Í Fjölbrautaskólanum við Ármúla er boðið upp á nám á glæsilegri nýsköpunar- og listabraut. FÁ var brautryðjandi þeirrar hugmyndafræði að byggja upp slíka braut og hefur hún verið starfrækt í um 11 ár. Það var að frumkvæði Grétu Mjallar Bjarnadóttur og Þórs Elís Pálssonar að móta brautina og fengu þau styrk frá Sprotasjóði til að gera það. Brautin varð tveggja ára starfsnámsbraut með það að markmiði að nemendur kæmust í bein tengsl við atvinnulífið. Tilgangur hennar hefur greinilega sannað sig þar sem nemendafjöldi brautarinnar er um 50 nemendur á önn.

Nemendur hafa lengi kallað eftir fleiri listáfangum og að því að nýsköpunar- og listabrautin bjóði upp á fullt nám til stúdentsprófs. Með tilkomu styrks frá Sprotasjóði 2022 var kennurum við brautina gert kleift að þróa það nám. Gréta Mjöll og Þór Elís héldu því áfram þeirri vinnu og fengu til liðs við sig þau Jeannette Castioni og Bjarka Þór Jónsson, kennara við brautina.

Sterk umræða er um aukið nemendalýðræði í skólum og úr varð sú hugmynd að vinna beint að þróuninni með nemendum í venjulegu skólastarfi og var því boðið upp á valáfanga á haustönn 2022 fyrir nemendur um þróun brautarinnar.

Meginverkefni nýsköpunar áfangans var að vinna sameiginlega að þróunarverkefninu, bæði nemendur og kennarar. Viðfangið er umbreyting tveggja ára starfsnáms í listum til þriggja ára listnáms til stúdentsprófs með sameiginlegri iðjutengdri skapandi rannsókn.

Áfanginn hefur gengið mjög vel og eru nemendur áhugsamir um framhaldið. Það er von okkar að það takist mögulega að hefja nám á þriggja ára nýsköpunar- og listabraut næsta haust.

Nemendur í leikjahönnun (TÖHÖ2LH05) fengu frjálsar hendur til að þróa sína eigin leikjahugmynd og búa til einfalda "prótótýpu" út frá þeirri hugmynd. Hægt er að prófa "prótótýpurnar" hér.

Í áfanganum listir og samfélag (LIME2LS05) var m.a. skoðað hvernig samfélagið birtist í hinum myndvædda heimi allt frá fyrstu hellaristum til sýndarveruleika í netheimum nútímans. Eitt af verkefnum nemenda í áfanganum var að nota tölvur og tækni á skapandi hátt. Hér má sjá sýnishorn af afrakstri nemenda, haustönnina 2022.

Nemendur í þjóðhagfræði á viðskipta- og hagfræðibraut FÁ enduðu haustönnina með því að fara í heimsókn í Seðlabanka Íslands. Stefán Jóhann Stefánsson, ritstjóri á skrifstofu seðlabankastjóra, bauð nemendur velkomna í Seðlabankann og fóru þeir Stefán Rafn Sigurbjörnsson og Sigurður Valgeirsson yfir það helsta í starfi bankans. Góð og fróðleg svör fengust við spurningum nemenda og m.a. kom fram að gullforði Íslendinga er geymdur í London og er um tvö tonn, og íslenskir peningaseðlar eru vegan. Þeir sem vilja skoða skemmtilegt kynningarefni frá bankanum geta séð það hér .

Senn líður að ann­ar­lokum og viljum við því minna ykkur á nokkur mik­ilvæg atriði.
Síðasti kennslu­dagur er 9. des­ember en nánari upp­lýs­ingar um skipulag hvers áfanga má finna á Innu.
14. desember – Einkunnir birtast í Innu.14.desember - Viðtöl vegna námsmats kl. 12:00 – 13:00.15. desember– Upptökupróf fyrir útskriftarefni kl. 9:00.16.desember - Æfing fyrir útskrift kl. 16:00.17. desember – Útskrift í hátíðarsal skólans kl. 13:00.
Nám á næstu önn - Allir nem­endur sem halda áfram námi á næstu önn eiga að vera búnir að velja. Greiðsluseðlar verða sendir út eftir útskrift.
Gangi ykkur sem allra best á loka­sprett­inum !

