarfi.

Sex nemendur úr Fjölbrautarskólanum á Ármúla tóku þátt í Erasmus+ verkefni í Lannion í Frakklandi dagana 12.–18. nóvember ásamt kennurunum Ásdísi Magneu og Þórhalli. Heimsóknin var hluti af Erasmus+ verkefninu “Democracy and Freedom” sem unnið er í samstarfi við skóla frá Lannion, Frakklandi, Emden Þýskalandi og Santo Tirso Portúgal. Nemendum var skipt upp í sex blandaða hópa með einn fulltrúa FÁ í hverjum hóp. Markmiðið var að draga fram helstu áskoranir Evrópubúa og leggja fram kröfur um lausnir sem verða lagðir fyrir þingmenn Evrópuráðsins í byrjun febrúar. Nemendur fóru í heimsókn til Rennes, höfuðborgar Bretagne héraðsins. Þar tóku þeir þátt í ratleik, fengu ítarlega kynningu á dómshúsinu og nutu frjáls tíma í borginni áður en allir fóru saman út að borða. Einnig var eitt stærsta dagblað Frakklands, Ouest France heimsótt. Nemendahópurinn var sannkallað draumalið, jákvæð og glöð, spurðu áhugaverðra spurninga, tóku virkan þátt í verkefninu sem skilaði niðurstöðum. Þau voru okkur öllum sér og sínum til sóma og gleði. Framhaldið - næst á að hittast í Brussel í byrjun febrúar.......

Núna í vikunni erum við með gesti frá Salamanca á Spáni. Þær Yoanna, Carmen og Eva kenna á heilbrigðisbraut í I.E.S. Martínez skólanum sem er í Salamanca. Þær eru hér til að kynna sér betur starfið í skólanum og þá sérstaklega í Heilbrigðisskólanum. Við bjóðum þær velkomnar!

Fjölbrautaskólinn við Ármúla tók á móti gestum frá Ítalíu, Grikklandi og Tyrklandi í september í tengslum við Erasmus+ verkefnið We Shape the Future: Integrating AI, AR and VR in Education. Boðið var upp á fjölbreytta dagskrá og vinnustofur þar sem þátttakendur könnuðu hvernig hægt er að nýta sýndarveruleika í námi og kennslu. Nemendur, kennarar og aðrir þátttakenndur lærðu meðal annars að skapa sína eigin sýndarheima og prófuðu sýndarveruleikabúnað þar sem þau gátu flogið um sólkerfið í geimskipi. Dagskráin endaði með vel heppnaðri ferð um Gullna hringinn ásamt fræðandi leiðsögn og klassískum íslenskum flatkökum með hangikjöti.

Núna í vikunni vorum við með góða gesti í heimsókn frá Ferrentino á Ítalíu, þær Sara Colatosti og Daniela Meaglia. Þær voru í undirbúningsheimsókn að kanna hvort skólarnir okkar geti unnið saman að verkefni. Við stefnum á að hefja samstarfið næsta haust en þá koma fimm nemendur frá þeim í heimsókn til okkar. Þær Edda Lára og Jeannette tóku vel á móti þeim, funduðu, sýndu þeim skólann og svo kíktu þær í kennslustundir. Við hlökkum til frekari samstarfs með þeim Sara og Daniela.

Nú er skólastarfið komið á fullt og það þýðir að erlenda samstarfið okkar er líka hafið. Á hverju ári fáum við fullt af heimsóknum frá aðilum frá skólastofnunum víða um heim sem vilja kynna sér starfið í skólanum okkar. Þessa vikuna er hún Bàrbara Ruiz Soliva frá Maristes Valldemia í Mataró, Spáni er heimsókn. Hún kennir ensku, stærðfræði, hagfræði og nýsköpun. Nemendur hennar eru frá 12 til 16 ára. Á myndinni er hún í heimsókn í ensku hjá Alice.

Hópur nemenda frá FÁ skellti sér til Portúgal á dögunum til að taka þátt í kvikmyndahátíðinni BGreen Festival sem var haldin í Santo Tirso, skammt frá Porto dagana 3. - 7. júní. Atli Sigurjónsson kvikmyndakennari og Þórhallur Halldórsson líffræðikennari fylgdu þeim Arngrími Búra, Helenu Freyju, Heorhii, Steini og Önu á hátíðina. BGreen er hátíð fyrir ungt fólk sem leggur áherslu á umhverfismálefni og felst í því að nemendur gera stutta spotta (30-45 sek) út frá ákveðnu þema sem hátíðin leggur fram – í þetta skiptið var þemað „Smart solutions, green future“. Hundruðir skóla um allan heim sentu inn myndir og rúmlega tuttugu voru valdar, þar á meðal mynd frá okkar nemum.

