Í dag, laugardaginn 27. maí, klukkan 13.00 er komið að brautskráningu nemenda frá FÁ. Það er alltaf hátíðleg stund þegar nemendur sem svo lengi hafa verið hluti af skólalífinu, kveðja skólann og halda hver í sína áttina til að takast á við verkefni framtíðarinnar. Við skulum óska þeim velfarnaðar á lífsins vegi og vona að þeir verði sjálfum sér og þjóðfélaginu til sóma, alveg eins og þeir hafa verið skólanum til sóma þau ár sem þeir stöldruðu við í FÁ.

Dagskrá brautskráningarinnar má sjá með því að smella hér.

Við vitum að hver einasti nemandi við FÁ er einstakur en svo eru það þeir sem eru einstakari en aðrir, eru til fyrirmyndar fyrir einstakan námsárangur. Og þeir eru ekki fáir sem kalla má fyrirmyndarnemendur og hafa greinilega lagt hjarta og hug í námið. Fyrirmyndarnemendur njóta vissra hlunninda eins og sjá má ef smellt er á þessa vefslóð.

Smelltu hér til að sjá nöfn nemenda í dagskóla og fjarnámi sem fengu viðurkenningu fyrir framúrskarandi námsárangur.

Prófasýning og frágangur á vali fyrir haustönn 2017 er í dag, 23. maí. kl. 11:00 – 13:00.
Endurtektarpróf eru kl. 9:00 og vonandi hrasar enginn þar.

Auk þess verður Costco opnað í dag. - Er þá getið helstu tíðinda.

Bandalag kvenna í Reykjavík auglýsir eftir umsóknum um styrki til Starfsmenntunarsjóðs ungra kvenna fyrir skólaárið 2017-2018. Tilgangur sjóðsins er að hvetja og styðja við bakið á ungum konum, sem ekki eiga kost á námslánum, til að afla sér aukinnar menntunar.
Umsóknareyðublað, úthlutunarreglur og allar nánari upplýsingar má nálgast á heimasíðu bandalagsins, www.bkr.is .
Umsóknir um styrki skal senda til Bandalags kvenna í Reykjavík,
Túngötu 14, 101 Reykjavík, merktar „Námsstyrkir“ eða í tölvupósti á bandalagkvennarvk@gmail.com.
Umsóknarfrestur er til 19. júní.

Það var glampandi sólskin í dag og heitt þar sem var skjól fyrir norðannepjunni. Í þessu bjarta veðri lauk sjúkraprófum við FÁ og því má segja að próftörninni sé lokið. Á þriðjudaginn 23. er svo prófasýning. En þótt léttirinn sé mikill að loknum prófum er loft samt lævi blandið. Yfirvofandi endalok FÁ sem sjálfstæðs skóla hafa dregið mátt úr mörgum og gleðin mátt víkja fyrir sorg og kvíða - það eru blikur á lofti, verður þetta í síðasta sinn sem próf verða haldin undir merkjum FÁ? (áfram)

Núna í dag byrjuðu lokapróf annarinnar og vonandi kvíðir enginn útkomunni; það er annaðhvort eða og ekkert þar á milli. Prófraununum lýkur svo þann 19. maí með sjúkraprófum en vonandi eru sem flestir við góða heilsu. Maímánuðu er ekki bara þrautamánuður, hann er tími vonar og tilhlökkunar - nú sér fyrir endann á öllu púlinu og uppsker hver svo sem hann sáir nema auðvitað þeir sem sá í akur óvinar síns. (lesa meira...)

Í gær komu tveir danskir sjúkraliðanemar í heimsókn í skólann, þær Manal og Hidi. Þær koma frá Sjúkraliðaskólanum (SOPU) í Kaupmannahöfn og verða fimm vikur í starfsþjálfun á Landa-koti áður en þær verða brautskráðar í júní sem sjúkraliðar. Starfsþjálfunin hér á landi er hluti af Erasmus verkefni sem FÁ og danski skólinn taka þátt í.  Sautjánda apríl sl. fóru  tveir íslenskir sjúkraliðanemar í fimm vikna starfsþjálfun til Kaupmannahafnar.  Dönsku nemarnir skoðuðu Heilbrigðisskólann og voru mjög ánægðir með aðstöðuna þar og svo var boðið í mat í mötuneytinu.

Nýlega fékk skólinn kærkomna gjöf frá Pólska skólanum í Reykjavík en sá skóli á gott bókasafn í Þórunnartúni 2. Pólski skólinn gaf FÁ fimmtíu bækur og eru það kennslubækur, fræðibækur og skáldsögur. Monika Sienkiewicz, kennari við Pólska skólann í Reykjavík (Szkola Polska w Reykjaviku) afhenti bækurnar en Karolina Joanna Bryk tók við þeim fyrir hönd skólans. Það er von skólanna að bækurnar nýtist vel og styðji pólskumælandi nemendur í námi sínu. Eins og segir: ekkert líf án bóka.

Í dag, föstudaginn 28, apríl verður fjör í skólanum. Stúdentsefni skólans ætla að raska rónni og gera sér glaðan dag með hopp og híi. Herlegheitin hefjast inni í sal í löngu frímínútunum. Samkvæmt hefðinni munu útskriftarefnin kveðja kennara og starfsfólk inni á sal í löngu frímínútunum og því engin kennsla í þriðja tíma. Vonandi ekki margir sem sýta það að missa af einni kennslustund þótt auðvitað veiti ekki af að sækja tíma núna þegar aðeins ein vika er eftir af kennslu og svo taka prófin við. En í dag skulum við gleðjast með dimittentum og óska þeim alls hins besta. Sjá myndir á Facebook skólans.

Það verða kosningar til nemendaráðs á fimmtudaginn frá klukkan 11 til 14 á Steypunni. Allir sem eru í nemendafélaginu hafa kosningarétt. Ekki láta hjá líða að neyta kosningaréttarins; lýðræði byggist á því að lýðurinn taki þátt og ráði úrslitum. Hvert atkvæði skiptir því máli. Kosið verður til eftirfarandi embætta: formanns, varaformanns, gjaldkera og formanns skemmtinefndar. Hér má sjá framboðslistann...