Það var stuð í Skautahöllinni í gær þegar nemendur FÁ skelltu sér á skauta í tilefni af íþróttaviku Evrópu og forvarnardeginum. Hér má sjá skemmtilegar myndir af skautaferðinni.

Evrópski tungumáladagurinn er haldinn í tuttugasta og fimmta sinn í dag, 26. september. Þemað í ár er „Languages open hearts and minds!“. Við hér í FÁ héldum upp á daginn í gær. Við skreyttum skólann með fánum og veggspjöldum um tungumál Evrópu. Spiluð voru lög á ýmsum tungumálum í frímínútum og svo var tússtafla á Steypunni þar sem að nemendur og starfsfólk áttu að skrifa “til hamingju með afmælið” á sem flestum tungumálum. Virkilega skemmtilegur dagur.

Nemendur í AM umhverfisfræði fóru í vettvangsferð í þvottalaugarnar í gær til þess að kynna sér jarðhita og hvernig hann hefur verið notaður á Íslandi í gegnum tíðina. Það var við hæfi á bíllausa daginn að flestir nemendur gengu eða fóru á hlaupahjólum. Ferðin var einnig hópefli fyrir nemendur í áfanganum þar sem þeir lærðu nýjan hörkuspennandi útileik. Myndin var tekin við útilistaverkið Þvottakona (1958) sem er eftir Ásmund Sveinsson myndhöggvara og stendur í Laugardalnum til minningar um vinnu þvottakvenna. Það er ótrúlegt hvað tækninni hefur fleytt áfram og mikilvægt að við stöldrum við endrum og eins og skoðum hvað hefur breyst á ekki lengri tíma.

Í FÁ er hægt að velja fjallgöngu/útivist sem áfanga og hægt er að velja hann í staðinn fyrir hefðbundins íþróttaáfanga. Boðið er upp á 4-5 göngur yfir önnina í nágrenni höfuðborgarsvæðissins. Á laugardaginn var fyrsta ganga vetrarins þegar 40 nemendur ásamt kennurum héldu inn í Hvalfjörð og gengu upp að Glym. Veðrið var frábært, sólin skein og haustlitirnir komnir. Hér má sjá myndir úr ferðinni.

Dagur íslenskrar náttúru var haldinn hátíðlega við skólann þann 16. september. Fjörug dagskrá var við skólann að tilefninu. Umhverfisráð nemenda stóð fyrir ratleik fyrir nemendur þar sem þau fundu Grænfánann, rúlluðu sér niður brekkuna á skólalóðinni og skoðuðu plöntur í kringum skólann. Sjálfbærninefnd skólans (starfsfólk og stjórnendur) stóð vaktina við flokkunartunnur og aðstoðaði nemendur í vafa við flokkun. Allar deildir skólans gróðursettu íslenskar plöntur á svæði á skólalóðinni sem síðar meir verður útikennslustofa. Nú á hver deild skólans sína plöntu og munu þær fylgjast vel með henni. Plönturnar sem urðu fyrir valinu í ár eru Bæjarstaðabirki og Kasmír-reynir. Íslensk lög með umhverfisboðskap voru spiluð bæði í matsal skólans og á kaffistofu starfsfólks. Þátttaka í deginum var til fyrirmyndar og gaman að sjá hvað nemendur tóku virkan þátt í ratleiknum. Dagur íslenskrar náttúru hefur verið haldinn hátíðlegur síðan árið 2011. Tilgangur dagsins er að beina sjónum okkar allra að hinni einstöku náttúru landsins, þeim auðæfum sem í henni felast og mikilvægi þess að vernda hana og varðveita. Dagurinn er fæðingardagur Ómars Ragnarssonar en hann hefur lengi verið ötull talsmaður náttúruverndar.

Núna í vikunni vorum við með góða gesti í heimsókn frá Ferrentino á Ítalíu, þær Sara Colatosti og Daniela Meaglia. Þær voru í undirbúningsheimsókn að kanna hvort skólarnir okkar geti unnið saman að verkefni. Við stefnum á að hefja samstarfið næsta haust en þá koma fimm nemendur frá þeim í heimsókn til okkar. Þær Edda Lára og Jeannette tóku vel á móti þeim, funduðu, sýndu þeim skólann og svo kíktu þær í kennslustundir. Við hlökkum til frekari samstarfs með þeim Sara og Daniela.

