Tölvuleikjalína

Hvernig geta tölvuleikir hjálpað okkur við að setja okkur í spor annara, aukið samkennd og skilning á aðstæðum sem við þekkjum ekki? Þessum spurningum veltu nemendur í Yndisspilun fyrir sér eftir að hafa spilað leikinn This War of Mine.

Fimm manna hópur frá Fjölbrautaskólanum við Ármúla heimsótti borgina Eskişehir í Tyrkland í seinustu viku til að fræðast um möguleika gervigreindar í námi og kennslu. Ferðin var liður í Erasmus-verkefninu We Shape the Future: Integrating AI, AR and VR in Education þar sem möguleikar sýndarveruleika, gagnaukins veruleika og gervigreindar eru skoðaðir með áherslu á STEM-greinar. Í Tyrklandi unnu nemendur frá Íslandi, Grikklandi og Tyrklandi saman í verkefnum þar sem gervigreind var notuð í eðlisfræði og efnafræði. Þátttakendur verkefnisins fengu einnig fræðslu um almenna notkun gervigreindar. Farið var í dagsferð þar sem borgirnar Bursa og Iznik voru skoðaðar og bragðað á tyrkneskum mat, farið á útimarkaði, heimsótt moskur, nýlistasafn, fornminjasöfn og skoðað grafhýsi Osman Gazi, stofnanda Tyrkjaveldis.

Mario Kart World tölvuleikjamót FÁ fór fram í gær en nemendur í rafíþróttaáfanganum RAFÍ2SM03 sáu um að skipuleggja mótið. Tæplega tuttugu nemendur tóku þátt og var stemningin í hópnum mjög góð. Eftir spennandi keppni stóð Kacper uppi sem sigurvegar og fékk 20.000 kr inneign í Elko í verðlaun. Jason endaði í 2. sæti og vann eintak af tölvuleiknum Super Mario Party Jamboree í boði Ormsson og Júlía var í þriðja sæti og fékk inneign hjá Next Level Gaming. Allir þátttakendur fóru í lukkupott og gátu unnið inneign hjá NINGS og Next Level Gaming.

Nemendur í fjölmiðlafræði gáfu út skólablaðið Steypan núna í febrúar. Hér birtum við grein úr blaðinu eftir þá Daniel do Carmo Njarðarson og Kacper Hryniewicki.

Tveir kennarar og þrír nemendur Fjölbrautaskólans við Ármúla fóru til Serres í Grikklandi í síðustu viku í tengslum við Erasmus+ verkefnið We Shape the Future. Í ferðinni fengu þátttakendur frá Íslandi, Grikklandi, Tyrklandi og Ítalíu fræðslu um gagnaukinn veruleika og með hvaða hætti er hægt að nýta tæknina í námi og kennslu. Hópurinn ferðaðist einnig um landið og skoðaði meðal annars Alistrati-hellirinn og borgina Þessalóniku. Frá Fjölbrautaskólanum við Ármúla fóru þau Andri Ingvason raungreinakennari, Bjarki Þór Jónsson tölvukennari ásamt nemendunum Ester Sól, Söru Jóhönnu og Oliwiu.

Undanfarnar vikur hafa nemendur í leikjahönnun (TÖHÖ2LH05) unnið að þróun frumgerða sem byggja á eigin leikjahugmyndum. Alls kláruðust um 15 frumgerðir þessa önn, þar af fjórar í fjarnámi.

Fjölbrautaskólinn við Ármúla tók á móti gestum frá Ítalíu, Grikklandi og Tyrklandi í september í tengslum við Erasmus+ verkefnið We Shape the Future: Integrating AI, AR and VR in Education. Boðið var upp á fjölbreytta dagskrá og vinnustofur þar sem þátttakendur könnuðu hvernig hægt er að nýta sýndarveruleika í námi og kennslu. Nemendur, kennarar og aðrir þátttakenndur lærðu meðal annars að skapa sína eigin sýndarheima og prófuðu sýndarveruleikabúnað þar sem þau gátu flogið um sólkerfið í geimskipi. Dagskráin endaði með vel heppnaðri ferð um Gullna hringinn ásamt fræðandi leiðsögn og klassískum íslenskum flatkökum með hangikjöti.

Þrír kennarar Fjölbrautaskólans við Ármúla ferðuðust til Ítalíu á dögunum í tengslum við Erasmus+ verkefnið We Shape the Future: Integrating AI, AR and VR in Education. Um er að ræða samstarfsverkefni milli þriggja skóla sem staðsettir eru á Íslandi, Grikklandi og Tyrklandi auk aðkomu sérfræðinga frá Ítalíu sem veita leiðsögn og fræðslu. Markmið verkefnisins er að kanna með hvaða hætti sýndarveruleiki, gagnaukinn veruleiki og gervigreind getur nýst í námi og kennslu innan STEM-greina, þ.e.a.s. greina á sviði verkfræði, stærðfræði, raunvísinda og náttúruvísinda.

