Á fimmtudaginn síðasta, 27. febrúar fór Söngkeppni FÁ fram á Árdegi skólans. Hinn frábæri og skemmtilegi Elvis eftirherma var kynnir í keppninni og tók eitt lag við góðar undirtektir. Hin sívinsæla starfsmannahljómsveit, ÚFF tók svo 3 lög, ekki margir skólar sem geta státað af svona flottri hljómsveit starfsmanna. Sex flott atriði tóku þátt og það má sanni segja að það sé mikið af hæfileikaríku tónlistarfólki í skólanum okkar. Öll atriðin voru frábær en úrslitin urðu þau að Katrín Edda lenti í þriðja sæti með lagið My way með Frank Sinatra. Rafael Róbert var í öðru sæti með lagið Thank you með Led Zeppelin. Í fyrsta sæti var svo hún Arney með lagið Bad Romance með Lady Gaga. Aldeilis frábær flutningur, bæði söngur og framkoma. Arney mun því taka þátt í Söngkeppni framhaldsskólanna seinna á þessari önn. Hjartanlega til hamingju Arney.

Á fimmtudaginn 27. febrúar var Árdagur í FÁ, skemmtilegasti dagur ársins. Árdagar eiga sér langa sögu í FÁ en þá daga gera nemendur og starfsmenn sér dagamun og brjóta upp hefðbundinn skóladag. Nemendur skiptu sér í rúmlega 20 lið, hvert lið merkt ákveðnum lit eða mynstri. Liðin kepptu síðan sín á milli í fjölbreyttum þrautum sem starfsfólk var búið að undirbúa. Þrautirnar spönnuðu allt frá íþróttum til lista, heilaleikfimi til handavinnu, karókísöngs til spurningakeppna. Þessum skemmtilega degi lauk svo á söngkeppni og pizzaveislu. Það var Dökkbláa liðið sem vann keppnina eftir harða baráttu við það ljósbláa. Stóðu þau sig vel í þrautunum og voru þau dugleg að hvetja liðsfélaga sína og halda uppi góðri stemningu. Árdagur er alltaf jafn skemmtilegur, fullur af gleði, samvinnu og mikilli hvatningu. Markmiðið er ekki bara að leysa verkefnin, heldur einnig að efla tengsl milli nemenda og skapa gott andrúmsloft í skólanum.

Í síðustu viku fengum við góða heimsókn frá nágrönnum okkar í leikskólanum Múlaborg. Hópur leikskólabarna kíktu yfir og fengu fræðslu frá nemum í tanntækninámi um umhirðu tanna. Börnin unnu svo í hópum, lærðu m.a. að bursta tennurnar og fengu að æfa sig á risaeðlutönnum. Þetta þverfaglega samstarf hefur verið í gangi í nokkur ár og frábært tækifæri fyrir tanntækninema að æfa sig og fyrir leikskólabörnin að fá fræðslu um tannumhirðu og heimsækja skólann sem þau horfa á alla daga.

Eftir æsispennandi riðlakeppni er FÁ komið áfram í 8-liða úrslit FRÍS - rafíþróttakeppni íslenskra framhaldsskóla. Keppnin hófst 29. janúar á riðlakeppni þar sem FÁ mætti öðrum skólum í leikjunum Fortnite, Rocket League og Counter-Strike 2. FÁ var stigahæsti skólinn að lokinni riðlakeppni og fékk alls 23 stig. Þeir sem er í liðum FÁ eru Stefán Máni, Karvel og Elvar sem leiða Rocket League liðið. Ísar Hólm, Aron Örn og Sigmar eru í Fortnite-liðinu og í CS2-liði skólans eru Birnir Orri, Ihor, Aline, Thanh og Quan. Varamenn eru Aron, Elínheiður, Jens, Logi, Milena og Sölvi. Við óskum keppendum til hamingju og góðs gengis í 8-liða úrslitum.

