Tveir nemendur skólans héldu námsskeið í kvikmyndagerð í tengslum við kvikmyndahátíð Grundaskóla á Akranesi í upphafi vikunnar. Þau Ísold Ylfa Teitsdóttir og Viktor Hugi Jónsson byrjuðu á því að kynna Kvikmyndahátíð framhaldsskólanna og héldu svo námskeiðið, sem var svokallað "24-hour film challenge" þar sem þau leiðbeindu nemendum í 8. 9. og 10. Grundaskóla í grínmyndagerð. Skemmst er frá því að námskeiðið gekk eins og í sögu, allir þátttakendur kláruðu myndir sínar svo að úr varð fjöldinn allur af nýjum grínmyndum.

 Þann 26. maí hélt 60 manna hópur kennara og starfsmanna í FÁ til Portúgal. Tilgangur ferðarinnar var að kynna sér starfið í tveim skólum í borginni Braga, Oficina og Agrupamento de escolas Sá De Miranda. Tveir ólíkir en flottir skólar sem gaman var að heimsækja. Sérstaka athygli vakti að portúgalskir nemendur eru alla jafna í skólanum frá átta á morgnana og til sex á kvöldin og fara þá í tómstundastarf. Ekki mikill tími sem fjölskyldurnar fá saman þarna í Portúgal.

Seinni hlutann af ferðinni hélt hópurinn svo til Portó. Þar var margt skemmtilegt að skoða, falleg borg með mikla sögu.

Hér má sjá heimasíður skólanna:

Oficina  

Agrupamento de escolas Sá De Miranda

 Það var vindasamur og blautur en mjög gleðilegur dagur í Fjölbrautaskólanum við Ármúla í dag þegar nem­endur mættu til útskriftar. Alls útskrifuðust 103 nemendur frá skólanum og þar af 9 af tveimur brautum; 65 stúdentar, 35 frá heilbrigðissviði, 10 af sérnámsbraut og 3 frá nýsköpunar- og listabraut.

Af stúdentsbrautum útskrifuðust 10 af félagsfræðibraut, 3 af íþrótta- og heilbrigðisbraut 12 af náttúrufræðibraut, 26 af opinni braut, 3 af viðskipta- og hagfræðibraut og 11 með viðbótarnám að loknu starfsnámi.

Af heilbrigðissviði útskrifuðust 17 sem sjúkraliðar, 5 af heilbrigðisritarabraut, einn af lyfjatæknabraut, 6 af heilsunuddbraut og 6 af tanntæknabraut.

10 frábærir nemendur útskrifuðust af sérnámsbraut eftir 4 ára nám.

Lesa meira.

Útskrift Fjölbrautaskólans við Ármúla á vorönn 2024 fer fram í hátíðarsal skólans, föstudaginn 24. maí. Athöfnin hefst stundvíslega kl. 13:00 og eru nemendur beðnir að mæta minnst hálftíma áður en athöfn hefst, eða kl. 12:30. Æfing fyrir útskriftina verður fimmtudaginn 23. maí kl. 16:30.

 Skoða hvernig stöðva megi framgang heilasjúkdóma

Lyfjafyrirtækið Lundbeck í Danmörku stóð nýlega fyrir stórri keppni sem kallast „Drughunters“. Hópi nemenda af náttúrufræðibraut Fjölbrautaskólans við Ármúla var boðin þátttaka í keppninni. Keppnin snýst um að koma með hugmyndir um hvernig stöðva megi framgang heilasjúkdóma eða lækna þá, en nemendur velja sér eitt viðfangsefni heilasjúkdóma, sem þeir afla sér þekkingar í.

Íslenski hópurinn fékk sérstakt hrós fyrir kynninguna sína. Fyrir íslensku krakkana var undirbúningurinn fyrir keppnina þverfaglegt samstarf raungreina og dönsku.

Keppnin vekur áhuga nemanda á læknisfræði
„Nemendunum sjálfum fannst keppnin hafa gefið þeim skemmtilegri sýn á dönskuna og einn nemandi nefndi að þessi keppni hefði hvatt hann til að reyna við læknisfræðina í framtíðinni“ sagði Simon Cramer Larsen, dönskukennari eftir ferðina. Í lok apríl síðastliðinn hittust svo allir hóparnir í Kaupmannahöfn og kynntu afraksturinn á dönsku fyrir dómnefnd að sögn Gúríar Helenu Petersen, dönskukennara, sem einnig var með í ferðinni.
Keppnin er fyrst og fremst ætluð dönskum og færeyskum framhaldsskólanemendum en Fjölbrautaskólinn við Ármúla er eini íslenski framhaldsskólinn sem tók þátt.

Skráning á sumarönn í fjarnámi við FÁ er hafin og stendur til 5. júní.

Önnin hefst 6. júní.