Í FÁ er hægt að velja spennandi áfanga tölvuleikjahönnun, TÖHÖ2LH05 og TÖHÖ2ÚT05) . Í þeim áföngum gera nemendur lokaverkefni og fengu þeir frjálsar hendur til að þróa sína eigin leikjahugmynd og búa til einfalda frummynd út frá þeirri hugmynd.

Leikjafyrirtækið CCP Games bauð nemendum í tölvuleikjaáföngum FÁ á EVE Fanfest tölvuleikjaráðstefnuna sem haldin var í Hörpu dagana 1.-3. maí. Á ráðstefnunni kynnti CCP það sem framundan er í EVE Online og öðrum tölvuleikjum fyrirtækisins. Auk þess var gestum boðið upp á fjölbreytt úrval erinda yfir daginn. Nemendur fengu meðal annars að kynnast því hvernig listafólk hannar geimskip fyrir EVE Online, með hvaða hætti hagfræði getur tengst tölvuleikjum og mikilvægi þess að sýna umburðarlyndi í fjölspilunarleikjum á borð við EVE Online. Nemendur prófuðu nokkra tölvuleiki frá íslenskum leikjafyrirtækjum á staðnum, þar á meðal Gang of Frogs, Pax Dei og EVE Vanguard sem er væntanlegur fyrstu persónu fjölspilunarleikur frá CCP. Nemendur FÁ þakka CCP kærlega fyrir fróðlega, skemmtilega og eftirminnilega ráðstefnu!

Rafíþróttalið FÁ sigraði Fjölbrautaskóla Snæfellinga með sannfærandi 3-0 sigri í FRÍS í gær. FÁ vann alla þrjá leikina sem keppt var í (Rocket League, Counter-Strike 2 og Fortnite) og skólinn er þar með kominn áfram í undanúrslit. Næsti leikur FÁ verður gegn Tækniskólanum eða Fjölbrautaskóla Suðurlands miðvikudaginn 2. apríl kl. 19:00. Hægt verður að horfa á leikina í beinni útsendingu í Sjónvarpi Símans og Twitch-rás Rafíþróttasambands Íslands. Viltu vita hvernig þessir tölvuleikir virka í einfölduðu máli eða kynnast rafíþróttaliði FÁ? Nemendur í áfanganum Yndisspilun (TÖLL2YS05) settu saman heimasíðu þar sem áhugasamir geta kynnt sér efnið betur: http://sites.google.com/view/fris25

FRÍS, rafíþróttakeppni íslenskra framhaldsskóla, hófst 29. janúar síðastliðinn en í henni keppa skólar sín á milli í leikjunum Fortnite, Rocket League og Counter-Strike 2. Lið FÁ byrjar keppnina mjög vel og hefur unnið sjö af níu leikjum. Um miðjan febrúar kemur svo í ljós hvaða skólar komast áfram í 8-liða úrslit. Stefán Máni, Karvel og Elvar leiða Rocket League lið FÁ í ár, Ísar Hólm, Aron Örn og Sigmar eru í Fortnite-liðinu og í CS2-liði skólans eru Birnir Orri, Ihor, Aline, Thanh og Quan. Varamenn eru Aron, Elínheiður, Jens, Logi, Milena og Sölvi. Þess má geta að skólinn býður upp á tvo áfanga í rafíþróttum: RAFÍ2FA03 (Rafíþróttir fyrir alla) sem er í boði á haustönn og RAFÍ2SM03 (Rafíþróttir: Störf og mót) á vorönn. Áfram FÁ!

FRÍS Í dag, 27. janúar hefst framhaldsskólakeppni rafíþróttasambandsins, FRÍS. Keppt er í þremur tölvuleikjum, Counter Strike 2, Rocket League og Fortnite. FÁ tekur að sjálfsögðu þátt í öllum leikjunum eins og undanfarin ár. Við óskum keppendum okkar velfarnaðar í keppninni og vonum að þeim gangi sem allra best. Hann Stefán Máni er keppandi í liði FÁ og hann hefur verið að gera góða hluti í rafíþróttum og var meðal annars Íslandsmeistari í Rocket League.

Nemendur í Leikjahönnun (TÖHÖ2LH05) þróuðu sína eigin leikjahugmyndir og bjuggu til frumgerðir út frá þeim. Útkoman var skemmtilega fjölbreytt, þar má meðal annars nefna zombíleik sem gerist á Íslandi, kósíleik þar sem markmiðið er að finna týnda ketti og geimskotleik sem endar með bardaga við vígalegan endakall.

Starfsfólk CCP tók vel á móti nemendum Fjölbrautaskólans við Ármúla í áfanganum Leikjahönnun (TÖHÖ2LH05). Nemendur fengu kynningu á fyrirtækinu, tölvuleikjum þess og starfsmöguleikum innan tölvuleikjageirans. CCP er stærsta tölvuleikjafyrirtækið á Íslandi með yfir 400 starfsmenn í fjölbreyttum störfum á Íslandi, Bretlandi og í Kína. Fjölspilunarleikurinn EVE Online er stærsti leikurinn þeirra en nýverið gaf fyrirtækið út símaleikinn EVE Galaxy Conquest og er með fleiri leiki í bígerð.

