Nordplus Junior verkefni í Litháen

Vikuna 21. – 25. september fóru fimm nemendur og tveir kennarar úr FÁ til bæjarins Jonava í Litháen til að taka þátt í verkefninu Nordplus Junior – Consumerism 2028. Eins og nafnið gefur til kynna snýst verkefnið um neysluhyggju í nútímasamfélagi og þemað í á þessum fundi var matarsóun. Aðrir þátttakendur í verkefninu er framhaldsskólar frá Litháen, Danmörku og Svíþjóð. Nemendurnir okkar kynntu FÁ og héldu einnig fyrirlestur þar sem þau kynntu meðal annars hvernig reynt er að koma í veg fyrir matarsóun í skólanum og niðurstöðu rannsóknar á matarsóun á íslenskum heimilum sem þau framkvæmdu í aðdraganda ferðarinnar. Þá fór hópurinn einnig saman til borgarinnar Kaunas og fékk að kynnast því hvernig sorphirðu og endurvinnslumálum er háttað í Litháen.

Ferðin var fróðleg fyrir alla þátttakendur og bæði nemendur og kennarar komu heim sátt og margs vísari eftir skemmtilega daga í Litháen. Í mars á næsta ári mun síðan annar hópur nemenda fara til Stokkhólms í Svíþjóð þar sem haldið verður áfram með verkefnið.