Nýnemaferð Fjölbrautaskólans við Ármúla var haldin miðvikudaginn 9. september og var ferðinni að þessu sinni heitið í Skopp að ósk nemendafélagsins. Nýnemar mættu hressir og kátir, hoppuðu upp í rútu og brunuðu af stað. Í Skopp gafst þeim kostur á að prófa fjölbreyttar afþreyingar, þar á meðal risastóran trampólíngarð, karókí herbergi, skotbolta, klifurvegg, Pixel-leiki, fótboltavöll og margt fleira. Meðlimir nemendafélagsins voru duglegir að ganga á milli hópa og draga nýnema inn í ýmsa leiki og hópefli. Nemendur voru mjög áhugasamir um að prófa nýja hluti, taka virkan þátt og kynnast samnemendum sem þeir höfðu jafnvel ekki talað við áður. Boðið var upp á pizzu og gos í hádeginu og því fór enginn svangur heim. Nýnemum gafst einnig kostur á að bjóða sig fram sem nýnemafulltrúar í nemendafélagið og hafa um 30 nýnemar þegar sótt um. Í heildina litið gekk ferðin mjög vel. Nýnemar fengu tækifæri til að kynnast samnemendum sínum betur, eiga skemmtilega stund saman og styrkja félagsleg tengsl sín fyrir komandi skólaár.

Starfsfólk FÁ tók þátt í gula deginum sem er í dag, 10. september Gulur september er samvinnuverkefni stofnana og félagasamtaka sem vinna saman að geðrækt og sjálfsvígsforvörnum. Það er von undirbúningshópsins að gulur september auki meðvitund fólks um mikilvægi geðræktar og sjálfsvígsforvarna. auk þess að vera til merkis um kærleika, aðgát og umhyggju.

Á Treyjudeginum, þann 4. september, klæðist fólk uppáhalds treyjunni sinni til stuðnings börnum með krabbamein. Er þetta einföld og skemmtileg leið fyrir vinnustaði, skóla og íþróttafélög til að sýna stuðning í verki. Það er styrktarfélagið Börn með krabbamein sem stendur að deginum en félagið styður börn með krabbamein og fjölskyldur þeirra með fjölbreyttum hætti. Dagurinn var fyrst haldinn á Englandi árið 2013 en fljótlega bættust Noregur, Svíþjóð og Danmörk við og nú Ísland. Nemendur og starfsfólk FÁ tók að sjálfsögðu þátt í deginum og sýndi stuðning í verki við þetta þarfa málefni.

Fyrsta fréttabréf FÁ skólaárið 2026 - 2027 er komið út.

Innritun í fjarnám á haustönn 2026 er hafin. Kennslan hefst svo 2.september

Nú er starfið að komast í fullan gang í skólanum eftir sumarleyfi og erum við öll spennt að hitta nemendur eftir gott sumarfrí.

Innritun í framhaldsskóla landsins er nú lokið og umsækjendur geta séð stöðu umsókna sinna á Stafrænu Íslandi. Það gleður okkur að segja frá því að 225 nemendur sem voru að ljúka grunnskóla hafa fengið skólavist í FÁ, auk þess eru eldri nemendur sem hafa fengið skólavist í FÁ í haust 113 talsins. Útlit er því fyrir að um 920 nemendur muni stunda nám í FÁ í dagskóla á næstu önn.

Daniel do Carmo Njarðarson, nýstúdent frá Fjölbrautaskólanum við Ármúla, var þess heiðurs aðnjótandi að taka þátt í hátíðarhöldunum á Austurvelli í tilefni af 82 ára afmæli lýðveldisins. Með honum í athöfninni var Eyrún Freyja Andradóttir, nýstúdent frá Menntaskóla Borgarfjarðar.

FÁ-ingarnir Ingigerður Bergvinsdóttir, Brynjar Orri Smith og Steinn Torfi Ólafsson héldu námskeið í kvikmyndagerð í Grundaskóla á Akranesi um helgina. Námskeiðið gekk afar vel og ætla má að myndirnar sem krakkarnir gerðu á námskeiðinu verði sýndar á Kvikmyndahátíð Grundarskóla sem fer fram núna í vikunni. Þetta er í annað sinn sem nemendur úr FÁ halda námskeið í Grundaskóla í tengslum við kvikmyndahátíðina. Á myndinni má sjá þau Ingu, Brynjar og Stein ásamt nemendum á námskeiðinu.

Tölvuleikir eru ein stærsta afþreyingar- og skapandi grein heims og áhrif þeirra ná langt út fyrir skjáinn. Þeir tengjast tækni, listum, hönnun, sagnagerð, samskiptum og nýsköpun. Í haust býður Fjölbrautaskólinn við Ármúla upp á nýja Tölvuleikjalínu innan Nýsköpunar- og listabrautar, þar sem nemendur fá tækifæri til að skoða tölvuleiki í víðari samhengi.