Þann 5.desember tókum við í FÁ í gagnið forritið ReadSpeaker (Hlusta hnappinn) inn í á heimasíðu skólans. Til stendur að tengja ReadSpeaker líka inn í Moodle og það mun vonandi komast í gagnið á nýju ári. Ásamt því að geta hlustað á allt innihald Moodle á íslensku verður einnig hægt að hlusta á þeim tungumálum sem við kennum við skólann. Þetta verður vonandi mikil bót fyrir marga nemendur. 

Sjúkraliðafélag Íslands á í góðu samstarfi við Heilbrigðisskóla FÁ. Samstarfið felst meðal annars í því að fræðslustjóri félagsins kemur í reglulegar heimsóknir og kynnir starfsemi Sjúkraliðafélagsins. Nýverið kom Ragnhildur Bolladóttir fræðslustjóri félagsins í heimsókn í skólann og kynnti fyrir nemendum réttindi og skyldur þeirra að námi loknu í þeim tilgangi að undirbúa nemendur undir að fara út á vinnumarkaðinn sem sjúkraliðar. Hún fór m.a. yfir ábyrgð sjúkraliða í störfum sínum og hvernig hægt er að nýta þekkingu og færni að loknu námi með sem bestum hætti. Á fundinum sköpuðust líflegar umræður og nemendur nýttu vel tækifærið til að spyrja út í starfið og fengu góð og gagnleg svör sem vonandi nýtast þeim vel í starfi að námi loknu.

Fimmtudaginn 24.nóvember er námsmatsdagur í Fjölbrautaskólanum við Ármúla. Engin formleg starfsemi verður í skólanum þennan dag og skrifstofa skólans verður jafnframt lokuð.

Í hádeginu í dag fengu nemendur FÁ frábæran fyrirlestur frá Sólborgu Guðbrandsdóttur og Þorsteini V. Einarssyni. Sólborg heldur úti instagramreikningnum Fávitar og Þorsteinn heldur úti instagramreikningnum Karlmennskan.
Þau töluðu við nemendur um heilbrigð samskipti, mörk, muninn á jákvæðri og skaðlegri karlmennsku ofl. Markmiðið var að stuðla að uppbyggilegra jafnréttissamfélagi með því að hrista upp í viðteknum samfélagslegum normum og hugmyndum.
Vel var mætt á fyrirlesturinn og komu nemendur með áhugaverðar spurningar í lokin.
Við þökkum þeim Sólborgu og Þorsteini kærlega fyrir komuna.

Magnús skólameistari finnst myrtur í skólanum. Fimm starfsmenn liggja undir grun. Sara félagsfræðikennari, Þórhallur líffræðikennari, Monika stærðfræðikennari, Fannar kokkur og Kristrún aðstoðarskólameistari. Nemendur í EFNA2AM taka að sér að leysa málið með því að bregða sér í hlutverk réttarmeinafræðinga og beita efnafræðiþekkingu sinni á þeim vísbendingum sem finnast á vettvangi.

Nemendur í áfanganum Tölvuleikir og leikjatölvur, saga, þróun og fræði í Fjölbrautaskólanum við Ármúla kíktu í heimsókn til Aldin Dynamics á dögunum og tóku meðal annars þátt í notendaprófunum í sýndarveruleika. Darri Arnarson hjá Aldin tók á móti hópnum og fræddi nemendur um þróun sýndarveruleika og fyrirtækið sem sérhæfir sig á því sviði. Að lokum fengu nemendur að taka þátt í notendaprófunum fyrir nýjustu uppfærsluna á Waltz of the Wizard, sem er sýndarveruleikaupplifun þar sem notendur fá að leika sér með galdra og töfra. Hægt er að nálgast nánari upplýsingar um Waltz of the Wizard á heimasíðu Aldin Dynamics