Fjölmargir áfangar eru í boði sem má sjá hér. 

Nánari upplýsingar um fjarnámið má sjá hér.  

Skráning fer fram hér.  

„Þetta dýpkar þekkingu mína og viðhorf til fangelsismála,“ sagði einn nemenda við viðskipta- og hagfræðibraut við Fjölbrautaskólann við Ármúla í tengslum við heimsókn nemenda í lögfræðiáfanga í fangelsið á Hólmsheiði. En í lok vorannarinnar var nemendum í áfanganum boðið, ásamt kennara áfangans, Ragnhildi B. Guðjónsdóttur, í vettvangsheimsókn í fangelsið þar sem nemendurnir urðu margs vísari um fangelsismál hérlendis.

Böðvar Einarsson, staðgengill forstöðumanns, tók einkar vel á móti hópnum og kynnti fyrir þeim starfsemi fangelsisins, sem er gæsluvarðhalds- og móttökufangelsi, með deild fyrir kvenfanga og aðstöðu fyrir afplánun styttri fangelsisrefsinga og vararefsinga.

Fyrsta fangelsið á Íslandi sem byggt er sem fangelsi

Böðvar upplýsti nemendur m.a. um að fangelsið á Hólmsheiði sé fyrsta og eina fangelsið sem byggt er og hannað sem fangelsi á Íslandi en Litla-Hraun var byggt sem heilbrigðisstofnun í upphafi.

Gerður var góður rómur af heimsókninni en nemendum fannst fróðlegt og áhugavert að fá að kynnast starfsemi fangelsisins og skoða aðstöðuna með beinum hætti.

Lesa meira

Í síðustu viku kláruðu nemendur á listabraut skólans að vinna listaverk á vegg á Steypunni í FÁ sem býður öll velkomin í skólann. Nemendur í myndlistaráfanganum MYNL2LI05 unnu verkið undir leiðsögn kennara síns, Jeannette Castioni. Nemendurnir unnu jafnt og þétt yfir önnina og náðu loksins að klára í síðustu viku og er útkoman stórglæsileg, líflegur og flottur veggur sem tekur vel á móti gestum og gangandi.

Senn líður að ann­ar­lokum og viljum við því minna ykkur á nokkrar mikilvægar dagsetningar.

13. maí - Síðasti kennsludagur en nánari upp­lýs­ingar um skipulag hvers áfanga má finna á Innu.

14. maí - Sjúkrapróf/ uppsóp.

16. maí - Einkunnir birtast í Innu.

16. maí - Prófsýning og viðtöl vegna námsmats kl. 12:00 – 13:00.

17. maí - Endurtektarpróf fyrir útskriftarefni kl. 9:00 - 11:00.

23. maí - Æfing fyrir útskrift kl. 16:30.

24. maí - Útskrift í hátíðarsal skólans kl. 13:00.

Nám á næstu önn. Allir nem­endur sem halda áfram námi á næstu önn eiga að vera búnir að velja. Greiðsluseðlar verða sendir út eftir útskrift.

Gangi ykkur sem allra best á loka­sprett­inum

Hópur frá skólanum IES Tegueste á Spáni kom í heimsókn í FÁ dagana 15. – 19. apríl en skólinn er samstarfsskóli okkar í Erasmus+ verkefninu A Green Day sem er umhverfismiðað verkefni. Fimm nemendur og þrír kennarar sóttu FÁ heim og þessa viku sem þau voru í heimsókn hjá okkur hjálpuðu nemendur FÁ þeim að útbúa handbók um Grænfánann, alþjóðlega umhverfisviðurkenningu sem á ensku kallast Eco- Schools. FÁ er sá framhaldsskóli á Íslandi sem hefur lengst flaggað grænfánanum og nemendur okkar því vel í stakk búnir að aðstoða við gerð handbókarinnar. Ásamt því að vinna að handbókinni fóru gestirnir ásamt gestgjöfunum Gullna hringinn og á náttúrusýninguna í Perlunni. Spánverjarnir voru „heppnir“ með veður en eins og tíðkast í apríl á Íslandi var allra veðra von og þau fengu allt frá snjókomu yfir í glampandi sól og aðspurð sögðu þau að það hefði verið einn af hápunktunum, að geta farið í snjókast í apríl.

Í nóvember fer sami hópur og tók á móti gestunum hér heima út í heimsókn til IES Tegueste sem er staðsettur norðanmegin á eynni Tenerife. Þar munu nemendur okkar læra að reikna kolefnissporið sitt og halda áfram að styrkja tengslin við þennan frábæra vinaskóla.

 Sumardagurinn fyrsti er á morgun, fimmtudaginn 25.apríl og þá er að sjálfsögðu frí.

Föstudaginn 26. apríl er námsmatsdagur. Engin formleg starfsemi verður í skólanum þennan dag og verður skrifstofa skólans jafnframt lokuð.