Dagana 30. mars til 5. apríl sl. komu í heimsókn til okkar í Fjölbraut við Ármúla, sjúkraliðanemendur frá Tékklandi og Portúgal. Var heimsóknin þriðji og jafnframt síðasti fundur ERASMUS + verkefnis sem þessir þrír skólar hafa starfað saman að síðan undirbúningur hófst haustið 2023. Áður höfðu nemendur og kennarar frá FÁ heimsótt Trutnov í Tékklandi í janúar 2024 og svo Coimbra í Portúgal í október 2024.

Fjórir starfsmenn sérnámsbrautar tóku þátt í „job shadowing“ verkefni með tveimur kennurum í Ängelholm á Skáni í Svíþjóð á þessari önn. Þetta voru Dóra, Finnbjörn, Hlynur og Inga Maggý á sérnámsbraut. Frá Ängelholm voru það Louise og Ulrika sem komu í heimsókn til okkar 7.-9.apríl. Þær fylgdust með kennslu í öllum okkar námshópum auk þess sem þær sýndu nemendum okkar myndband sem var kveðja frá nemendum í Ängelholm.

Þrír kennarar Fjölbrautaskólans við Ármúla ferðuðust til Ítalíu á dögunum í tengslum við Erasmus+ verkefnið We Shape the Future: Integrating AI, AR and VR in Education. Um er að ræða samstarfsverkefni milli þriggja skóla sem staðsettir eru á Íslandi, Grikklandi og Tyrklandi auk aðkomu sérfræðinga frá Ítalíu sem veita leiðsögn og fræðslu. Markmið verkefnisins er að kanna með hvaða hætti sýndarveruleiki, gagnaukinn veruleiki og gervigreind getur nýst í námi og kennslu innan STEM-greina, þ.e.a.s. greina á sviði verkfræði, stærðfræði, raunvísinda og náttúruvísinda.

Dagana 26. febrúar – 5. mars tók FÁ þátt í Erasmus verkefninu Sustainable Mobility in Europe 2050). Fimm úrvalsnemendur frá skólanum tóku þátt; þau Birna Clara, Dísa María, Heorhii, Ísold og Míkah ásamt kennurunum Ásdísi og Þórhalli. Samstarfsskólarnir frá Sante Tirso í Portúgal, Lannion í Frakklandi og Emden í Þýskalandi sendu viðlíka fulltrúa.

ÍSAN kennararnir Sigrún Eiríks, Kristjana og Sigrún Gunnars fóru í mjög fræðandi og skemmtilega ferð til Belgíu í gegnum Erasmus+ þann 10.-14.mars sl. Megin tilgangur ferðarinnar var að kynna sér móttöku á innflytjendum í framhaldsskólum. Farið var í sérstakan móttökuskóla sem heitir OKAN þar sem nemendur dvelja í 1-2 ár og læra hollensku í bland við nokkur önnur fög eins og stærðfræði og frönsku en franska er annað opinbert mál Belgíu. Að honum loknum er þeim fylgt eftir í eitt ár en þá fara nemendur gjarnan í systurskóla OKAN sem er hefðbundinn framhaldsskóli. Mikið er lagt upp úr félagslega þættinum og reynt að finna íþróttir og tómstundir fyrir alla. Fundað var með ýmsum kennurum og námsráðgjöfum og ÍSAN kennarar fræddir um allt milli himins og jarðar. Þær sátu líka í ólíkum kennslustundum, fóru í göngu um Antwerpen þar sem OKAN nemendur sáu um leiðsögn og fræddu þær um borgina. Einnig fóru þær í súkkulaði verksmiðju sem er auðvitað stolt þeirra Belga og ómissandi þáttur í menningu þeirra. Vonast þær til að ferðin geti nýst til að miðla fróðleik og þekkingu Belgíu til okkar á Íslandi.

Á síðasta ári tók Fjölbrautaskólinn við Ármúla þátt í Erasmus verkefninu A Green Day í samstarfi við IES Tegueste frá Tenerife. Verkefnið byggði á samstarfi tveggja skóla þar sem markmiðið var að fræða hvorn annan um ýmis umhverfismál. FÁ hjálpaði IES Tegueste að undirbúa vinnu við umsókn um Grænfánann sem við höfum fengið afhentan í um 20 ár, fyrstir allra framhaldskóla. Í verkefninu fyrir hönd FÁ voru Andri Ingvason, Guðbjörg Eiríksdóttir og Tinna Eiríksdóttir en með þeim voru fimm nemendur sem stunda nám við skólann.

