Stór dagur í dag !! 

 Allir að stilla á RÚV kl. 20:00 í kvöld en þá keppir FÁ í 8 liða úrslitum í Gettu betur við Verkmenntaskóla Austurlands í beinni útsendingu. Við sendum baráttukveðju til Iðunnar, Jóhönnu Andreu og Þráins og segum: Áfram FÁ!!

FÁ tryggði sér í gær sæti í 8 liða úrslitum í Gettu betur þegar það vann Kvennó í hörkuspennandi keppni, 22-21. Kvennó leiddi keppnina eftir hraðaspurningar 15 - 10 og fyrir lokaspurninguna var staðan 21-20 fyrir Kvennó. FÁ náði svo sigrinum með því að svara lokaspurningunni rétt og hlaut tvö stig fyrir það.

FÁ mætir því Verkmenntaskóla Austurlands í 8 liða úrslitum sem fara fram í sjónvarpssal þann 3.febrúar.

Til hamingju Iðunn, Jóhanna og Þráinn.

Gettu betur lið FÁ lagði lið Verkemenntaskóla Austurlands í síðustu viku, 25-21. Önnur umferð fer fram í þessari viku og mætir lið FÁ liði Kvennaskólans á morgun, miðvikudaginn 18.janúar kl. 21.10.

Við sendum baráttukveðju til Iðunnar, Jóhönnu og Þráins.

Hægt er að hlusta á keppnina í beinni á Rás tvö.

Í kvöld, mánudaginn 9.janúar, fer fram fyrsta umferð spurningakeppninnar Gettu betur. FÁ mætir liði Verkmenntaskóla Austurlands kl 19.40. Í liði FÁ eru þau Iðunn Úlfsdóttir, Jóhanna Andrea Magnúsdóttir og Þráinn Ásbjarnarson.

Hlusta má á útsendinguna í beinu streymi á www.ruv.is.

Við óskum þeim góðs gengis.

Áfram FÁ.

Gettu betur lið Fjölbrautaskólans við Ármúla er á fullu að æfa fyrir komandi keppni sem hefst í næstu viku. Í Gettu betur liði FÁ þetta árið eru þau Iðunn Úlfsdóttir, Jóhanna Andrea Magnúsdóttir og Þráinn Ásbjarnarson sem hefur verið í liðinu undanfarin þrjú ár. Varamaður er Ívar Darri Jóhannsson. Þjálfarar liðsins þetta árið eru reynsluboltarnir þeir Eiríkur Kúld Viktorsson og Guðmundur Kristinn Þorsteinsson.

Undanfarin ár hefur FÁ verið í mikilli sókn í Gettu betur og náði skólinn t.d. í undanúrslit árið 2020 og í 8 liða úrslit árið 2021. FÁ mætir Verkmenntaskóla Austurlands í fyrstu umferð keppninnar sem fer fram 9.janúar.

Við óskum þeim góðs gengis í undirbúningnum og keppninni. Áfram FÁ!!

Opnað verður fyrir stundatöflur í Innu að morgni 4. janúar fyrir þá sem greitt hafa skólagjöldin.

Kennsla hefst svo samkvæmt stundatöflum 5. janúar.

4. og 5. janúar er tekið er á móti beiðnum um töflubreytingar. Beiðnir skulu sendar á netfangið toflubreytingar@fa.is

Skráning í fjarnám við FÁ er hafin og stendur yfir til 18.janúar. Kennsla hefst svo 25.janúar.
Nánari upplýsingar um fjarnámið má finna á heimasíðu FÁ.
Fjölmargir áfangar eru í boði sem sjá má hér.
Hægt er að skrá sig hér.

Kæru fjarnámsnemendur!

Takk fyrir önnina sem nú er á enda.

Skráning á vorönn 2023 hefst 28.desember og stendur til 18. janúar.

Kennsla hefst 25.janúar.

Fjölmargir áfangar í boði, sjá hér.

Í gær, laugardaginn 17.desember var hátíðlegur en snjóþungur dagur í FÁ þegar skólinn útskrifaði 75 nemendur af 9 brautum og þar af tvo af tveimur brautum. Veðrið setti smá strik í reikninginn og voru þónokkrir nemendur sem ekki gátu mætt í útskriftina.
54 nemendur útskrifuðust sem stúdentar og frá nýsköpunar- og listabraut útskrifast einn nemandi.
Af heilbrigðissviði útskrifuðust 22 nemendur, 4 sem heilbrigðisritarar, 1 sem læknaritari, 10 sem heilsunuddarar og svo 7 sem sjúkraliðar.
Dúx skólans er Aníta Harðardóttir sem útskrifaðist af félagsfræðibraut með meðaleinkunnina 8.76.
Magnús Ingvason skólameistari og Kristrún Birgisdóttir aðstoðarskólameistari fluttu ávörp og fóru yfir liðna önn. Í ræðu sinni fjallaði Magnús m.a. um málefni flóttamanna. Hann sagði að Ísland gæti sannarlega ekki tekið á móti öllum þeim 15 milljónum fullorðinna og 15 milljónum barna sem eru á flótta í heiminum í dag, en við gætum þó gert betur. Fyrir nærri tveimur áratugum hafi íslensk stjórnvöld sett landið á lista viljugra þjóða sem hafi hafið stórfelldan hernað í Miðausturlöndum, en að mörgu leyti má rekja flóttamannavandamál dagsins í dag til þeirra aðgerða. Sú framkvæmd var í andstöðu við meginþorra þjóðarinnar. Það væri siðferðisleg ábyrgð okkar íslendinga að gangast við þeim verknaði og taka á móti flóttamönnum og taka vel á móti þeim.
Aníta Harðardóttir flutti kveðjuávarp fyrir hönd útskriftanema. Inga Sigríður Halldórsdóttir átti að flytja kveðjuávarp fyrir hönd útskriftarnema Heilbrigðisskólans en hún var því miður veðurteppt.
Þrír farsælir starfsmenn skólans til margra ára voru kvaddir en það eru Jóna Guðmundsdóttir gæðastjóri og sviðsstjóri bóknáms, Guðrún Narfadóttir áfangastjóri og Þór Elís Pálsson kennari á kvikmyndabraut skólans.
Tónlistarflutningur við athöfnina var undir stjórn Lilju Daggar Gunnarsdóttur kennara við skólann. Fékk hún til liðs við sig nemendur úr tónlistaráfanga skólans og fluttu þau lagið Last Christmas.
Síðan lauk athöfninni með hátíðlegum samsöng allra viðstaddra á Heims um ból við undirleik Lilju Daggar.
Við óskum öllum útskriftarnemum til hamingju með áfangann og óskum þeim bjartrar framtíðar.
Hér eru tenglar á fleiri myndir frá útskriftinni. Myndir frá heilbrigðisbrautinni.   Almennar myndir og myndir af stúdentum