Magnús Friðrik Guðrúnarson frá tölvuleikjafyrirtækinu Myrkur Games kom í heimsókn í Fjölbrautaskólann við Ármúla á dögunum og hitti nemendur í tölvuleikjaáföngum skólans. Undanfarin ár hefur Myrkur Games unnið að gerð Echoes of the End, sem er nýr hasar-ævintýraleikur sem gerist í nýjum fantasíuheimi. Hátækni hreyfirakningar- og ljósmyndaskönnunartækni er notuð við gerð leiksins þar sem hreyfingar leikara eru yfirfærðar á persónur í tölvuleiknum. Magnús fór um víðan völl í erindi sínu, kynnti fyrirtækið, ræddi um mikilvægi nýsköpunar og hugvits fyrir atvinnulífið og íslenskt samfélag, benti á fjölbreytta atvinnumöguleika innan tölvuleikjageirans ásamt því að svara fjölmörgum spurningum frá nemendum. Þess má geta að þá er Magnús Friðrik fyrrum nemandi FÁ. Árið 2017 flutti hann kveðjuávarp fyrir hönd nýstúdenta og hafði margt jákvætt að segja um skólann: „Ég er í FÁ í skóla þar sem mín saga er bara eitt dæmi af mörgum, skóla sem hvetur mig og sýnir mér það sem ég leitaði að fyrir mörgum árum, skilningi. FÁ gaf mér tækifæri til að vera ég sjálfur, tækifæri til að njóta námsins á mínum eigin forsendum.“ er meðal þess sem Magnús sagði í sinni góðu og uppörvandi ræðu. Hægt er að lesa nánar um Myrkur Games og Echoes of the End á Myrkur.is. Nemendur sem hafa áhuga á tölvuleikjum er bent á að kynna sér úrval tölvuleikjaáfanga sem í boði eru, meðal annars má nefna áfangana leikjahönnun, yndisspilun og rafíþróttir.

Sextán nemendur í áfanganum Tölvuleikir: Saga, þróun og fræði (TÖLE2SE05) spiluðu borðspilið The Royal Game of Ur í kennslutíma. Talið er að spilið sé frá 2.500 f.Kr. og eigi rætur að rekja til Mesópótamíu. Nemendur skemmtu sér vel í tímanum og þótti flestum spilið skemmtilegt og áhugavert - en þó heldur einhæft. Tölvuleikir eru skoðaðir frá ýmsum hliðum í áfanganum og meðal annars farið yfir sögu tölvuleikja þar sem nemendur fá að prófa valda leiki. The Royal Game of Ur tengdist forsögu tölvuleikja, næst verður það PONG frá árinu 1972 sem var fyrsti tölvuleikurinn sem náði almennum vinsældum og þar á eftir E.T. sem er gjarnan titlaður sem „versti tölvuleikur allra tíma“.

Nokkrir nemendur í áfanganum Tölvuleikir og leikjatölvur (TÖLE2SE05) endurbyggðu FÁ í tölvuleiknum Minecraft. Það var þeirra lokaverkefni í áfanganum. Hér er hægt að sjá myndband þar sem gengið er um skólann og nokkrar kennslustofur: FÁ í Minecraft

  Í FÁ er hægt að velja spennandi áfanga tölvuleikjahönnun, TÖHÖ2LH05. Í þeim áfanga gerðu nemendur lokaverkefni og fengu þeir frjálsar hendur til að þróa sína eigin leikjahugmynd og búa til einfalda frummynd út frá þeirri hugmynd.  Hægt er að sjá prófa frummyndirnar hér og sjá sýnishorn úr leikjunum hér.

  Um 100 nemendur Fjölbrautaskólans við Ármúla skelltu sér til Forn-Egyptalands á dögunum og skoðuðu meðal annars Pýramídann mikla, Vitann í Faros og borgina Alexandríu á leið sinni um landið. Ferðalagið átti sér stað í nýju tölvustofu skólans þar sem tölvuleikurinn Assassin's Creed var spilaður í sögutíma. Í Assassin’s Creed tölvuleikjaseríunni ferðast söguhetja leiksins aftur í tímann og heimsækir sögufræga staði í Egyptalandi, Grikklandi, Bretlandi og víðar. Ferð nemenda hófst í Alexandríu þar sem hópurinn fékk einkaleiðsögn um borgina og síðar um pýramídana. Að því loknu fengu nemendur frjálsan tíma til að skoða sig um svæðið og taka myndir af því sem fangaði augu þeirra. Eins og sjá má á myndunum var margt á sjá og ferðin svo sannarlega eftirminnileg. Verkefnið er samstarfsverkefni sögukennara og tölvuleikjakennara skólans. Myndir: Skjáskot úr tölvuleiknum Discovery Tour by Assassin's Creed: Ancient Egypt (2018) Fleiri myndir má sjá á Facebook síðu skólans .