Í vikunni fóru nemendur í áfanganum Hönnun og gerð sjónvarpsþátta í vettvangsferð á Kvikmyndasafn Íslands. Gunnar Tómas Kristófersson starfsmaður kvikmyndasafnsins tók vel á móti hópnum og leiddi hann um filmu - og munageymslu safnsins. Auk þess að sýndi hann hópnum ýmis myndbrot úr kvikmyndaarfinum, sem safnið hefur skanna og hreinsa með nýjum 4K filmuskanna sínum.

Á síðasta ári tók Fjölbrautaskólinn við Ármúla þátt í Erasmus verkefninu A Green Day í samstarfi við IES Tegueste frá Tenerife. Verkefnið byggði á samstarfi tveggja skóla þar sem markmiðið var að fræða hvorn annan um ýmis umhverfismál. FÁ hjálpaði IES Tegueste að undirbúa vinnu við umsókn um Grænfánann sem við höfum fengið afhentan í um 20 ár, fyrstir allra framhaldskóla. Í verkefninu fyrir hönd FÁ voru Andri Ingvason, Guðbjörg Eiríksdóttir og Tinna Eiríksdóttir en með þeim voru fimm nemendur sem stunda nám við skólann.

Það var líf og fjör í Skautahöllinni í gær þegar nemendur FÁ skelltu sér á skauta. Sú hefð hefur skapast í skólanum að fara á skauta þegar Lífshlaupið stendur yfir við góðar undirtektir nemenda. Hátt í tvöhundruð nemendur mættu og skemmtu sér konunglega :)

Í dag, miðvikudaginn 12. febrúar, heimsóttu tveir líffræðingar skólann, þeir Rafn Sigurðsson og Andreas Guðmundsson Gahwiller. Þeir mættu ekki einir, heldur komu þeir með samfélag maura með sér og kynntu nemendum fyrir öllu því helsta í heimi maura. Hér koma nokkrir fróðlegir punktar: 🐜 Maurar lifa í sérhæfðum og skipulögðum samfélögum og innan þeirra ríkir mikil stéttaskipting 🐜 Yngstu maurarnir vinna almennt inn í búinu og elstu maurarnir veiða mat fyrir hina 🐜 Maurasystkini eru 75% skyld hvort öðru en ekki 50% eins og tíðkast í heimi manna 🐜 Maurar eiga helst samskipti við hvern annan með ferómónum 🐜 Maurar hafa fundist víðsvegar á höfuðborgarsvæðinu og berast t.d. hingað til til lands með pottaplöntum, matvælum og farangri úr ferðalögum 🐜 Ef þið finnið maura heima hjá ykkur eða einhversstaðar á Íslandi þá hvetjum við ykkur til að tilkynna það á maurar.hi.is Ef þið viljið fleiri fróðleikskorn um maura, þá má finna þau hér: maurar.hi.is

Þau Halldór, Dagur og Iðunn voru skólanum sínum heldur betur til sóma í gærkvöldi þegar þau sigruðu lið Menntaskólans á Egilsstöðum 30-18 í 8 liða úrslitum Gettu betur. FÁ er þar með komið í undanúrslit keppninnar. Staðan var jöfn eftir hraðaspurningar 12-12 en svo juku þau forskotið jafnt og þétt. Tryggðu þau svo sigurinn með því að svara einni vísbendingaspurningu sem gaf þeim 5 stig. Við eigum eftir að vita við hverja við keppum í undanúrslitum þar sem 3 keppnir eru eftir í 8 liða úrslitum. Liðið mun því án efa nýta tímann vel til að æfa sig til að koma sterk inn í undanúrslitin. Fyrr í vikunni keppti lið FÁ á móti liði kennara í matsalnum. Í liði kennara var Þóra íslenskukennari, Unnar gæðastjóri og Magnús skólameistari. Var keppnin æsispennandi og endaði þannig að kennarar þurftu að lúta í lægra haldi fyrir firnasterku liði FÁ. Hér má sjá upptöku af keppninni sem var í beinni útsendingu á RÚV: https://www.ruv.is/sjonvarp/spila/gettu-betur/37029/b14bah

Ágætu nemendur. Skólahald fellur niður í allan dag, fimmtudaginn 6. febrúar vegna framlengingar á rauðri veðurviðvörun. Dear students. No school today, Thursday February 6th. due to red weather warnings. Stay safe !