Dagana 6.-11. nóvember tók Fjölbrautarskólanum við Ármúla tók þátt í Erasmus verkefninu Second life í Lannion Frakklandi. Verkefnið er samstarfsverkefni, fjögurra skóla, en auk kennara og nemenda frá FÁ tóku þátt nemendur og kennarar frá Frakklandi, Þýskalandi og Portúgal. Þátttakendur frá FÁ voru kennararnir Þórhallur Halldórsson og Ásdís Þórðardóttir auk fimm úrvalsnemenda af Nýsköpunar- og Listabraut. Nemendur útbjuggu í sameiningu kynningu um sjálfbærni, skólann okkar og Reykjavík og útbjuggu hlut sem þau gáfu nýtt líf og kynntu. Gestgjafinn, franski skólinn Lycée Félix Le Dantec, er staðsettur í bænum Lannion er tilheyrir héraðinu Bretagne, skaga sem teygir sig út í Atlandshafið. Strandlengja Bretagne er 1200 kílómetralöng og um hana fara gríðarlega miklar siglingar og mikið náttúrulíf sem er mikilvægt fyrir vistkerfi heimsins og er viðkvæmt fyrir umhverfisslysum og loftslagsbreytingum. Farið var í vettvangsferðir um fallegar strandlengjur og skilningur nemenda dýpkaður á viðkvæmni hringrásar vistkerfisins. Auk vettvangsferða og margvíslegra vinnusmiðja þar sem unnið var þvert á þjóðerni heimsóttum við öfluga endurvinnslu sem sinnir rúmlega 200.0000 manna samfélagi. Dagskráin var almennt mjög þétt alla daga. Vinnusmiðjur, málstofur og kynningar og nemendur settu upp stutta leikþætti fyrir hvern annan. Auk alls þessa gistu nemendur á heimilum franskra nemenda og kynntust í leiðinni fjölbreyttri franskri heimilismenningu. Nemendur voru á allan hátt til sóma í framkomu og þátttöku í verkefninu.

Kennararnir Edda Ýr Þórsdóttir og Þórunn Sigurðardóttir fóru með 5 frábæra sjúkraliðanemendur til Portúgal í október. Ferðin hófst í Lissabon þar sem gist var á afar heimilislegu gistiheimili með villiköttum og páfagaukum. Eftir tvo daga í Lissabon var ferðinni heitið til Portó þar sem þær hittu sjúkraliðanemendur frá Portúgal og Tékklandi. Fengu þær mjög góðar móttökur frá kennurum og nemendum í Portúgal. Heimsóttu skólann þeirra í Penacova og fengu að sjá þeirra aðstæður við nám, meðal annars verklega hjúkrun. Nemendur voru með sýnikennslu í hvernig gott er að flytja sjúklinga úr rúmi í stól. Einnig var sýnd fjötranotkun hjá sjúklingum með órólega eða ógnandi hegðun. Nemendur Portúgal á veitinga og matreiðslusviði skólans matreiddu svo fyrir hópinn fínasta mat 😊 Einnig var endurhæfingarsjúkrahús upp í sveit 30 mín frá Portó heimsótt en ekki var hægt að sjá starfsemina í fullu fjöri þar sem sólarhringana á undan höfðu verið miklar rigningar sem ollu leka og vanda í húsnæði sjúkrahúsins þannig fáir skjólstæðingar gátu mætt þann daginn. Þó fengu þær að sjá aðstöðu sjúkraþjálfara og hápunktur þessarar heimsóknar var þátttaka og kennsla í hjólastólahandbolta undir handleiðslu sjúkraþjálfara og landliðsmanni í hjólastólahandbolta sem Portúgalir eru framarlega í. Heimsókn á eitt stærsta sjúkrahús Evrópu var svo síðasta daginn þar sem heimsóttar voru tvær geðdeildir sem var afar áhugavert. Nemendur okkar ásamt nemendum frá Tékklandi og Portúgal voru svo með kynningar á hlutverki sjúkraliða í lyfjagjöfum og vökvagjöf sjúklinga. Frábær ferð í alla staði!

