FÁ er blómlegur skóli en getur samt alltaf á sig blómum bætt. Í dag hlaut FÁ, ásamt tveimur öðrum fyrirtækjum, Samgönguviðurkenningu Reykjavíkur árið 2018. Við viðurkenningunni tóku Magnús Ingvason skólameistari ásamt þeim Tinnu Eiríksdóttur,og Jóhönnu Þ. Sturlaugsdóttur sem eru í umhverfisráði skólans. (sjá meira).

16. september er sérstakur dagur íslenskrar náttúru en auðvitað eru allir dagar ársins dagar náttúrunnar. Það er hefð fyrir því að halda daginn hátíðlegan hér í skólanum. Nemendur í umhverfisráði eru trúir þeirri hefð og hafa boðið Eyþóri Eðvarðssyni, fulltrúa samtakanna París 1,5, að heimsækja okkur mánudaginn 17. september. París 1,5 eru samtök sem berjast fyrir því að Ísland leggi sitt af mörkum til að stöðva hlýnun jarðar við 1,5°C. Eyþór mun halda fyrirlestur um mikilvægi umhverfisverndar og baráttuna við loftslagsbreytingar.  Umhverfisráð hvetur alla til þess að koma og hlusta á fræðandi og áhugaverðan fyrirlestur um loftslagmál. Fyrirlesturinn hefst klukkan 11:35

Evrópska ungmennaþingið eða European Youth Parliament eru samtök sem hafa það að markmiði að fræða ungmenni á efri skólastigum um málefni sem snerta Evrópubúa. Miðað er við ungt fólk á framhaldsskóla- og háskólaaldri. Nú er loks búið að stofna samtökin hérlendis og fyrsta ráðstefnan á Íslandi verður haldin í Reykjavík dagana 20.-22. september. Um 100 manns verða viðriðnir ráðstefnuna, bæði innlendir nýliðar og erlendir reynsluboltar.(Smellið hér fyrir frekari upplýsingar)

Eins og flestir vita er plastið að kæfa allt líf í sjónum og þekur standirnar og árfarvegi, plast er til marga hluta nytsamlegt en plast á röngum stað er skaðvænlegt. Nú erum við hálfnuð með plastlausan september og þótt hver og einn geti kannski ekki lagt mikið af mörkum má ekki gleyma að margt smátt gerir eitt stórt eins og Jónas Hallgrímsson sagði: 

Bera bý
bagga skoplítinn
hvert að húsi heim;
en þaðan koma ljós
hin logaskæru
á altari hins göfgva guðs.

Plokkum plast! Plokkum á leið í skólann, plokkum á leið heim! Svo má minna á að á sunnudaginn 16. september er Dagur náttúrunnar. Upp á þann dag verður haldið á mánudaginn kemur.

Bókasafnsdagurinn er haldinn í dag og í ár er hann tileinkaður vísindum. Kjörorð dagsins er "Lestur er bestur" – fyrir vísindin!
Blindur er bóklaus maður en vonandi ratar hann samt á bókasafn FÁ þar sem hann getur öðlast víða sýn á lífið og tilveruna.Í tilefni dagsins hefur vísindabókum af ýmsum toga verið stillt upp á safninu. Vonandi verða þeir ekki lengi á hillunum. 

Hér er listi yfir það nýjasta á safninu:

Á morgun, fimmtudaginn 6. september heldur Nemendafélag FÁ, í samstarfi við Nemendafélög Tækniskólans, Borgarholtsskóla, FMOS og Menntaskóla Borgarfjarðar, skólaball í Reiðhöllinni í Víðidal. Dansinn hefst kl. 22:00 og gestum hleypt inn til kl. 23:00 en þá verður húsinu lokað. Seinasti tónninn verður sleginn klukkan kl. 01:00 og þá kæmi sér vel að foreldrar og forráðamenn gætu komið og sótt börnin sín. Miða á ballið er hægt að nálgast í gegnum miðasöluvef hérna.  Þeir nemendur sem sækja ballið fá leyfi frá kennslu í fyrstu kennslustund að morgni föstudagsins 7. september. Aðrir nemendur mæta í kennslu samkvæmt stundatöflu.Allar skemmtanir á vegum skólans eru áfengis- og vímuefnalausar. Allt tóbak verður gert upptækt, rafrettur geymdar en vökvinn í þær gerður upptækur. Verði nemendur undir 18 ára aldri uppvísir að drykkju verður hringt í foreldra og þeir beðnir að sækja börnin sín. Eldri nemendum, sem verða uppvísir að drykkju, verður hins vegar vísað á dyr. Langoftast eru nemendur þó til algerrar fyrirmyndar á skólaböllunum. 

Skráningu í fjarnám við FÁ stendur fram til þriðja september en sjálf önnin hefst þann tíuna.Fjarnám er góður kostur fyrir þá sem ekki eiga auðveldlega heimangengt á daginn en geta notað kyrrð og ró heimilisins til þess að lesa og læra, hvort sem þeir halda heimili á jörðinni eða tunglinu. Eins og áður eru fjölmargir áfangar í boði. Kannið möguleikana hér síðunnni og smellið á FJARNÁM -tengilinn hér að ofan.

Í dag, 29. ágúst, er höfuðdagur. Þann dag á Heródes konungur að hafa látið eftir konu sinni að Jóhannes skírari skyldi hálshöggvinn. Sú þjóðtrú hefur lifað lengi að veður breytist á höfuðdag og haldist þannig næstu þrjár vikur. Í dag er jafnframt NÝNEMADAGUR sem stendur okkur nær. Í öðrum tíma verða nemendur sóttir í kennslustund og þeir boðnir velkomnir í skólann, allt verður á glöðu nótunum, enginn magadans samt og enginn mun láta höfuðið heldur ætlar Nemendaráð að bjóða upp á hádegismat í góða veðrinu og að honum loknum mega nýnemar halda heim og bera vonandi höfuðið hátt.

Nú er skólastarfið að komast á fullt skrið eins og járnbrautarlest sem bifast hægt af stað frá brautarpalli 3 1/4 en bráðum verður hraðinn svo mikill að ekki er hægt að greina landslagið út um gluggann. Þeir sem vilja sjá hvernig landslagið lítur út fyrir utan lestargluggann gerðu vel í að drífa sig í áfangana ÍÞRÓ1FJO1 sem er fjallganga og útivist eða í ÍÞRÓ1HJO1 - hjólað í skólann...ekkert er betra en holl og góð hreyfing og ferskt útiloft.

Á morgun, fimmtudaginn, 16. ágúst, klukkan 13 er fundur með nýnemum sem eru að koma beint úr grunnskóla.

Fundur með eldri nemendum sem eru að hefja nám við skólann verður sama dag klukkan 14.

Töflubreytingar fara fram frá kl. 13-16 á morgun fimmtudag og frá kl. 9-14 á föstudag. Einnig er hægt að senda póst á netfangið toflubreytingar@fa.is.