Nýnemaferð skólans var farin í Lækjarbotna í gær, þar sem sólin lék við mannskapinn. Nemendur tóku þátt í hörkuspennandi keppni þar sem þeir leystu fjölbreyttar þrautir fyrir stig. Stigin voru gjaldmiðill fyrir teningakast í hinu feikivinsæla snákaspili. Þeir þrír hópar sem náðu bestum árangri í snákaspilinu voru leystir úr ferðinni með vinningum frá Nemendafélagi skólans. Dæmi um þrautir í ferðinni má nefna stígvélakast, ruslatýnslu, reipitog, bátagerð, blindraþraut, limbó, pokahlaup og líflínukast. Nemendur og kennarar skemmtu sér konunglega. Viðburðastýrurnar Kolbrún Ósk Pétursdóttir og Sædís Ósk Helgadóttir sáu um þrautaleikinn sem vakti mikla lukku meðal nemenda. Eftir æsispennandi keppni grilluðu skólameistari og aðstoðarskólameistari pylsur fyrir öll viðstödd. Nemendafélagið gaf nemendum gos og prins póló. Þá kusu nýnemar skólans sér nýnemafulltrúa, sem verða tengiliðir þeirra við nemendafélagið. Kosningu hlutu þau Lilja Hönnudóttir og Kristján Bergur S. Stefánsson. Við óskum þeim innilega til hamingju með kjörið.

Þrír stúdentar úr FÁ hlutu nú á dögunum styrk úr afreks- og hvatningarsjóði stúdenta Háskóla Íslands. Styrkir eru veittir nýnemum við Háskóla Íslands sem náð hafa framúrskarandi árangri í námi til stúdentsprófs og jafnframt látið til sín taka á öðrum sviðum, svo sem í félagsstörfum í framhaldsskóla eða listum og/eða íþróttum. Styrkþegar úr FÁ voru þær Brynja Guðmundsdóttir, Snædís Hekla Svansdóttir og Uyen Thu Vu Tran. Brynja Guðmundsdóttir brautskráðist frá Fjölbrautaskólanum í Ármúla í vor með afar góðum árangri og hlaut m.a. viðurkenningu fyrir aðstoðarkennslu og framúrskarandi árangur í efnafræði. Hún hefur mikinn áhuga á rannsóknum tengdum líffræði, frumum og sameindum og hefur því innritað sig í lífefna- og sameindalíffræði. Snædís Hekla Svansdóttir brautskráðist frá Fjölbrautaskólanum við Ármúla í desember 2023 og var dúx skólans en hún lauk stúdentsprófi á tveimur og hálfu ári. Við útskrift hlaut hún viðurkenningar fyrir góðan árangur í ítölsku, íslensku og félagsgreinum. Listsköpun hefur verið stór hluti af lífi Snædísar sem hefur unnið fjölbreytt listaverk, bæði málverk og skúlptúrverk, og sýnt þau. Þá var Snædís einnig virk innan stjórnar nemendafélags FÁ. Snædís hefur innritað sig í lögfræði. Uyen Thu Vu Tran brautskráðist frá Fjölbrautaskólanum í Ármúla í vor og hlaut viðurkenningu fyrir mjög góðan árangur í viðskipta- og hagfræðigreinum. Uyen flutti hingað til lands í miðjum COVID-19-faraldri og þurfti því að tileinka sér íslenska tungu samhliða framhaldsskólanámi. Uyen stefnir á að vinna innan fjármálageirans í framtíðinni og hefur því innritað sig í viðskiptafræði. Við sendum þeim Brynju, Snædísi og Uyen okkar innilegustu heillaóskir. Nánari upplýsingar um verðlaunin og verlaunahafana eru á vef Háskóla Íslands.

Nú er skólastarfið komið á fullt og það þýðir að erlenda samstarfið okkar er líka hafið. Á hverju ári fáum við fullt af heimsóknum frá aðilum frá skólastofnunum víða um heim sem vilja kynna sér starfið í skólanum okkar. Þessa vikuna er hún Bàrbara Ruiz Soliva frá Maristes Valldemia í Mataró, Spáni er heimsókn. Hún kennir ensku, stærðfræði, hagfræði og nýsköpun. Nemendur hennar eru frá 12 til 16 ára. Á myndinni er hún í heimsókn í ensku hjá Alice.

Stöðupróf í ensku, dönsku, spænsku og þýsku verða mánudaginn 25. ágúst klukkan 16:15 í stofu M201. Tekið er á móti skráningum á þessu eyðublaði hér til hádegis (12:00) föstudaginn 22. ágúst. Nemendur greiða 19.500 krónur fyrir hvert stöðupróf og er prófin opin eingöngu fyrir dagskóla- og fjarnema við FÁ. Hægt er að greiða fyrir prófin í afgreiðslu eða með millifærslu á reikning skólans (reikningur 514-26-352, kennitala: 590182-0959) áður er prófin eru haldin. Athygli skal vakin á að nauðsynlegt er að skrá sig á eyðublaðinu til þess að tryggja viðkomandi stöðupróf fari fram. Það er nauðsynlegt að framvísa kvittun fyrir greiðslu og skilríkjum í prófstofu til þess að fá að þreyta prófið.