Í byrjun árs 2022 fengum við í FÁ þrjá góða gesti frá Tékklandi. Þau komu frá skóla sem heitir því þjála nafni: Vyšší oborná škola zdravotnická, Střední zdravotnická škola a Obchodní akademie, Trutnov. Eftir heimsókn þeirra var ákveðið að sækja um Erasmus+ verkefni, sem var samþykkt. Verkefnið heitir Comparing Differences in Healthcare in Europe. Nýlega fóru tveir kennarar og fimm nemendur í heimsókn til Portúgal vegna verkefnisins. Núna í október fóru Kristrún aðstoðarskólameistari ásamt Eddu Láru umsjónarmanni erlendra samskipta að heimsækja tékkneska skólann, með langa nafninu. Það var tekið vel á móti þeim og íslenski fáninn blakti fyrir ofan aðalinnganginn. Í skólanum er stór heilbrigðisbraut alveg eins og hér í FÁ. Nýjasti partur skólans er aðeins tveggja ára gamall og sáu kennarar sjálfir um að hanna og standsetja allar skólastofurnar og þar sem hjúkrun er kennd eru þrjár skólastofur, hver þeirra er með sitt litaþema, bleikt, grátt og blágrænn. Í skólanum er líka nuddbraut og þar voru þau búin að útbúa mjög fínar kennslustofur fyrir nuddkennslu, ásamt æfingarnuddstofu þar sem tekið var á móti ‚viðskiptavinum‘. Skólameistarinn er áhugasamur um býflugur og eru fjögur býflugnabú í garði skólans sem framleiða hunang sem við fengum að smakka. Virkilega skemmtileg og áhugaverð heimsókn.

Í september fengum við góða gesti frá Frakklandi í heimsókn í FÁ. Þau Katell Perrot og Colette Masson-Gauthier, kennarar í ensku, landafræði og jarðfræði, komu ásamt 18 nemendum frá Fougères, Frakklandi. Þau fengu að heimsækja kennslustundir, fræðast um FÁ og um náttúru Íslands. Þau gerðu skemmtilegt myndband um ferðina sem má sjá með þessari frétt.

 Þann 26. maí hélt 60 manna hópur kennara og starfsmanna í FÁ til Portúgal. Tilgangur ferðarinnar var að kynna sér starfið í tveim skólum í borginni Braga, Oficina og Agrupamento de escolas Sá De Miranda. Tveir ólíkir en flottir skólar sem gaman var að heimsækja. Sérstaka athygli vakti að portúgalskir nemendur eru alla jafna í skólanum frá átta á morgnana og til sex á kvöldin og fara þá í tómstundastarf. Ekki mikill tími sem fjölskyldurnar fá saman þarna í Portúgal. Seinni hlutann af ferðinni hélt hópurinn svo til Portó. Þar var margt skemmtilegt að skoða, falleg borg með mikla sögu. Hér má sjá heimasíður skólanna: Oficina   Agrupamento de escolas Sá De Miranda  

 Skoða hvernig stöðva megi framgang heilasjúkdóma Lyfjafyrirtækið Lundbeck í Danmörku stóð nýlega fyrir stórri keppni sem kallast „Drughunters“. Hópi nemenda af náttúrufræðibraut Fjölbrautaskólans við Ármúla var boðin þátttaka í keppninni. Keppnin snýst um að koma með hugmyndir um hvernig stöðva megi framgang heilasjúkdóma eða lækna þá, en nemendur velja sér eitt viðfangsefni heilasjúkdóma, sem þeir afla sér þekkingar í.   Íslenski hópurinn fékk sérstakt hrós fyrir kynninguna sína. Fyrir íslensku krakkana var undirbúningurinn fyrir keppnina þverfaglegt samstarf raungreina og dönsku. Keppnin vekur áhuga nemanda á læknisfræði„Nemendunum sjálfum fannst keppnin hafa gefið þeim skemmtilegri sýn á dönskuna og einn nemandi nefndi að þessi keppni hefði hvatt hann til að reyna við læknisfræðina í framtíðinni“ sagði Simon Cramer Larsen, dönskukennari eftir ferðina. Í lok apríl síðastliðinn hittust svo allir hóparnir í Kaupmannahöfn og kynntu afraksturinn á dönsku fyrir dómnefnd að sögn Gúríar Helenu Petersen, dönskukennara, sem einnig var með í ferðinni. Keppnin er fyrst og fremst ætluð dönskum og færeyskum framhaldsskólanemendum en Fjölbrautaskólinn við Ármúla er eini íslenski framhaldsskólinn sem tók þátt.

