Fréttir af sérnámsbraut

Nemendur á sérnámsbraut fóru í skemmtilega ferð í Perluna í síðustu viku og hér má sjá myndir frá heimsókninni.

Útskriftarnemendur af sérnámsbrautinni fóru í heimsókn í vinnustofuna Ás í síðustu viku. Þau fengu kynningu á starfsemi Áss, meðal annars kertasgerðinni, listasmiðjunni, saumastofunni, vefnaði og þæfingu, pökkun, keramikstofunni og versluninni sem þau reka í Ögurhvarfi. Einnig hittum við gamla nemendur úr FÁ sem er alltaf mjög skemmtilegt.

Nemendur á sérnámsbraut fóru í skemmtilega heimsókn í RÚV í síðustu viku. Sigrún Hermannsdóttir viðburða- og þjónustustjóri RÚV tók á móti hópnum. Hún sýndi nemendum húsnæðið eins og t.d. sjónvarpssali, útsendingarherbergi og leikmuna- og búninga geymsluna þar sem hægt var að sjá ýmsar gersemar. Virkilega skemmtileg og fróðleg heimsókn - takk fyrir okkur RÚV.

Ævintýrin halda áfram hjá nemendum á sérnámsbraut en þau fengu nýverið tækifæri til að heimsækja slökkvistöðina í Hafnarfirði. Þar var vel tekið á móti þeim og var þeim boðið að kynna sér það sem snýr að starfi slökkviliðsmanna. Nemendur fengu leiðsögn um stöðina, skoðuðu búnað og tæki og fræddust um verkefni slökkviliðsins. Virkilega skemmtileg og fræðandi heimsókn.

Nemendur í áfanganum Starfsnám og Lok á sérnámsbraut heimsóttu Hjálparsveit skáta Garðabæ. Þar fengu þeir innsýn í starf björgunarsveitarinnar, kynntust tækjum og búnaði og lærðu um það mikilvæga hlutverk sem sveitin gegnir í samfélaginu. Heimsóknin var bæði fræðandi og áhugaverð og fengu nemendur að prófa allskonar tæki og tól.

Nemendur á sérnámsbraut eru komnir í jólafrí eins og aðrir nemendur FÁ. Þar er jólaandinn búin að svífa yfir undanfarið. Í gær, síðasta dag fyrir jólafrí, var jólagleði hjá nemendum. Þau skreyttu piparkökur, skáru út laufabrauð, jólatónlist var spiluð. Hápunkturinn var svo þegar jólasveinninn kíkti í heimsókn við mikið fögnuð viðstaddra.

Nemendur í stjórnmálafræðiáfanga á sérnámsbraut kíktu í vettvangsferð í gær og fóru meðal annars í heimsókn á Alþingi og kíktu á Stjórnarráðshúsið. Þar voru þau svo heppin að rekast á Kristrúnu Frostadóttur forsetisráðherra sem spjallaði smá við þau og fengu þau mynd af sér með henni.

Þann 23. maí 2025 útskrifuðust 8 frábærir einstaklingar af sérnámsbraut eftir fjögurra ára nám. Fimm nemendur útskrifuðust kl. 11:00 í lítilli og notalegri útskrift inni á sérnámsbraut með aðstandendum og starfsmönnum. Magnús skólameistari var með ávarp og Dóri kíkti í heimsókn og spilaði nokkur lög á gítar. Inga Maggý afhenti svo nemendum skírteinin sín og svo var boðið upp á léttar veitingar. Þrír nemendur útskrifuðust svo í hátíðarsal skólans kl. 13:00. Við óskum öllum útskriftarnemum velfarnaðar og þökkum fyrir árin fjögur.