Við óskum öllum gleðilegs sumars.

 Vörumessa á vegum JA Iceland var haldin í Smáralindinni núna um helgina þar sem nemendur frá framhaldsskólum landsins tóku þátt í Fyrirtækjasmiðju Ungra frumkvöðla sem er nýsköpunarkeppni framhaldsskólanna.

Nemendur í frumkvöðlafræði og nýsköpunaráfanga á viðskipta- og hagfræðibraut Fjölbrautaskólans við Ármúla undir leiðsögn Róberts Örvars Ferdinandssonar kennara tóku þátt í sýningunni og kynntu vörur sínar sem vakti athygli og áhuga gesta í Smáralindinni.

FÁ var með 5 nýsköpunarfyrirtæki að þessu sinni sem voru fjölbreytt og skemmtileg. BT þjónusta býður upp heimilis þjónustu fyrir aldurshópinn 50-60 ára. Fish Flakes þróuðu fiskisnakk úr uggum. Nóti ákvað að endurnýta nylon fiskinet og sauma margnota poka. Styrkur ákvað að styrkja björgunarsveitina Þorbjörn í Grindavík með því að selja áletraða bolla. Æskjur bjó til heimagerður brjóstsykur með mismunandi bragðtegundum til að vekja upp minningar um æskuárin á Íslandi.

Sérfræðingar Kvikmyndasafns Íslands tóku vel á móti nemendum í Sjónvarpsþáttagerð (KVMG2SJ05) og Kvikmyndafræði (KFRT2KF05). Í heimsókninni fræddust nemendur um hlutverk safnsins og mikilvægi þess að varðveita myndefni. Hópurinn fékk einnig leiðsögn um safnið þar sem græjur til kvikmyndagerðar voru skoðaðar, gamlar sýningarvélar, filmur, veggspjöld og vel kældar filmugeymslur.

Í Fjölbrautaskólanum við Ármúla er boðið upp á leiklistaráfanga í vali, leiklist að hausti og leiksýning að vori. Það er öllum nemendum í skólanum frjálst að velja þess áfanga. Vikuna fyrir páskafrí sýndu nemendur í leiksýningaráfanganum afrakstur annarinnar en það var stórglæsileg leiksýning sem bar nafnið “Fólk er furðulegt”. Hópurinn sýndi verkið þrisvar sinnum í hátíðarsal skólans undir stjórn kennarans Sumarliða Snælands Ingimarssonar. Nemendur sáu um allt er kom að sýningunni. Nemendur af listabraut sáu um leikmynd og leikmuni, nemendur í fatahönnum sáu um búningana og nemendur í tónlistaráfanganum sáu um tónlistina í sýningunni. Algjörlega frábært samstarf á milli áfanga.

Fólk er furðulegt er samsett af þremur eftir verkum eftir leikskáldin David Ives (Time Flies, 1997 & Sure Thing, 1988) og Christopher Durang (DMV Tyrant, 1988). Öll eru þetta verk sem svipar til svokallaðra „sketcha“ eða stuttra gamanleikja þar sem viðfangsefnið í hverju þeirra er samskipti. Í því fyrsta veltir Ives fyrir sér tilveru dægurflugunnar en líkt og nafnið gefur til kynna lifir hún eingöngu í einn dag. Í því öðru fáum við að sjá hvernig tveir einstaklingar reyna að finna sálufélaga hvort í öðru í nokkurs konar Groundhog Day aðstæðum. Í því þriðja fáum við að kynnast stofnanaskrifræðinu sem oft getur tekið á taugarnar. Tónlistin í verkinu endurspeglar svo þema hvers verks fyrir sig og rammar það að lokum inn með lagi eftir bandarísku rokkhljómsveitina The Doors.

Til hamingju með frábæra sýningu! 

 Um síðustu helgi var Kvikmyndahátíð framhaldsskólanna haldin í 10. skipti. Að venju var skipulagning hátíðarinnar í höndum nemenda FÁ en þau Ísold, Ísabella, Þorsteinn, Trostan, Heorhii, Ana, Ayat og Tawfik sem og kvikmyndakennarinn þeirra Atli, eiga hrós skilið fyrir flotta skipulagningu og glæsilega hátíð.

Lesa meira.

Í dag fengum við heimsókn frá Ásmundi  Einari Daðasyni mennta- og barnamálaráðherra. Tilefnið var frumsýning á nýjum myndböndum; #MeToo bylting framhaldsskólanna –Samþykki, mörk og náin samskipti. Myndböndin eru liður í forvarnar- og fræðsluátaki Mennta- og barnamálaráðuneytisins vegna umræðu um kynferðisofbeldi og viðbragðsáætlanir framhaldsskólanna.