  Hópur frá skólanum IES Tegueste á Spáni kom í heimsókn í FÁ dagana 15. – 19. apríl en skólinn er samstarfsskóli okkar í Erasmus+ verkefninu A Green Day sem er umhverfismiðað verkefni. Fimm nemendur og þrír kennarar sóttu FÁ heim og þessa viku sem þau voru í heimsókn hjá okkur hjálpuðu nemendur FÁ þeim að útbúa handbók um Grænfánann, alþjóðlega umhverfisviðurkenningu sem á ensku kallast Eco- Schools. FÁ er sá framhaldsskóli á Íslandi sem hefur lengst flaggað grænfánanum og nemendur okkar því vel í stakk búnir að aðstoða við gerð handbókarinnar. Ásamt því að vinna að handbókinni fóru gestirnir ásamt gestgjöfunum Gullna hringinn og á náttúrusýninguna í Perlunni. Spánverjarnir voru „heppnir“ með veður en eins og tíðkast í apríl á Íslandi var allra veðra von og þau fengu allt frá snjókomu yfir í glampandi sól og aðspurð sögðu þau að það hefði verið einn af hápunktunum, að geta farið í snjókast í apríl.   Í nóvember fer sami hópur og tók á móti gestunum hér heima út í heimsókn til IES Tegueste sem er staðsettur norðanmegin á eynni Tenerife. Þar munu nemendur okkar læra að reikna kolefnissporið sitt og halda áfram að styrkja tengslin við þennan frábæra vinaskóla.    

FÁ tók þátt í Erasmus-verkefninu GAIA með framhaldsskóla í Frakklandi en verkefnið byrjaði á vorönn 2022 og lauk nú í vor 2023. Alls tóku 15 nemendur þátt frá FÁ og 15 franskir nemendur. Það voru svo fjórir starfsmenn frá hvorum skóla sem unnu að verkefninu. Lesa meira

Um síðustu helgi fór hópur nemenda og kennara úr FÁ í heimsókn til Dijon í Frakklandi, alls 15 nemendur og 4 kennarar. Þau eru þátttakendur í Erasmus+ verkefni sem ber yfirskriftina “Global Awareness in Action” og er verið að vinna með það að við séum meðvituð um sjálfan okkur og hvernig okkur líður, að við séum meðvituð um aðra og um umhverfi okkar til framtíðar.  Þau verða úti í Frakklandi í 10 daga og munu vinna alskyns verkefni með frökkunum ásamt því að skoða áhugaverða staði í Dijon.  Hér sjáum við nokkrar myndir úr ferðinni.

Þessa dagana erum við með heimsókn frá Dijon í Frakklandi í FÁ, 15 nemendur og 4 kennara. Þetta eru þátttakedur í Erasmus+ verkefni sem ber yfirskriftina Global Awareness in Action og þar er verið að vinna með það að við séum meðvituð um sjálfan okkur og hvernig okkur líður, að við séum meðvituð um aðra og séum meðvituð um umhverfi okkar til framtíðar.Hópurinn er búinn að koma víða við. Hann er búinn að gera ýmis verkefni í skólanum, fara í vettvangsferð um miðbæinn, Nauthólsvík og gönguferð um Búrfellsgjá.  Aðalferðin var svo um síðustu helgi þegar hópurinn fór í tveggja nátta ferð í Þórsmörk. Þar fóru þau meðal annars yfir Krossá og inn í Húsadal og þaðan í göngutúr upp á Valahnjúk. Fóru þau síðan inn í Bása þar sem þau gistu. Á laugardeginum var langur göngudagur þar sem farið var upp Strákagil, yfir Kattahryggina og upp að Heljarkambi þar sem þau borðuðu hádegismat. Tóku þau svo Hestagötur aftur í Bása, ótrúlega fallegt svæði. Mikil upplifun hjá öllum í hópnum og allir svo glaðir. Á sunnudeginum var svo kyrrðarganga í nágrenni Bása og svo var haldið heim á leið með viðkomu í Stakkholtsgjá og Seljalandsfossi. Dagskráin hjá hópnum heldur svo áfram í þessari viku og þá munu þau meðal annars fara Gullna hringinn og í Hellisheiðarvirkjun, fara á listasöfn og ganga upp í Reykjadal. Ómetanlegt tækifæri fyrir ungt fólk að taka þátt í svona skemmtilegu verkefni og safna reynslu og minningum til framtíðar. Fleiri myndir úr Þórsmerkurferðinni má sjá á Facebook síðu skólans.