Fjölbrautaskólinn við Ármúla

Miðvikudaginn 11. nóvember var árlegt opið hús haldið á Sérnámsbraut FÁ. Viðburðurinn er hluti af fjáröflun LOK-hóps deildarinnar og var bæði núverandi nemendum og þeim sem útskrifuðust síðastliðið vor boðið að koma saman og eiga skemmtilega stund. Það var nóg um að vera þetta kvöld en boðið var upp á spil, spjall, karókí, happdrætti og að sjálfsögðu pizzur og drykki. Kvöldið heppnaðist einstaklega vel og mætti um helmingur boðsgesta til að njóta samverunnar og skemmta sér með félögum sínum. Gleðin var við völd og margir fóru auk þess heim með glæsilega vinninga úr happdrættinu. Það er alltaf jafn gaman að hittast aftur og rifja upp góðar stundir!

Bergdís, nemandi við Fjölbrautaskólann við Ármúla, sneri heim frá Þýskalandi um helgina með bronsverðlaun í farteskinu! Hún tók þátt í dansmóti Special Olympics ásamt glæsilegum hópi frá Dans án hindrana á vegum Danslistaskóla JSB og stóð hópurinn sig frábærlega. Danshópurinn sem æfir jazzballett hafa æft saman undanfarin þrjú ár og lagt mikinn metnað og vinnu í undirbúninginn fyrir keppnina. Sá undirbúningur skilaði sér svo sannarlega með glæsilegum árangri! Við í FÁ erum afar stolt af Bergdísi og óskum henni og öllum danshópnum innilega til hamingju með bronsið! 👏🥉

Innritun vegna náms á vorönn 2027 er hafin og stendur yfir til 30. nóvember. Á heimasíðu skólans má finna allar upplýsingar um námið s.s. áfanga og brautir: https://www.fa.is/is/skolinn/kynning-a-fa Innritun fer fram á www.innritun.is.

Nemendur í viðskiptalögfræði heimsóttu Héraðsdóm Reykjavíkur þar sem þeir fylgdust með aðalmeðferð í máli sem varðaði umferðarlagabrot. Heimsóknin var liður í að tengja fræðilega umfjöllun námsins við raunverulega framkvæmd réttarkerfisins. Í dómsal fengu nemendur innsýn í störf dómstóla, hlutverk dómara, saksóknara og verjenda sem og framgang aðalmeðferðar frá upphafi til enda. Heimsóknin vakti mikinn áhuga nemenda og skapaði dýpri skilning á íslensku réttarkerfi og þeirri löggjöf sem fjallað er um í náminu. Við þökkum starfsfólki dómstólsins fyrir góðar móttökur og fróðlega upplifun.