Það var fullur salur af nemendum þegar Magnús Ingvason skólameistari bauð Ásmund Einar velkominn í FÁ. Ásmundur Einar sagði svo frá verkefninu sem varð til í kjölfarið á því að fjöldi framhaldsskólanemar gengu út úr tímum í október 2022 til að sýna þolendum kynferðisafbrota stuðning og að mótmæla aðgerðarleysi stjórnvalda í þessum málaflokki.

Myndböndin eru fjögur talsins og taka fyrir byltingarnar í framhaldsskólum og kynferðisofbeldi, klám og kynlíf, mörk og samþykki og margvíslegar samfélagskröfur sem geta haft áhrif á ungt fólk. Tilgangur myndbandanna er að kveikja gagnrýnin samtöl meðal framhaldsskólanemenda á Íslandi. Ráðuneytið samdi við Sólborgu Guðbrandsdóttur og Þorstein V. Einarssson ásamt RÚV um gerð þess.

Eftir að þessi flottu myndbönd voru sýnd afhenti Ásmundur Einar, Magnúsi skólameistara EKKO - leiðarvísi sem hefur verið í vinnslu innan ráðuneytisins með fjölmörgum hagsmunaaðilum og er ætlaður skólunum til stuðnings þegar upp koma EKKO mál (einelti, kynbundin áreitni, kynferðisleg áreitni, ofbelti).

Á myndinni sjáum við Ásmund Einar ásamt Magnúsi skólameistara, Kristrúnu aðstoðarskólameistara og þeim Emblu og Öldu sem eru fulltrúar SÍF - sambandi íslenskra framhaldsskólanema.

Leiklistaráfangi skólans frumsýnir leikritið “Fólk er furðulegt” á þriðjudaginn.

"Fólk er furðulegt" er sirka klukkutíma löng sýning sem er samsett af þremur stuttum absúrdískum gamanleikjum eftir amerísku leikskáldin David Ives og Christopher Durang og lögum eftir The Doors, Dolly Parton, Casey Elliott og Chloe Moriondo.

Leikritið er sýnt í hátíðarsal Fjölbrautaskólans við Ármúla þriðjudaginn 19.mars klukkan 20:00, miðvikudaginn 20.mars klukkan 20:00 og fimmtudaginn 21.mars klukkan 13:00.

Miðaverð er 1.000 krónur og 500 krónur fyrir þá sem greitt hafa árgjald Nemendafélags Fjölbrautaskólans við Ármúla. Miðar eru seldir á staðnum. Popp og gos í boði.

Hvetjum öll til að mæta á þessa skemmtilegu sýningu.

Hér er tengill á viðburðinn á facebook: https://fb.me/e/3ppabaeM1

Fjölbrautaskólinn við Ármúla mætti Fjölbrautaskóla Vesturlands á Akranesi í FRÍS síðastliðinn miðvikudag þar sem keppt var í Rocket League, Valorant og Counter-Strike 2. FÁ byrjaði keppnina á stórsigri í Rocket League en tapaði í kjölfarið i skotleiknum Counter-Strike 2. Þegar komið var að því að spila Valorant voru skólarnir búnir að vinna einn leik hvor og ljóst að sá skóli sem myndi sigra Valorant myndi komast áfram í undanúrslit. FVA náði snemma yfirhöndinni í Valorant en FÁ komu sterkir inn í seinni hluta leiks, það dugði þó ekki til og endaði leikurinn með sigri FVA og þar með var lið FÁ úr leik.

Rafíþróttalið FÁ á hrós skilið fyrir frábæra frammistöðu!

Mynd: Skjáskot úr Rocket League leik FÁ og FVA

 Nemendur í viðskiptalögfræði í FÁ fengu það verkefni að setja á svið réttarhöld í skólanum í liðinni viku.

Að þessu sinni var um að ræða skaðabótamál vegna óhapps á skemmtistað sem tekið var fyrir af „Landsrétti“.

Nemendur skiptu með sér hlutverkum dómara, lögfræðinga, stefnanda, stefndu, vitna og blaðamanna.

 Í málfutningnum voru ýmis sönnunargögn lögð fram og vitni kölluð fyrir dóminn ásamt löggildum matsaðilum.

Fjölmiðlar fylgdust vel með málinu og var ýjað að því í fjölmiðlum áður en málið var tekið fyrir að stefnandi myndi að öllum líkindum vinna málið vegna tengsla við háttsetta aðila í þjóðfélaginu.

Niðurstaða málsins var sú að stefnanda voru dæmdar skaðbætur og stóð því dómur „héraðsdóms“ óbreyttur.

Nemendur voru hæst ánægðir með málflutninginn og fannst mikill lærdómur að taka þátt í skipulagi og uppsetningu réttarhaldanna.

Þeir sem mættir voru í „dómsal“ til þess að fylgjast með málflutningum hrósuðu nemendum fyrir faglegan og góðan málflutninginn.